తిరుమల శ్రీవారి .. అక్టోబర్ నెల దర్శన కోటా విడుదల తేదీలివే

తిరుమల శ్రీవారి భక్తులకు ముఖ్య గమనిక. తిరుమల శ్రీవారి అక్టోబర్ నెల దర్శనం కోటా షెడ్యూల్ వివరాలను తిరుమల తిరుపతి దేవస్థానం ప్రకటించింది. తిరుమల శ్రీవారి దర్శనం, గదుల కోటాను ఎప్పుడెప్పుడు ఆన్‌లైన్‌లో విడుదల చేస్తారనే వివరాలను వెల్లడించింది. అక్టోబర్ నెలకు సంబంధించి తిరుమల శ్రీవారి ఆర్జిత సేవా టికెట్లను జూలై 19న టీటీడీ విడుదల చేయనుంది. జూలై 19వ తేదీ ఉదయం 10 గంట‌ల‌కు టీటీడీ ఆర్జిత సేవా టికెట్లను ఆన్‍‌లైన్‌లో ఉంచుతుంది. ఈ సేవా టికెట్ల ఎలక్ట్రానిక్ డిప్ కోసం శ్రీవారి భక్తులు.. జూలై 21 ఉదయం 10 వరకు ఆన్‌లైన్‌లో నమోదు చేసుకోవచ్చు. ఈ టికెట్లు పొందిన భక్తులకు జూలై 21 నుంచి.. 23వ తేదీ మధ్యాహ్నం 12 గంటల వరకూ డబ్బులు చెల్లించే అవకాశం ఉంది. ఈ లోపు సొమ్ము చెల్లించిన భక్తులకు లక్కీడిప్‌లో టికెట్లు కేటాయిస్తారు.

మరోవైపు కల్యాణోత్సవం, ఆర్జిత బ్రహ్మోత్సవం, సహస్రదీపాలంకార సేవ, ఊంజల్ సేవ, వార్షిక పుష్పయాగం టికెట్లను జూలై 22న.. 10 గంటలకు టీటీడీ ఆన్‌లైన్‌లో ఉంచనుంది. అలాగే అదే రోజు మధ్యాహ్నం 3 గంటలకు తిరుమల శ్రీవారి వర్చువల్ సేవలు, దర్శన స్లాట్ల కోటాను టీటీడీ ఆన్‌లైన్‌లో విడుదల చేయనుంది. జూలై 23న ఉదయం 10 గంటలకు తిరుమల అంగప్రదక్షిణం టోకెన్ల కోటాను విడుదల చేస్తారు. అదే రోజు ఉదయం 11 గంటలకు శ్రీవాణి ట్రస్టు టికెట్ల ఆన్ లైన్ కోటాను విడుదల చేయనున్నారు.

మరోవైపు వ‌యోవృద్ధులు, దివ్యాంగులు, దీర్ఘకాలిక వ్యాధులతో బాధపడేవారికి శ్రీవారి దర్శనం ఉచితంగా కల్పిస్తున్న సంగతి తెలిసిందే. అక్టోబర్ నెలకు సంబంధించి ఈ కోటా టికెట్లను జూలై 23న మధ్యాహ్నం 3 గంట‌ల‌కు ఆన్‌లైన్‌లో ఉంచుతారు. తిరుమల అక్టోబర్ నెల రూ.300 ప్రత్యేక ప్రవేశ దర్శనం టికెట్ల కోటాను జూలై 24వ తేదీ ఉదయం 10 గంటలకు ఆన్‌లైన్‌లో విడుదల చేస్తారు.

అలాగే శ్రీవారి భక్తుల కోసం తిరుమల, తిరుపతిల‌లో గదుల కోటాను కూడా టీటీడీ ఆన్‌లైన్‌లో ఉంచుతోంది. అక్టోబర్ నెలకు సంబంధించి గదుల కోటాను.. జూలై 24న మధ్యాహ్నం 3 గంటలకు విడుదల చేయనున్నట్లు టీటీడీ తెలిపింది. శ్రీవారి భక్తులు అధికారిక వెబ్‌సైట్ అయిన https://ttdevasthanams.ap.gov.in ద్వారా టికెట్లు బుక్ చేసుకోవాలని టీటీడీ సూచించింది.