ఐఎంఎఫ్ నుంచి గీతా గోపీనాథ్ నిష్క్రమణ

అంతర్జాతీయ ఆర్థిక ప్రపంచంలో కీలక వ్యక్తిగా తనదైన ముద్ర వేసిన గీతా గోపీనాథ్.. అంతర్జాతీయ ద్రవ్య నిధి (ఐఎంఎఫ్)లో రెండవ అత్యున్నత పదవి అయిన డిప్యూటీ మేనేజింగ్ డైరెక్టర్ బాధ్యతల నుంచి వైదొలగనున్నారు. ఆగస్టు నెలాఖరుకు ఆమె ఐఎంఎఫ్‌‌‌‌‌‌‌‌‌‌ను వీడి.. తిరిగి ప్రతిష్టాత్మకమైన హార్వర్డ్ విశ్వవిద్యాలయానికి అధ్యాపకురాలిగా వెళ్లనున్నారు. ఆమె నిష్క్రమణ ఆర్థిక పరిశ్రమలో, విద్యా రంగంలో తీవ్ర చర్చకు దారితీసింది.

గీతా గోపీనాథ్ 2019లో ఐఎంఎఫ్ లో చీఫ్ ఎకానమిస్ట్‌గా చేరారు. ఈ కీలక పదవిని చేపట్టిన మొదటి మహిళగా ఆమె చరిత్ర సృష్టించారు. తన అసాధారణ ప్రతిభతో, విశ్లేషణాత్మక నైపుణ్యాలతో ఐఎంఎఫ్‌లో తనకంటూ ఒక ప్రత్యేక స్థానాన్ని సంపాదించుకున్నారు. 2022 జనవరిలో ఆమె ఫస్ట్ డిప్యూటీ మేనేజింగ్ డైరెక్టర్ (ఎఫ్‌డిఎం) గా పదోన్నతి పొందారు. గీతా గోపీనాథ్ ఫస్ట్ డిప్యూటీ ఎండీగా ఉన్నప్పుడే ప్రపంచ ఆర్థిక వ్యవస్థ.. కొవిడ్-19 మహమ్మారి, రష్యా-ఉక్రెయిన్ యుద్ధం వంటి అనేక సవాళ్లను ఎదుర్కొంది. ఈ కష్ట కాలంలో ఐఎంఎఫ్‌కు అసాధారణ మేధో నాయకత్వాన్ని అందించడంలో గీతా గోపీనాథ్ కీలక పాత్ర పోషించారని ఐఎంఎఫ్ మేనేజింగ్ డైరెక్టర్ క్రిస్టాలినా జార్జివా ప్రశంసించారు.

ఐఎంఎఫ్‌‌‌‌‌ను వీడాలనే నిర్ణయం గోపీనాథ్ సొంతమే అయినప్పటికీ.. ఈ పరిణామం ఐఎంఎఫ్‌లోని కొందరిని ఆశ్చర్య పరిచినట్లు తెలుస్తోంది. తన పదవీకాలంలో ఐఎంఎఫ్‌లో పని చేసిన అనుభవం అద్భుతమని గీతా గోపీనాథ్ కృతజ్ఞతలు తెలిపారు. అంతర్జాతీయ ఆర్థిక, స్థూల ఆర్థిక శాస్త్ర రంగాలలో తన పరిశోధనలను కొనసాగించడానికి, భవిష్యత్ ఆర్థికవేత్తలకు శిక్షణ ఇవ్వడానికి తాను విద్యా రంగానికి తిరిగి వెళ్లాలని కోరుకుంటున్నట్లు ఆమె వెల్లడించారు.

ఆమె నిష్క్రమణతో ఐఎంఎఫ్‌లో ఫస్ట్ డిప్యూటీ మేనేజింగ్ డైరెక్టర్ పదవికి వారసుడిని సిఫారసు చేయడానికి అమెరికా ట్రెజరీ విభాగానికి ఒక కొత్త అవకాశం లభిస్తుంది. ఈ పదవికి కొత్త నియామకం, ఐఎంఎఫ్ భవిష్యత్ విధానాలపై కూడా ప్రభావం చూపే అవకాశం ఉంది. గీతా గోపీనాథ్ రాక, నిష్క్రమణ ఆర్థిక ప్రపంచంలో ఆమెకున్న ప్రాముఖ్యతను మరోసారి చాటి చెప్పింది.