ఒక్క దెబ్బతో లక్షాధికారులైన కుటుంబం

ఆంధ్రప్రదేశ్ ప్రభుత్వం అమలు చేస్తున్న తల్లికి వందనం పథకంలో కొత్త రికార్డులు నమోదవుతున్నాయి. తల్లికి వందనం పథకం కింద ఇంట్లో ఎంతమంది పిల్లలు చదువుతూ ఉంటే వారందరికీ తల్లికి వందనం సాయం అందిస్తోంది ప్రభుత్వం. ఒకటో తరగతి నుంచి ఇంటర్మీడియట్ వరకూ.. ప్రభుత్వ, ప్రైవేట్ పాఠశాలలు, కాలేజీల్లో చదువుతున్న వారికి తల్లికి వందనం అందిస్తోంది. జూన్ 12న తల్లికి వందనం పథకం ప్రారంభించారు. అయితే సాంకేతిక కారణాల ద్వారా ఒకరోజు ఆలస్యంగా విద్యార్థుల తల్లుల బ్యాంక్ ఖాతాల్లోకి తల్లికి వందనం డబ్బులు జమ అవుతున్నాయి. ఒక్కొక్కరికీ రూ.15000 చొప్పున చెప్పిన ప్రభుత్వం, పాఠశాలల అభివృద్ధికి రూ.2000 కట్ చేసుకుంది. మిగతా రూ.13000 విద్యార్థుల తల్లుల ఖాతాల్లో జమ చేస్తున్నారు.

ఈ క్రమంలోనే అన్నమయ్య జిల్లా లోని ఓ కుటుంబానికి తల్లికి వందనం కింద ఏకంగా రూ.1.56 లక్షలు అకౌంట్లలోకి పడ్డాయి. అన్నమయ్య జిల్లా కలకడ పట్టణంలోని కుటుంబానికి లక్షా 56 వేల రూపాయలు తల్లికి వందనం పథకం కింద అందింది. కలకడలోని ఉమ్మడి కుటుంబంలో 12 మంది పిల్లలు ఉన్నారు. ముగ్గురు తల్లులకు కలిపి 12 మంది సంతానం కాగా.. వీరందరికీ తల్లికి వందనం పథకం కింద రూ.13000 చొప్పున సాయం అందింది.

మొత్తంగా ఆ ఒక్క కుటుంబానికే తల్లికి వందనం పథకం కింద రూ.1.56 లక్షలు ప్రభుత్వం అకౌంట్లలోకి జమ చేసింది. దీంతో ఆ కుటుంబసభ్యులు సంతోషం వ్యక్తం చేస్తున్నారు. గతంలో ఒక్కరికి మాత్రమే అమ్మ ఒడి వచ్చేదని.. ఇప్పుడు అందరికీ చదువుకునేందుకు సాయం అందించినందుకు సీఎం చంద్రబాబుకు ధన్యవాదాలు తెలిపారు. ఈ వీడియోను టీడీపీ తన అధికారిక ఎక్స్ ఖాతాలో షేర్ చేసింది.

మరోవైపు అనంతపురం జిల్లాలోనూ ఒకే కుటుంబంలో ఆరుగురు విద్యార్థులకు తల్లికి వందనం డబ్బులు జమ అయ్యాయి. బెలుగుప్ప మండలం అంకంపల్లికి చెందిన గంగమ్మ, ఓబులేసులకు ఆరుగురు పిల్లలు. అయితే వీరందరికీ తల్లికి వందనం పథకం కింద రూ.78000 సాయం అందుతోంది. దీంతో ఆ దంపతులు ఆనందం వ్యక్తం చేస్తున్నారు. ఉరవకొండలోని అంబేడ్కర్ నగర్‌లో ఉండే కామాక్షి , ఓబులేసు దంపతులకు కూడా నలుగురు పిల్లలు. ఆ నలుగురికి కూడా తల్లికి వందనం నగదు జమ కావడంతో ఆ తల్లిదండ్రులు సంతోషం వ్యక్తం చేస్తున్నారు.