భారతీయులు వద్దంటూ టెక్ కంపెనీలకు ట్రంప్ వార్నింగ్

 భారతీయులకు మరోసారి షాక్ తగిలింది. అమెరికా ప్రెసిడెంట్ డొనాల్డ్ ట్రంప్ .. తాజాగా చేసిన ప్రకటన దిగ్గజ కంపెనీల్లో ఉద్యోగం కోసం చూసే వారి ఆశల్ని ఆవిరి చేస్తుందని చెప్పొచ్చు. ట్రంప్ మరోసారి 'అమెరికా ఫస్ట్' నినాదాన్ని బలంగా వినిపించారు. ఇది భారతీయుల్ని గట్టి దెబ్బ కొట్టింది. గూగుల్, మైక్రోసాఫ్ట్ సహా ఇతర అమెరికా ప్రధాన కేంద్రంగా పనిచేసే దిగ్గజ టెక్ కంపెనీలు.. భారతీయుల్ని నియమించుకోవడం కాకుండా.. అమెరికన్లకే ఉద్యోగాలు ఇవ్వాలని.. అమెరికాపైనే ప్రధానంగా దృష్టి సారించాలని తీవ్ర హెచ్చరిక చేశారు. అంటే భారతీయుల్ని నియమించుకోవద్దంటూ వార్నింగ్ ఇచ్చారు.

బుధవారం రోజు.. వాషింగ్టన్‌ డీసీలో జరిగిన ప్రతిష్టాత్మక ఏఐ (ఆర్టిఫిషియల్ ఇంటెలిజెన్స్) సదస్సులో మాట్లాడిన ట్రంప్‌ ఈ వ్యాఖ్యలు చేశారు. ఆయన వ్యాఖ్యలు తీవ్ర చర్చనీయాంశంగా మారాయి. టెక్ కంపెనీల గ్లోబల్ మైండ్‌సెట్‌ను ట్రంప్ విమర్శించారు. అమెరికాలో లభిస్తున్న స్వేచ్ఛను అడ్డం పెట్టుకొని.. చాలా వరకు టెక్ కంపెనీలు ఇతర దేశాల్లోనే ఎక్కువగా పెట్టుబడులు పెడుతున్నాయని ఆగ్రహం వ్యక్తం చేశారు. చాలా మంది అమెరికన్లు .. ఈ కంపెనీలు తమను పట్టించుకోవడమే లేదన్న భావనలో ఉన్నట్లు పేర్కొన్నారు.

'అమెరికాలోని పెద్ద పెద్ద టెక్ సంస్థలు.. చైనాలో కంపెనీల్ని నిర్మిస్తూ.. భారతీయ ఉద్యోగుల్ని నియమించుకుంటున్నాయి. ఇక్కడి ప్రజల అవకాశాల్ని పట్టించుకోకపోవడం, నిర్లక్ష్యం చేయడం బాగా లేదు. ట్రంప్ పాలనలో ఇలా కుదరదు.' అని స్పష్టం చేశారు.

>> ఇంకా ఆర్టిఫిషియల్ ఇంటెలిజెన్స్ పోటీలో విజయం సాధించాలంటే.. సిలికాన్ వ్యాలీలో సరికొత్త దేశభక్తి అవసరని ట్రంప్ ఉద్ఘాటించారు. అమెరికాలోని టెక్ కంపెనీలు అమెరికా ప్రాధాన్యాల కోసమే పనిచేయాలని.. తమకే తొలి ప్రాధాన్యం ఇవ్వాలని కోరారు.

>> ఈ సందర్భంగా ఏఐ గురించి కీలకంగా మాట్లాడారు ట్రంప్. దేశంలో ఏఐ ఆవిష్కరణల్ని ప్రోత్సహించాలని, అభివృద్ధికి సహకరించాలని కోరారు. దానికి ఉన్న అడ్డంకుల్ని తొలగించి.. వృద్ధిని మరింత వేగవంతం చేయాలని అన్నారు. ప్రభుత్వ నిధులతో తయారయ్యే ఏఐ టూల్స్.. రాజకీయంగా తటస్థ వైఖరితో ఉండేలా చూడాలన్నారు.