చివరి 9 మ్యాచ్లలో ఒకే విజయం,,,టెస్టు క్రికెట్లో పడిపోతున్న టీమిండియా గ్రాఫ్
sports | Suryaa Desk | Published : Wed, Jun 25, 2025, 10:27 PM
గతేడాది వరకు టీమిండియా టెస్టు క్రికెట్లో బలమైన జట్టుగా నిలిచింది. వరుసగా రెండు పర్యాయాలు ప్రపంచ టెస్టు ఛాంపియన్ షిప్ ఫైనల్కు చేరుకుంది. అద్భుత ప్రదర్శనతో డబ్ల్యూటీసీ 2021, 2023 ఫైనల్లో అడుగుపెట్టింది. అయితే తుది మెట్టుపై బోల్తాపడి గదను మిస్ చేసుకుంది. అయితే హెడ్కోచ్గా గంభీర్ బాధ్యతలు చేపట్టాక టెస్టు క్రికెట్లో టీమిండియా గాడి తప్పింది. అప్పటివరకు వరుస విజయాలు సాధించిన భారత్.. ఇప్పుడు విజయం కోసం ఎదురుచూస్తోంది. గత తొమ్మిది టెస్టు మ్యాచ్లలో భారత జట్టు కేవలం ఒకే మ్యాచ్లో గెలుపొందింది.
గతేడాది స్వదేశంలో న్యూజిలాండ్తో మూడు మ్యాచ్ల టెస్టు సిరీస్ ప్రారంభం నాటికి డబ్ల్యూటీసీ 2025 ఫైనల్ రేసులో భారత్ ముందంజంలో ఉంది. ఆ సిరీస్తో పాటు.. ఆస్ట్రేలియా పర్యటనలోని ఐదు మ్యాచ్లలో కలిపి నాలుగు మ్యాచ్లలో గెలిచినా భారత్ ఫైనల్ చేరేది. కానీ స్వదేశంలో న్యూజిలాండ్ చేతిలో భారత్ చిత్తుగా ఓడిపోయింది. మూడు మ్యాచ్ల సిరీస్లో అన్నింట్లోనూ పరాజయం పాలైంది. దీంతో చాలా ఏళ్ల తర్వాత సొంతగడ్డపై టెస్టు సిరీస్ కోల్పోయింది.
ఆ తర్వాత ఆస్ట్రేలియా గడ్డపై అడుగుపెట్టిన భారత్.. తొలి మ్యాచ్లోనే విజయం సాధించి ఔరా అనిపించింది. కానీ ఆ తర్వాత మళ్లీ గాడి తప్పింది. ఆ తర్వాత ఆడిన నాలుగు మ్యాచ్లో మూడింట్లో పరాజయం పాలైంది. ఒక్క మ్యాచ్లో మాత్రం డ్రాతో గట్టెక్కింది. దీంతో ఈ సిరీస్ను కోల్పోవడంతో పాటు డబ్ల్యూటీసీ 2025 ఫైనల్ బెర్తును కూడా మిస్ చేసుకుంది. తాజాగా ఇంగ్లాండ్తో ఐదు మ్యాచ్ల సిరీస్లోనూ తొలి మ్యాచ్లో ఓటమిపాలైంది. సులభంగా గెలిచే మ్యాచ్ను చేజేతులా పోగొట్టుకుంది. దీంతో ఐదు మ్యాచ్ల సిరీస్ 0-1తో వెనకబడిపోయింది.
మొత్తంగా భారత్ చివరగా ఆడిన 9 టెస్టులలో కేవలం ఒకదాంట్లోనే గెలిచింది. బోర్డర్ గవాస్కర్ ట్రోఫిలో భాగంగా పెర్త్ టెస్టులో ఈ గెలుపు సాధించింది. ఏడు మ్యాచ్లలో ఓడిపోయింది. ఒక మ్యాచ్ డ్రా అయింది. ఇక చివరి 9 టెస్టుల్లో రికార్డుల విషయానికి వస్తే టీమిండియాదే అత్యంత చెత్తరికార్డు. టెస్టు క్రికెట్ ఆడే ప్రధాన జట్లన్నీ తమ చివరి 9 టెస్టులలో కనీసం రెండింట్లో అయినా గెలిచాయి. కానీ భారత్ మాత్రం ఒకే టెస్టులో గెలిచింది. మొత్తంగా గంభీర్ హెడ్కోచ్ అయ్యాక 11 మ్యాచ్లు ఆడిన భారత్.. 3 విజయాలు, ఒక డ్రా, 7 ఓటములు నమోదు చేసింది. మరి భారత్ మునుపటి ఫామ్ అందుకుని ఇంగ్లాండ్తో సిరీస్లో రాణిస్తుందా? లేదా అన్నది తేలాల్సి ఉంది.
|
|