చారిత్రక ఒప్పందంపై భారత్-యూకే సంతకాలు

భారత్- బ్రిటన్ మధ్య చారిత్రక ఒప్పందం కుదిరింది. స్వేచ్ఛా వాణిజ్య ఒప్పందం (FTA)కు సంబంధించి కీలక పరిణామం చోటు చేసుకుంది. ఈ చారిత్రక ట్రేడ్ డీల్‌పై ఇరు దేశాలు సంతకాలు చేశాయి. భారత ప్రధాన మంత్రి నరేంద్ర మోదీ, బ్రిటన్ ప్రధాన మంత్రి కీర్ స్టార్మర్ సమక్షంలో ఈ డీల్ పూర్తయింది. ఇరు దేశాల వాణిజ్య శాఖల మంత్రులు ఈ ట్రేడ్ డీల్ పై సంతకాలు చేశారు. ఈ ఒప్పందం ద్వారా ఇరు దేశాల మధ్య ద్వైపాక్షిక సంబంధాలు బలోపేతం కావడంతో పాటుగా రెండు దేశాల మధ్య ప్రతి సంవత్సరం 34 బిలియన్ డాలర్ల మేర వాణిజ్యం జరుగనుందన్న అంచనాలు ఉన్నాయి.

భారత్- బ్రిటన్ మధ్య స్వేచ్ఛా వాణిజ్య ఒప్పందం చర్చలు ముగిసినట్లు మే నెలలోనే ఇరు దేశాలు ప్రకటించిన సంగతి తెలిసిందే. 2030 నాటికి ఇరుదేశాల మధ్య 120 బిలియన్ డాలర్లకు పెంచడమే ఈ ట్రేడ్ డీల్ ముఖ్య ఉద్దేశంగా ఇరు దేశాలు తెలిపాయి. వస్తువులు, సేవలు, ఆవిష్కరణ, మేధో సంపత్తి హక్కులకు సంబంధించిన పలు అంశాలను ఈ డీల్‌లో పొందుపరిచారు. ఈ క్రమంలో ఈ స్వేచ్ఛా వాణిజ్యం ద్వారా టెక్స్ టైల్స్, జువెలరీ నుంచి మొదలుకుని ఐటీ రంగాల వరకు ఎలాంటి ప్రభావం ఉంటుందో తెలుసుకుందాం.

యూకేతో ఈ స్వేచ్ఛా వాణిజ్యం కుదరడం ద్వారా జెమ్స్, జువెలరీ, టెక్స్‌టైల్స్, సముద్ర ఉత్పత్తులు, లెదర్, ఫూట్ వేర్, స్పోర్ట్స్ గూడ్స్, బొమ్మల వంటి వాటి ఎగుమతులు పెరగనున్నాయి. వాణిజ్య శాఖ ప్రకటన ప్రకారం.. ఇంజినీరింగ్ ఉత్పత్తులు, ఆటో విడిభాగాలు, ఇంజనల్లు, ఆర్గానిక్ కెమికల్స్ ఎగుమతుల్లో సైతం వృద్ధి కనబడుతుందని అంచనా. భారతదేశ ఎగుమతులకు అన్యాయమైన పరిమితులను సృష్టించకుండా, వస్తువులు, సేవల స్వేచ్ఛా ప్రవాహాన్ని నిర్ధారించడానికి, సుంకాల అడ్డంకులను తగిన విధంగా పరిష్కరించాలని భారతదేశం నిర్ధారించిందని వాణిజ్య శాఖ తెలిపింది.

ఈ ట్రేడ్ డీల్ కుదరడం ద్వారా బ్రిటన్ మార్కెట్లను మరింత సమర్థవంతంగా వినియోగించుకునేందుకు అవకాశం కల్పిస్తుందని, ఎగుమతులను పెంచుతుందని, యూకేతో వాణిజ్య సంబంధాలను బలోపేతం చేస్తుందని జెమ్ అండ్ జువెలరీ ఎక్స్‌పోర్ట్ ప్రమోషన్ కౌన్సిల్ పేర్కొంది. యూకే ప్రస్తుతం వార్షికంగా 3 బిలియన్ డాలర్లు విలువైన జువెలరీ దిగుమతి చేసుకుంటోందని, అది భారత్ మంచి అవకాశంగా చెప్పుకొచ్చింది. ప్రస్తుతం భారత్ వాటా 15 శాతంతో 400 మిలియన్ డాలర్లుగా ఉందని పేర్కొంది.