డాగ్ బాబు.. సన్నాఫ్ కుత్తా బాబు.. శునకానికి నివాస ధ్రువీకరణ పత్రం

బీహార్‌లో ప్రస్తుతం జరుగుతున్న ఓటరు జాబితా సవరణ ప్రక్రియ తీవ్ర వివాదాలకు దారి తీస్తున్న తరుణంలో.. ఓ విచిత్రమైన ఘటన చోటుచేసుకుంది. 'డాగ్ బాబు' అనే పేరుగల ఒక గోల్డెన్ రిట్రీవర్ జాతికి చెందిన కుక్కకు నివాస ధృవీకరణ పత్రం జారీ చేశారు. ఈ సంఘటన బీహార్ రాష్ట్రంలోనే కాకుండా దేశవ్యాప్తంగా కలకలం సృష్టింస్తోంది. ముఖ్యంగా సోషల్ మీడియాలో ఇందుకు సంబందించిన ధ్రువీకరణ పత్రం వైరల్‌గా మారింది.

బీహార్‌లోని మసౌర్హి డివిజన్‌లో ఈ ఘటన చోటు చేసుకుంది. ముఖ్యంగా ఈనెల 24వ తేదీతో ఉన్న నివాస ధ్రువీకరణ పత్రంలో శునకం పేరు 'డాగ్ బాబు'గా నమోదు చేశారు. అలాగే దాని తండ్రి పేరుగా 'కుత్తా బాబు', తల్లి పేరుగా 'కుతియా దేవి' అని ఉండగా అందరూ ఆశ్చర్య పోతున్నారు. అంతేకాదు ఈ సర్టిఫికేట్‌పై డిజిటల్ రూపంలో ఉండగా.. దానిపై రెవెన్యూ అధికారి సంతకం కూడా ఉండడం గమనార్హం. ఈ పత్రం బయటకు వచ్చిన కొద్ది నిమిషాల్లోనే.. సోషల్ మీడియాలో తెగ వైరల్ అయింది. అలా ఈ విషయం కాస్తా ఉన్నతాధికారుల దృష్టికి వెళ్లగా.. వెంటనే స్పందించిన అధికారులు ఈ సర్టిఫికేట్‌ను రద్దు చేశారు.

అలాగే ఈ వ్యవహారానికి సంబంధించి దరఖాస్తుదారు, కంప్యూటర్ ఆపరేటర్ సహా సర్టిఫికేట్ జారీ చేసిన అధికారిపైన కూడా కేసు నమోదు చేసినట్లు పట్నా జిల్లా యంత్రాంగం పేర్కొంది. ఈ ఘటనపై 24 గంటల్లోగా నివేదిక సమర్పించాలని మసౌర్హి సబ్-డివిజనల్ అధికారిని ఆదేశించినట్లు తెలిపింది. మరోవైపు తనిఖీలు చేయగా.. ధ్రువీకరణ పత్రంపై ఉన్న సంతకం రెవెన్యూ అధికారిదే అని తేలింది. ఇందులో ఆర్టీపీఎస్ కౌంటర్‌లో కూర్చున్న డేటా ఉద్యోగుల నిర్లక్ష్యం కూడా ఉందని బయటపడింది. సర్టిఫికేట్ నెంబర్‌ను పరిశీలించగా.. అది ఢిల్లీకి చెందిన ఓ మహిళకు సంబంధించినదిగా గుర్తించారు.

ఏది ఏమైనా రాష్ట్ర ప్రభుత్వం, స్థానిక అధికారుల తీరుపై ప్రతిపక్ష నేతలు ధ్వజమెత్తారు. మరీ ఇంత నిర్లక్ష్యంగా వ్యవహరిస్తారా అంటూ ప్రశ్నిస్తున్నారు. ముఖ్యంగా స్వరాజ్ పార్టీ నేత యోగేంద్ర యాదవ్ దీనిపై తీవ్ర ఆగ్రహం వ్యక్తం చేశారు. బాధ్యులు అందరిపై చర్యలు తీసుకోవాలని వెల్లడించారు. ఈ సంఘటన బీహార్ ఓటరు జాబితా సవరణ ప్రక్రియ చుట్టూ ఉన్న వివాదాలకు మరింత ఆజ్యం పోసింది. ఇప్పటికే ప్రతిపక్షాలు ఈ జాబితా సవరణను ఓటు హక్కులను నిరాకరించే కుట్రగా ఆరోపిస్తున్నాయి. ఇలాంటి వింత సంఘటనలు పరిపాలన వ్యవస్థలోని లోపాలను, పర్యవేక్షణ కొరతను ఎత్తిచూపుతున్నాయి.