శ్రీవారి దర్శనానికి వచ్చే భక్తులకు 2 రోజుల పాటు దర్శనాలు రద్దు..
Andhra Pradesh Telugu | Suryaa Desk | Published : Sat, Jul 05, 2025, 03:17 PM
తిరుమల శ్రీవారి భక్తులకు బిగ్ అలర్ట్... తిరుమల శ్రీవారి దర్శనానికి వచ్చే భక్తులకు 2 రోజుల పాటు వీఐపీ బ్రేక్ దర్శనాలు రద్దు చేస్తున్నట్టుగా టీటీడీ తెలిపింది. ఇందుకు సంబంధించిన వివరాలు ఇలా ఉన్నాయి... తిరుమల శ్రీవారి ఆలయంలో జూలై 16న ఆణివార ఆస్థానం ఘనంగా నిర్వహించనున్నారు. ఈ పర్వదినాన్ని పురస్కరించుకుని జూలై 15న కోయిల్ ఆళ్వార్ తిరుమంజనం నిర్వహించనున్నట్టుగా టీటీడీ తెలిపింది. ఈ కారణంగా రెండు రోజుల పాటు వీఐపీ బ్రేక్ దర్శనాలు రద్దు చేస్తున్నట్టుగా వెల్లడించింది. జూలై 14, 15వ తేదిల్లో ప్రోటోకాల్ ప్రముఖులకు మినహా వీఐపీ బ్రేక్ దర్శనాలకు సిఫార్సు లేఖలు స్వీకరించబోమని తెలియజేసింది. ఈ విషయాన్ని దృష్టిలో పెట్టుకొని భక్తులు సహకరించాలని టీటీడీ విజ్ఞప్తి చేసింది. ఇదిలాఉంటే, తిరుమల శ్రీవారి దర్శనానికి నిత్యం వేలాది మంది భక్తులు తరలివస్తుంటారనే సంగతి తెలిసిందే. వీరికి ఎలాంటి అసౌకర్యం లేకుండా దర్శనం కల్పించేందుకు టీటీడీ చర్యలు తీసుకుంటూ ఉంటుంది. ఇక, శుక్రవారం (జూలై 4) రోజున తిరుమల శ్రీవారిని 70,011 మంది భక్తులు దర్శించుకున్నారు. 28,496 మంది భక్తులు తలనీలాలు సమర్పించనున్నారు. నిన్న శ్రీవారి హుండీ ఆదాయం రూ. 3.53 కోట్లుగా ఉంది. శనివారం తెల్లవారుజామున శ్రీవారి దర్శనం కోసం వేచి ఉన్న భక్తులతో కంపార్ట్ మెంట్లన్నీ నిండిపోయి ఎన్జీ షెడ్ల వరకు క్యూ లైన్ ఉంది. సర్వదర్శనం టోకెన్లు లేని భక్తులకు శ్రీవారి దర్శనానిని 24 గంటల సమయం పడుతుంది. వారాంతం కావడంతో తిరుమల కొండపై భక్తుల రద్దీ కొనసాగుతుంది.
|
|