గాల్లో ఉండగానే.. బాంబుతో విమానం పేల్చేస్తున్నానంటూ వ్యక్తి హల్‌చల్

ఆకాశంలో ప్రశాంతంగా వెళ్తున్న ఓ విమానంలో అనుకోని కలకలం రేగింది. లండన్ లూటన్ విమానాశ్రయం నుంచి గ్లాస్గోకు వెళ్తున్న ఈజీజెట్ విమానంలో ఒక వ్యక్తి ఆకస్మికంగా గట్టిగా అరవడం ప్రారంభించాడు. "నేను విమానాన్ని పేల్చేస్తాను" అంటూ బెదిరింపులకు పాల్పడ్డాడు. ఈ సంఘటనతో విమానంలోని ప్రయాణికులంతా ఒక్కసారిగా తీవ్ర భయబ్రాంతులకు గురయ్యారు. మరోవైపు స్పందించిన సిబ్బంది వెంటనే అతడి వద్దకు వచ్చి నచ్చజెప్పే ప్రయత్నం చేస్తుండగా.. బాంబు తీసి పేల్చేస్తానంటూ కేకలు పెట్టాడు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది.

విమానం గాల్లో ఉండగానే ఆ వ్యక్తి "నేను విమానాన్ని పేల్చేస్తాను" అని కేకలు వేయడంతో వేశాడో ప్రయాణికుడు. ముఖ్యంగా "అమెరికాకు మరణం, ట్రంప్‌కు మరణం" అంటూ నినాదాలు చేశాడు. అంతటితో ఆగకుండా అల్లాహు అక్బర్ అంటూ పదే పదే వ్యాఖ్యానించాడు. అతడు ఒక్కసారిగా లేచి గొడవ చేయడంతో.. తోటి ప్రయాణికులంతా తీవ్రంగా భయపడిపోయారు. అతడికి నచ్చజెప్పేందుకు ప్రయత్నించారు. కానీ అతడు మాత్రం అస్సలే ఒప్పుకోలేదు. మరింత రచ్చ చేశాడు. అప్పటికే అక్కడకు వచ్చిన సిబ్బంది సైతం అతడిని ఆపేందుకు ప్రయత్నించారు. కానీ అతడు మాత్రం రచ్చ చేస్తూనే ఉన్నాడు. దీంతో అక్కడే ఉన్న ఓ ప్రయాణికుడు ధైర్యం చేసి మరీ ఆ వ్యక్తిని కింద పడేశాడు. గట్టిగా చేతులు పట్టుకుని అలాగే ఆపేశాడు.

విమానం గ్లాస్గో విమానాశ్రయంలో దిగగానే.. పోలీసులు వెంటనే విమానం లోపలికి ప్రవేశించారు. అలజడి సృష్టించిన 41 ఏళ్ల ఆ వ్యక్తిని అరెస్ట్ చేశారు. అతనిప్పుడు పోలీసుల అదుపులోనే ఉన్నాడు. ప్రస్తుతం ఇందుకు సంబంధించిన వీడియోలు సోషల్ మీడియాలో వైరల్‌గా మారాయి. ఇవి చూసిన ప్రతీ ఒక్కరూ.. తమ మనసులోని భావాలను కామెంట్ల రూపంలో వెల్లడిస్తున్నారు. ముఖ్యంగా ఈ ఘటనపై తీవ్రంగా స్పందించిన కౌంటర్-టెర్రరిజం అధికారులు వైరల్‌గా మారిన వీడియోలను నిశితంగా పరిశీలిస్తున్నారు. సంఘటన వెనుక ఉద్దేశం ఏమిటి, అతని నేపథ్యం ఏమిటి అనే కోణంలో దర్యాప్తు చేస్తున్నారు.

ఈజీజెట్ విమానయాన సంస్థ ఈ ఘటనపై ఒక ప్రకటన విడుదల చేసింది. విమానంలో అలజడి రేగినప్పటికీ.. విమానం, ప్రయాణికుల భద్రతకు ఎటువంటి ప్రమాదం వాటిల్లలేదని వివరించింది. ప్రయాణికులు సహా సిబ్బంది అంతా సురక్షితంగా ఉన్నారని వారు స్పష్టం చేసింది. ప్రయాణికుడి తక్షణ స్పందన వల్ల పెద్ద ప్రమాదం తప్పిందని పలువురు ప్రయాణికులు అభిప్రాయపడ్డారు. ఇలాంటి సంఘటనలు విమాన ప్రయాణంలో ప్రయాణికులకు కలిగే భద్రతా ఆందోళనలను మరింత పెంచుతున్నాయి.