షాపు మొత్తం ఊడ్చేశారు,,,డెలివరీ ఏజెంట్లలా వచ్చి దొంగతనం

ఫుడ్ డెలివరీ ఏజెంట్లుగా వచ్చిన ఇద్దరు వ్యక్తులు.. ఓ జ్యువెల్లరీ దుకాణంలో దొంగతనం చేశారు. ముఖానికి మాస్కులు, హెల్మెట్లు కూడా పెట్టుకుని లోపల వచ్చి.. అక్కడే పని చేస్తున్న వ్యక్తిని తుపాకీతో బెదిరించారు. ఆపై అక్కడుకున్న వెండి, బంగారు ఆభరణాలు, వస్తువులన్నీ తీసుకుని పారిపోయారు. ఇందుకు సంబంధించిన దృశ్యాలన్నీ సీసీటీవీ కెమెరాలో రికార్డు కాగా.. ప్రస్తుతం ఈ వీడియో నెట్టింట వైరల్ అవుతోంది. ఇది చూసిన ప్రతీ ఒక్కరూ ముక్కున వేలేసుకుంటున్నారు.

ఉత్తర్‌ ప్రదేశ్‌లోని ఘజియాబాద్‌లో గురువారం రోజు ఈ దొంగతనం జరిగింది. బ్రిజ్ విహార్ ప్రాంతంలోని మాన్సీ జ్యువెలర్స్ అనే నగల దుకాణంలో ఇద్దరు వ్యక్తులు చోరీకి పాల్పడ్డారు. ముఖ్యంగా ఫుడ్ డెలివరీ సంస్థలైన బ్లింకిట్, స్విగ్గీ బాయ్స్‌లా దుస్తులు ధరించి జ్యువెల్లరీ దుకాణంలోకి ప్రవేశించి భారీ దోపిడీకి పాల్పడ్డారు. ద్విచక్ర వాహనంపై వచ్చిన వీరిద్దరూ హెల్మెట్లతో పాటు ముఖం కనిపించకుండా మాస్కులు ధరించారు. గురువారం మధ్యాహ్నం సుమారు 3:30 గంటల సమయంలో జరిగిన ఈ ఘటన జరిగింది. అయితే అప్పుడు యజమాని భోజనం చేసేందుకు ఇంటికి వెళ్లగా.. దుకాణంలోకి చొరబడ్డ దొంగలు తుపాకీతో అక్కడ పని చేసే వ్యక్తిని బెదిరించారు.

నిమిషాల వ్యవధిలోనే 20 తులాల వెండి, 125 తులాల బంగారం చోరీ

ఆపై అక్కడున్న బంగారు, వెండి నగలు, వస్తువులను తమ వెంట తీసుకు వచ్చుకున్న బ్యాగులో వేసుకున్నారు. బ్యాగు మొత్తం నిండి.. దుకాణం అంతా ఖాళీ అయ్యాకా బయటకు వచ్చి బండిపైనే పారిపోయారు. ఆపై అక్కడే పని చేస్తున్న వ్యక్తి వెంటనే యజమానికి ఫోన్ చేసి విషయం చెప్పాడు. దీంతో అతడు లబోదిబోమంటూ అక్కడకు చేరుకుని సీసీటీవీ కెమెరాలు పరిశీలించాడు. ఆపై వెంటనే పోలీసులకు ఫిర్యాదు చేయగా.. కేవలం 15 నుంచి 20 నిమిషాల్లోనే పోలీసులు సంఘటనా స్థలానికి చేరుకున్నారు. కేసు నమోదు చేసుకుని దర్యాప్తు ప్రారంభించారు. సీసీటీవీ దృశ్యాల ఆధారంగా నిందితులను గుర్తించేందుకు ప్రయత్నిస్తున్నారు.

అయితే నిమిషాల వ్యవధిలోనే దొంగలు సుమారు 20 కిలో గ్రాముల వెండి, 125 గ్రాముల బంగారాన్ని దోచుకున్నారని దుకాణ యజమాని చెబుతున్నాడు. దొంగలను వెంటనే పట్టుకుని తన నగలు తనకు ఇప్పించాలని కోరుతున్నాడు. ప్రస్తుతం ఇందుకు సంబంధించిన వీడియో సోషల్ మీడియాలో వైరల్ అవుతుండగా.. అంతా ఆశ్చర్యం వ్యక్తం చేస్తున్నారు. మరీ ఇలాంటి బట్టల్లో వచ్చి దొంగతనం ఏంట్రా సామీ అంటూ కామెంట్లు చేస్తున్నారు.