రైలు జర్నీ పూర్తి చేసి.. టికెట్ డబ్బులు వాపస్ పొందొచ్చు

మీరు తరుచూ రైలు ప్రయాణం చేస్తుంటారా? అయితే, రైలు ప్రయాణంలో మీకు ఎన్నో అనుభవాలు ఉండే ఉంటాయి. కొన్నిసార్లు ప్రయాణం సాఫీగా సాగితే కొన్ని సార్లు ఇబ్బందులు పడాల్సి వస్తుంది. అలా వారణాసి- ఢిల్లీ వందే భారత్ రైలులో దర్శిల్ మిశ్రా అనే వ్యక్తి ప్రయాణించగా తీవ్ర అసౌకర్యం ఎదురైంది. వందే భారత్ రైలులో ఏసీ పని చేయకపోవడం, పైకప్పు నుంచి నీరు లీకవడం వంటివి జరిగినట్లు సోషల్ మీడియా ఎక్స్ వేదికగా పోస్ట్ చేశారు. ప్రయాణమంతా నిలబడే ఉండాల్సి వచ్చిందని, టికెట్ డబ్బులు రీఫండ్ చేయాలని కోరారు. ఇలాంటి అనుభవాలు మనకూ ఎదురవుతాయి. అలాంటప్పుడు ఏం చేయాలి, టికెట్ డబ్బులు ఎలా తిరిగి పొందాలి అనేది తెలుసుకుందాం.

రైలు ఆలస్యంగా నడవడం, రైలులో ఏసీ పని చేయకపోవడం, ట్రైన్ ఇతర రూట్లలో మళ్లించడం వంటివి జరిగినప్పుడు టికెట్ డబ్బులు రీఫండ్ కోరవచ్చు. ఇందుకోసం టీడీఎస్ ఫైల్ చేయాల్సి ఉంటుంది. నిర్దేశిత గడువులోపు టీడీఆర్ ఫైల్ చేసినట్లయితే టికెట్ డబ్బులు పూర్తిగా లేదా పాక్షికంగా రీఫండ్ పొందవచ్చు. ఐఆర్‌సీటీసీ వెబ్‌సైట్, యాప్ ద్వారా ఫైల్ చేయవచ్చు. మీ టీడీఆర్‌ను సంబంధిత రైల్వే జోన్ అధికారులు పరిశీలించి నిజమేనని తేలితే మీ ఖాతాలో డబ్బులు జమ చేస్తారు.

మీరు ప్రయాణించాల్సిన ట్రైన్ 3 గంటల కంటే ఎక్కువ ఆలస్యంగా నడుస్తూ మీరు అందులో ప్రయాణించే అవకాశం లేకుంటే రీఫండ్ కోరవచ్చు. రైలు బయలుదేరే వాస్తవ సమయానికింటే ముందే టీడీఆర్ ఫైల్ చేస్తే రీఫండ్ మొత్తం వస్తుంది. అలాగే ఏసీ బోగీలో టికెట్ బుకింగ్ చేసుకున్నప్పుడు ప్రయాణంలో ఏసీ పని చేయకపోతే మీరు రీఫండ్ కోరవచ్చు. జర్నీ పూర్తి చేసిన 20 గంటల్లో టీడీఆర్ ఫైల్ చేయాలి. అలాగే మీరు ఎక్కాల్సిన బోగీ కాకుండా వేరే బోగీలో ప్రయాణించడం అంటే బుక్ చేసిన తరగతి కాకుండా అంతకు తక్కువ తరగతిలో ప్రయాణిస్తే టికెట్ డబ్బులు పొందవచ్చు. అలాగే ఏదైనా కారణంతో ట్రైన్ మళ్లించినప్పుడు మీరు ట్రైన్ మిస్ అయితే 72 గంటల్లో టీడీఆర్ ఫైల్ చేసి టికెట్ డబ్బులు పొందవచ్చు.

టీడీఆర్ ఎలా ఫైల్ చేయాలి?

ముందుగా ఐఆర్‌సీటీసీ వెబ్‌సైట్ లేదా యాప్‌లోకి లాగిన్ కావాలి.

మై అకౌంట్ సెక్షన్‌లోని మై ట్రాన్సాక్షన్లలోకి వెళ్లాలి.

అక్కడ ఫైల్ టీడీఆర్ ఆప్షన్ కనిపిస్తుంది.

టీడీఆర్ ఫైల్ చేసుకోవాలనుకున్న పీఎన్ఆర్ నంబర్, పేరు ఎంచుకోవాలి.

టీడీఆర్ ఫైల్ చేసేందుకు కావాల్సిన కారణాన్ని ఎంపిక చేసి సబ్మిట్ చేయాలి.

టీడీఆర్ కారణాన్ని బట్టి రైలు రద్దు, ఆలస్యం వంటి కారణాలకు 5-7 రోజుల్లో రీఫండ్ జమ చేస్తారు. ఇతర కారణాలు అయితే 30-60 రోజులు పట్టవచ్చు.