‘సీజేఐ ఆఫీస్ అంటే పోస్టాఫీసు కాదు’ జస్టిస్ వర్మ కేసులో సుప్రీంకోర్టు తీవ్ర వ్యాఖ్యలు

అలహాబాద్ హైకోర్టు న్యాయమూర్తి జస్టిస్ యశ్వంత్ వర్మ వ్యవహారం సుప్రీంకోర్టు లో కొత్త మలుపు తిరిగింది. ఆయన ఇంట్లో భారీగా నోట్ల కట్టలు బయటపడిన వ్యవహారంపై సుప్రీంకోర్టు అంతర్గత కమిటీ అభిశంసనకు సిఫార్సు చేసిన విషయం తెలిసిందే. ఈ నివేదికను సవాల్ చేస్తూ జస్టిస్ వర్మ దాఖలు చేసిన పిటిషన్‌పై బుధవారం విచారణ జరిగింది. ఈ సందర్భంగా జస్టిస్ వర్మ తరఫున సీనియర్ న్యాయవాది కపిల్ సిబల్ వాదనలు వినిపిస్తూ.., సుప్రీంకోర్టు అంతర్గత విచారణ కమిటీకి న్యాయమూర్తిని తొలగించమనే అధికారం లేదన్నారు. ఇది కేవలం ప్రధాన న్యాయమూర్తికి సలహా ఇచ్చే శక్తివంతమైన వ్యవస్థ మాత్రమేనని స్పష్టం చేసిన సిబిల్.. భారత రాజ్యాంగంలోని ఆర్టికల్ 124, జడ్జెస్ (ఎంక్వైరీ) యాక్ట్‌ను ప్రస్తావించారు.

దీనిపై ధర్మాసనంలోని న్యాయమూర్తి జస్టిస్ దత్తా స్పందిస్తూ ‘‘సీజేఐ ఆఫీసు ఏమీ పోస్టాఫీసు కాదని, అది దేశానికి, న్యాయవ్యవస్థకు నాయకత్వం వహించే బాధ్యత కలిగిన పదవని’ ఉద్ఘాటించారు. ‘న్యాయమూర్తులపై ఏదైనా నిందారోపణలు వచ్చినప్పుడు, ప్రధాని, రాష్ట్రపతికి నివేదిక పంపించాల్సిన బాధ్యత సీజేఐకి ఉంటుందని’ స్పష్టం చేశారు. .

కమిటీ నివేదికపై జస్టిస్ వర్మ అభ్యంతరాలను నివేదించిన సిబల్.. ‘ఇది న్యాయపరమైన అంశం కాదు, రాజకీయ వ్యవహారంగా మారింది’ అన్నారు. అయితే ‘కమిటీ నివేదిక ప్రాథమికమైంది... ఇది భవిష్యత్ ప్రక్రియలపై ప్రభావం చూపదు’ ధర్మాసనం స్పష్టంగా చెప్పింది. అంతేకాదు, జస్టిస్ వర్మ నడతపై ధర్మాసనం సందేహం వ్యక్తం చేసింది: ‘మీ ప్రవర్తనపై విశ్వసనీయత లోపించినట్టు అనిపిస్తోంది.. మీకు వ్యతిరేకంగా నివేదిక గుర్తించిన వెంటనే మీరు సుప్రీంకోర్టుకు వచ్చారు’ అని వ్యాఖ్యానించింది.

అలాగే, కమిటీ ముందు ఎందుకు హాజరయ్యారని ప్రశ్నించగా.. ‘ఆ డబ్బు నాదే అని కమిటీ చెబితే నేను అంగీకరిస్తాను’ అని జస్టిస్ వర్మ తరఫున సిబల్ సమాధానం ఇచ్చారు. దీనికి ధర్మాసనం స్పందిస్తూ.. ‘‘ఆర్థిక మూలం ఏదో తేల్చడం కమిటీ పరిధిలోకి రాదు’’ అని స్పష్టం చేసింది. ‘మనమందరం రాజ్యాంగంలోని ఆర్టికల్ 141ను అనుసరించాలి.. ఇది సుప్రీంకోర్టు ప్రకటించే చట్టం దేశవ్యాప్తంగా ప్రతి కోర్టుకు వర్తిస్తుంది’ జస్టిస్ దత్తా అన్నారు. వాదనలు ముగించిన ధర్మాసనం.. చివరగా తీర్పును రిజర్వ్ చేసింది.