ఇంగ్లాండ్‌తో టెస్ట్ సిరీస్‌కు కెప్టెన్సీ వద్దన్న జస్‌ప్రీత్ బుమ్రా

భారత క్రికెట్ జట్టు స్టార్ ఫాస్ట్ బౌలర్ జస్‌ప్రీత్ బుమ్రా, ఇంగ్లాండ్‌తో జరగబోయే టెస్ట్ సిరీస్‌కు కెప్టెన్సీ బాధ్యతలు చేపట్టే అవకాశం వచ్చినా, తాను తిరస్కరించినట్లు వెల్లడించాడు. తన పనిభారాన్ని దృష్టిలో ఉంచుకుని ఈ కీలక నిర్ణయం తీసుకున్నట్లు బుమ్రా స్పష్టం చేశాడు. అజిత్ అగార్కర్ నేతృత్వంలోని బీసీసీఐ సెలక్షన్ కమిటీ తనను కెప్టెన్సీ కోసం సంప్రదించిందని, అయితే తాను అందుకు సున్నితంగా నిరాకరించినట్లు ఓ ఇంటర్వ్యూలో తెలిపాడు.టీమిండియా మాజీ వికెట్ కీపర్ బ్యాటర్ దినేశ్ కార్తీక్‌తో స్కై స్పోర్ట్స్ నిర్వహించిన ఇంటర్వ్యూలో బుమ్రా ఈ విషయాలను పంచుకున్నాడు. రోహిత్ శర్మ, విరాట్ కోహ్లీ ఐపీఎల్ సమయంలో రిటైర్మెంట్ ప్రకటించిన తర్వాత, తన భవిష్యత్తు పనిభారం గురించి బీసీసీఐతో చర్చించినట్లు బుమ్రా పేర్కొన్నాడు. "ఐదు టెస్టుల సిరీస్‌లో నా పనిభారం ఎలా ఉండాలనే దానిపై నేను బీసీసీఐతో మాట్లాడాను. నా వెన్ను సమస్యను పర్యవేక్షిస్తున్న వారితో, నాకు శస్త్రచికిత్స చేసిన సర్జన్‌తో కూడా చర్చించాను. పనిభారం విషయంలో పక్కా ప్రణాళికతో వ్యవహరించాలని వారు సూచించారు. ఈ చర్చల అనంతరం, నేను కొంచెం జాగ్రత్తగా ఉండాలనే నిర్ణయానికి వచ్చాను" అని బుమ్రా వివరించాడు.ఆ తర్వాత బీసీసీఐకి ఫోన్ చేసి, నాయకత్వ బాధ్యతల కోసం తనను పరిగణించవద్దని కోరినట్లు బుమ్రా తెలిపాడు. "ఐదు టెస్టుల సిరీస్‌లో అన్ని మ్యాచ్‌లు ఆడలేనప్పుడు నాయకత్వ పాత్రలో ఉండటం సరికాదు. బీసీసీఐ నన్ను నాయకత్వం కోసం పరిశీలిస్తున్న మాట వాస్తవమే. కానీ, నేను అందుకు 'నో' చెప్పాల్సి వచ్చింది. ఒక సిరీస్‌లో మూడు మ్యాచ్‌లకు ఒకరు, రెండు మ్యాచ్‌లకు మరొకరు కెప్టెన్‌గా ఉండటం జట్టుకు మంచిది కాదు. నేను ఎప్పుడూ జట్టు ప్రయోజనాలకే మొదటి ప్రాధాన్యత ఇస్తాను" అని బుమ్రా స్పష్టం చేశాడు.బుమ్రా కొంతకాలంగా గాయాలతో ఇబ్బంది పడుతున్న విషయం తెలిసిందే. ఈ నేపథ్యంలో, ఇంగ్లాండ్‌తో జరగబోయే ఐదు టెస్టుల సిరీస్‌లో అతను అన్ని మ్యాచ్‌లు ఆడడని బీసీసీఐ కూడా స్పష్టం చేసింది. కాగా, ఇంగ్లాండ్ సిరీస్ కు యువ ఆటగాడు శుభ్‌మన్ గిల్‌కు సారథ్య బాధ్యతలు అప్పగించగా, రిషభ్ పంత్‌ను వైస్ కెప్టెన్‌గా నియమించారు.