గంభీర్‌కు షాక్.. హర్షిత్ రాణాను వెనక్కి పిలిపించిన బీసీసీఐ

ఇంగ్లాండ్‌తో రెండో టెస్టుకు ప్రారంభానికి ముందు టీమిండియా జట్టులో మార్పులు చోటు చేసుకున్నాయి. బ్యాకప్ పేసర్‌గా ఎంపికైన హర్షిత్ రాణా ను బీసీసీఐ వెనక్కి పిలిపించినట్లు తెలుస్తోంది. ప్రస్తుతం ఇంగ్లాండ్‌లో ఉన్న హర్షిత్.. వెంటనే భారత్‌కు రావాలని బీసీసీఐ ఆదేశించినట్లు సమాచారం. జులై 2న భారత్- ఇంగ్లాండ్ జట్ల మధ్య బర్మింగ్‌హామ్ వేదికగా రెండో టెస్టు ప్రారంభం కానుంది. ఇందుకోసం హెడింగ్లే నుంచి భారత జట్టు బయలుదేరింది. ఈ జట్టులో హర్షిత్ రాణా లేడని తెలిసింది.

నిజానికి ఇంగ్లాండ్‌తో టెస్టు సిరీస్ కోసం జట్టులో పేసర్ హర్షిత్‌ రాణా లేడు. కానీ ఐదు టెస్టుల సిరీస్ కావడంతో పేస్‌ బౌలర్లు గాయపడే అవకాశం ఉందని హెడ్‌ కోచ్‌ గంభీర్‌ ముందు జాగ్రత్త చర్యగా హర్షిత్‌ పేరును సిఫార్సు చేసినట్లు తెలుస్తోంది. దీంతో హెడింగ్లేలో తొలి టెస్ట్‌ ప్రారంభానికి ముందు హర్షిత్‌ హుటాహుటిన ఇంగ్లండ్‌కు పయనమయ్యాడు. జట్టులో చేరాడు. అయితే ప్రస్తుత పరిస్థితుల్లో భారత్‌కు బ్యాకప్ ప్లేయర్ అవసరం లేదని మేనేజ్‌మెంట్‌ భావిస్తున్నట్లు సమాచారం. జట్టులోని పేసర్లంతా ఫిట్‌గా ఉన్నారని... అందుకే మేనేజ్‌మెంట్‌ హర్షిత్‌ను బీసీసీఐకి వెనక్కి పిలిపించిందని విశ్వసనీయ వర్గాలు తెలిపాయి.

కాగా ఇంగ్లాండ్‌ సిరీస్‌ కోసం హర్షిత్ రాణాను బ్యాకప్ పేసర్‌గా ఎంపిక చేయడంపై.. హెడ్‌ కోచ్ గౌతమ్ గంభీర్‌పై విమర్శలు వచ్చాయి. గంభీర్.. కేకేఆర్ కోచ్‌గా ఉన్నప్పుడు హర్షిత్ రాణా ఆటను దగ్గరి నుంచి చూశాడు. అదే పరిచయంతో అతడి పేరును సెలక్టర్లకు సిఫార్సు చేసినట్లు విమర్శలు వచ్చాయి. అందుకు తగ్గట్లుగానే గంభీర్‌ టీమిండియా హెడ్‌ కోచ్‌ అయ్యాకే హర్షిత్‌ మూడు ఫార్మాట్లలో భారత్‌ జట్టు తరఫున అరంగేట్రం చేయడం గమనార్హం.

శుభ్‌మన్ గిల్ (కెప్టెన్‌), రిషభ్ పంత్ (వైస్ కెప్టెన్), యశస్వి జైశ్వాల్, కేఎల్ రాహుల్, సాయి సుదర్శన్, అభిమన్యు ఈశ్వరన్, కరుణ్ నాయర్, నితీశ్ కుమార్ రెడ్డి, రవీంద్ర జడేజా, ధ్రువ్ జురెల్, వాషింగ్టన్ సుందర్, శార్దుల్ ఠాకూర్, జస్‌ప్రీత్ బుమ్రా, మహమ్మద్ సిరాజ్, ప్రసిద్ధ్ కృష్ణ, ఆకాశ్ దీప్, అర్షదీప్ సింగ్, కుల్‌దీప్ యాదవ్.