ఏపీలోని పేదలకు శుభవార్త.. అన్న క్యాంటీన్లను మండలాలకు కూడా విస్తరించే ఆలోచన

రాష్ట్రంలోని నిరుపేదలకు ఏపీ ప్రభుత్వం మరో శుభవార్త వినిపించింది. ముఖ్యమంత్రి నారా చంద్రబాబు నాయుడు అధ్యక్షతన మంగళవారం ఏపీ కేబినెట్ భేటీ జరిగింది. ఈ మంత్రివర్గ సమావేశంలో పలు కీలక నిర్ణయాలు తీసుకున్నారు. ఈ క్రమంలోనే రాష్ట్రంలోని అన్న క్యాంటీన్లపై మంత్రివర్గ సమావేశంలో చర్చించారు. ప్రజల నుంచి అన్న క్యాంటీన్లపై మంచి స్పందన వస్తోందని మంత్రివర్గ సమావేశంలో అభిప్రాయం వ్యక్తమైంది. ఈ క్రమంలోనే అన్న క్యాంటీన్లపై సీఎం చంద్రబాబు కీలక నిర్ణయం తీసుుకున్నట్లు తెలిసింది. అన్న క్యాంటీన్లు ఇప్పటి వరకూ పట్టణాలు, జిల్లా కేంద్రాలకే పరిమితం కాగా.. త్వరలోనే అన్ని మండల కేంద్రాలలోనూ అన్న క్యాంటీన్లు ఏర్పాటు చేయాలని చంద్రబాబు సూచించినట్లు సమాచారం.

అలాగే అన్న క్యాంటీన్ల నిర్వహణకు సంబంధించి కూడా మరో కీలక నిర్ణయం తీసుకున్నారు. అన్న క్యాంటీన్ల ఏర్పాటు, దాతల విరాళాలు, నిర్వహణకు ప్రత్యేక కమిటీ ఏర్పాటు చేయాలని చంద్రబాబు సూచించారు. మరోవైపు పేద, మధ్యతరగతి ప్రజలకు, వలస కూలీల ఆకలి తీర్చాలనే ఉద్దేశంతో ఈ అన్న క్యాంటీన్లు ఏర్పాటు చేశారు. సబ్సిడీ రేట్లకే నాణ్యమైన, రుచికరమైన ఆహారం అందించేందుకు 2018లో అప్పటి టీడీపీ ప్రభుత్వం అన్న క్యాంటీన్లు ఏర్పాటు చేసింది. రూ.5లకే నిరుపేదలు, రోజువారీ కూలీలు, ఆటో డ్రైవర్లు, వీధి వ్యాపారులకు ఆహారం అందించింది. అయితే 2019 ఎన్నికల్లో విజయం సాధించి వైసీపీ అధికారంలోకి వచ్చిన తర్వాత ఈ పథకం ఆగిపోయింది. 2024 ఎన్నికల్లో గెలిచి అధికారంలోకి వచ్చిన టీడీపీ కూటమి ప్రభుత్వం అన్న క్యాంటీన్లను తిరిగి ప్రారంభించింది.

అన్న క్యాంటీన్ల ద్వారా ఉదయం అల్పాహారం, మధ్యాహ్నం భోజనం, రాత్రి డిన్నర్ అందిస్తారు. ప్రతి క్యాంటీన్ ద్వారా రోజుకు సగటున 350 నుంచి 500 మందికి ఆహారం అందిస్తున్నారు. అన్న క్యాంటీన్ నిర్వహణకు రోజుకు న రూ.26,256 ఖర్చవుతుంది. ఈ లెక్కన 203 అన్న క్యాంటీన్లకు రోజుకు రూ.53.28 లక్షలు, ఏడాదికి రూ.200 కోట్లు అవసరం. అయితే ప్రభుత్వం సొంత ఖర్చుతో పాటుగా దాతల నుంచి అందే విరాళాల ద్వారా అన్న క్యాంటీన్లను నిర్వహిస్తోంది. మంగళవారం జరిగిన కేబినెట్ భేటీలోనూ మరో 9 అన్న క్యాంటీన్ల ఏర్పాటుకు ఆమోదం తెలిపింది. ఈ క్రమంలోనే త్వరలో మండలాల్లోనూ అన్న క్యాంటీన్లు ఏర్పాటు చేయాలని భావిస్తోంది.