ఇలా నెలకు రూ. 15 వేలు పక్కనబెడితే చేతికి రూ. 1.5 కోట్లు!

మనం ఎంత సంపాదించామన్నది ముఖ్యం కాదు. డబ్బును ఎలా నిర్వహించగలుగుతున్నామనేదే ముఖ్యం. అవును.. డబ్బును పొదుపు చేయడం ముఖ్యం. ఇంకా దానిని మదుపు చేయడం ముఖ్యం. ఎక్కడ ఖర్చులు తగ్గించుకుంటున్నాం.. ఎక్కడ సంపద సృష్టిస్తున్నాం అనేది తెలుసుకోవాలని నిపుణులు సూచిస్తున్నారు. ఇందుకోసం చిన్న వయసు నుంచే మదుపు చేయాలని చెబుతున్నారు. చిన్న వయసు నుంచి పెట్టుబడులు పెడితేనే మలివయసులో ఇబ్బందుల్లేకుండా ఉండొచ్చని.. పిల్లలకు మంచి భవిష్యత్తు అందించొచ్చని అంటున్నారు.

ఇప్పుడు మీరు మీ పిల్లల ఉన్నత విద్య కోసం భవిష్యత్తులో రూ. 1.5 కోట్ల భారీ కార్పస్‌ను నిర్మించాలనే లక్ష్యం పెట్టుకున్నారా? ప్రస్తుతం మీరు రెండు లార్జ్ క్యాప్, ఫ్లెక్సీ-క్యాప్ ఫండ్స్‌లో నెలకు రూ. 15 వేలు సిప్ ద్వారా ఇన్వెస్ట్ చేస్తున్నారా? అయితే, మీరు సరిగ్గా పెట్టుబడి పెడుతున్నారా లేదా మెరుగైన రాబడి కోసం మీ పెట్టుబడులను మార్చుకోవాల్సిన అవసరం ఉందో లేదా అనేదానిపై నిపుణులు కీలక సూచనలు ఇచ్చారు.

గెయినింగ్ గ్రౌండ్ ఇన్వెస్ట్‌మెంట్ సర్వీసెస్ కో ఫౌండర్ రవి కుమార్ టీవీ అభిప్రాయం ప్రకారం, ఈక్విటీ ఫండ్స్‌లో క్రమపద్ధతిలో పెట్టుబడి పెట్టాలనే మీ నిర్ణయం చాలా మంచి ప్రారంభమే. అయితే, కేవలం నెలకు రూ. 15,000 సిప్‌తో 12 నుంచి 14 ఏళ్లలో రూ. 1.50 కోట్ల లక్ష్యాన్ని చేరుకోవడం కష్టం కావొచ్చు. ఇక్కడ రాబడి ఏటా సగటున 13 శాతం మించితేనే ఇది సాధ్యమని అంటున్నారు. నెలవారీ పెట్టుబడి పెంచండి: మీ లక్ష్యాన్ని చేరుకోవాలంటే, ముందుగా మీ నెలవారీ సిప్ మొత్తాన్ని పెంచడాన్ని పరిశీలించండి. రూ. 15 వేలు సరిపోకపోవచ్చు.

మీరు ప్రస్తుతం రెండు లార్జ్ క్యాప్, ఫ్లెక్సీ క్యాప్ ఫండ్స్‌లో పెట్టుబడి పెడుతున్నారు. అధిక వృద్ధి సామర్థ్యం కోసం, మీ లార్జ్-క్యాప్ ఫండ్స్‌లో ఒకదాన్ని మల్టీ-క్యాప్ ఫండ్‌తో మార్చొచ్చు. అలాగే.. మీ ఫ్లెక్సీ క్యాప్ ఫండ్స్‌లో ఒకదాన్ని మిడ్ క్యాప్ లేదా స్మాల్ క్యాప్ ఫండ్‌తో భర్తీ చేయొచ్చు. ఎందుకంటే, రానున్న పదేళ్లలో మిడ్ క్యాప్, స్మాల్ క్యాప్ ఫండ్స్‌లో అధిక వృద్ధికి అవకాశం ఉంటుంది. ఇక్కడ మీరు మీ పోర్ట్‌ఫోలియోలో 20 శాతం పెట్టుబడి పెట్టొచ్చు.

మ్యూచువల్ ఫండ్ ఎంచుకునేటప్పుడు మీ రిస్క్ తీసుకునే సామర్థ్యం, పెట్టుబడి పెట్టే కాలం, మీ ఆర్థిక లక్ష్యాలను బట్టి ఎంచుకోవాలి. పిల్లల విద్య దీర్ఘకాలిక లక్ష్యం కాబట్టి, కొంత రిస్క్ తీసుకోవడం ద్వారా మంచి రాబడులు ఆశించొచ్చు. షార్ట్ టర్మ్ మార్కెట్ హెచ్చుతగ్గులకు కంగారు పడకుండా, మీ ఆర్థిక లక్ష్యం వైపు మీ పోర్ట్‌ఫోలియో ఎలా పురోగమిస్తుందో ప్రతి సంవత్సరం సమీక్షించాలి. అవసరమైతే చిన్నచిన్న మార్పులు చేసుకోవచ్చు.

పెట్టుబడి అనేది ఒక దీర్ఘకాలిక ప్రక్రియ. దీనిలో ఓపికగా ఉండటం, సరైన సమయంలో సరైన నిర్ణయాలు తీసుకోవడం చాలా అవసరం. మార్కెట్ పరిస్థితులను ఎప్పటికప్పుడు గమనిస్తూ ఉండాలి. మీ పిల్లల భవిష్యత్తు కోసం సరైన పెట్టుబడులు పెట్టడం తల్లిదండ్రులుగా మీ బాధ్యత. సరైన మార్గంలో పెట్టుబడి పెట్టడం ద్వారా మంచి రాబడి పొంది, వారికి మంచి విద్యను అందించొచ్చు. అయితే, పెట్టుబడి పెట్టే ముందు అన్ని విషయాలను తెలుసుకోవడం, అవసరమైతే ఆర్థిక నిపుణుల సలహా తీసుకోవడం మంచిది.