ఇంగ్లండ్ టీమ్‌తో పిచ్‌పైనే పిచ్ క్యూరేటర్ కబుర్లు,,,,,ఏకిపారేస్తున్న నెటిజన్లు

ఇంగ్లండ్ - ఇండియా ఐదో టెస్టుకు ముందే అగ్గి రాజేసుకుంది. ఓవల్ పిచ్ క్యూరేటర్ లీ ఫోర్టిస్, టీమిండియా హెడ్ కోచ్ గౌతమ్ గంభీర్ మధ్య వాగ్వాదం అందరికీ తెలిసిందే. లీ ఫోర్టిస్ అన్న మాటకి గౌతమ్ గంభీర్ కూడా అదే స్థాయిలో ఇచ్చి పడేశాడు. అయితే ఈ వివాదం రోజురోజుకూ ముదురుతూ వస్తోంది.. తాజాగా పిచ్ క్యూరేటర్, ఇంగ్లండ్ ప్లేయర్స్ ఫొటో ఒకటి నెట్టింట వైరల్ అవుతోంది.

మ్యాచ్‌కి ఒక్క రోజు ముందు బ్రెండన్ మెక్‌కల్లమ్, ఈసీబీ డైరెక్టర్ రాబ్ కీ, బెన్ స్టోక్స్‌ పిచ్‌ను దగ్గరుండి మరీ పరిశీలిస్తున్న ఫొటో ఒకటి ఇప్పుడు నెట్టింట వైరల్‌గా మారింది. వాళ్లంతా కూడా పిచ్ ఎడ్జ్ మీదే ఉండి మరీ పరిశీలిస్తున్నారు. అక్కడ స్టోక్స్ నవ్వుతూ ఉండగా.. పిచ్ క్యూరేటర్ నిల్చొని ఉన్నాడు.

ఓవల్ స్టేడియంలో టీమిండియా ప్లేయర్లు మంగళవారం నెట్ ప్రాక్టీస్ చేస్తున్న సమయంలో లీ ఫోర్టిస్ వచ్చి బ్యాటర్ మినహా మిగతా వారంతా వికెట్‌కు 2.5 మీటర్ల దూరంలో ఉండాలని చెప్పాడు. మరి ఈ ఫొటోలో వాళ్లంతా 2.5 మీటర్ల దూరంలో ఉన్నారా? అంటూ లీ ఫోర్టిస్‌ను టార్గెట్ చేస్తూ నెటిజన్లు కామెంట్స్ చేస్తున్నారు.

టీమిండియా ప్రాక్టీస్ చేస్తున్న సమయంలో లీ ఫోర్టిస్ దూరంగా వెళ్లాలని చెప్పడంతో గంభీర్ ఒక్కసారిగా ఆగ్రహానికి గురయ్యాడు. టీమిండియాకు నువ్వేం చెప్పాల్సిన అవసరం లేదు.. ఏం చేయాలో మాకు తెలుసు అంటూ గట్టిగానే ఇచ్చేశాడు. ఆ తర్వాత కూడా లీ ఫోర్టిస్ ఏదో మాట్లాడుతుండటంతో కావాలంటే మీ అధికారులకు ఫిర్యాదు చేస్కో పో అంటూ గంభీర్ వార్నింగ్ ఇచ్చేశాడు.

మరి నిన్న గంభీర్‌తో ఆ రేంజ్‌లో గొడవ పడిన పిచ్ క్యూరేటర్.. ఈ రోజు ఇంగ్లండ్ టీమ్ పిచ్ దగ్గరికి వచ్చినప్పుడు ఏమైందంటూ నెటిజన్లు నిలదీస్తున్నారు. పిచ్ క్యూరేటర్ డబుల్ గేమ్ ఆడుతూ.. భారత జట్టను కావాలనే రెచ్చగొట్టే ప్రయత్నం చేస్తున్నాడంటూ మరికొందరు మండిపడుతున్నారు.

పిచ్ క్యూరేటర్ తీరుపై టీమిండియా బ్యాటింగ్ కోచ్ సితాన్షు కోటక్ కూడా నివ్వెరపోయాడు. వికెట్‌కు 2.5 మీటర్ల దూరంలో నిల్చోండి, రోప్ బయటకు వెళ్లండంటూ గ్రౌండ్ స్టాఫ్ వచ్చి చెప్పడం తన కెరీర్‌లోనే ఇప్పటి వరకు చూడలేదన్నారు. జట్టు సభ్యులు ఎవరూ కూడా స్పైక్స్ ధరించలేదని, మరి అలాంటప్పుడు పిచ్ ఎలా పాడవుతుందని ఆయన సూటిగా ప్రశ్నించారు.

"నిన్న ఏదైతే జరిగిందో అది అస్సలు సరైనది కాదు. మేం వికెట్‌ను పరిశీలించడం ఇదేం మొదటిసారి కాదు. రెండు నెలల నుంచి మేం ఇక్కడే ఉంటున్నాం. దీనికి ముందు నాలుగు టెస్టు మ్యాచ్‌లు ఆడాం. కానీ ఎక్కడా ఇలాంటి సంఘటన ఎదురు కాలేదు. కోచ్‌కి అన్ని హక్కులు ఉంటాయి. వికెట్‌ను చూడటం, పిచ్‌ను పరిశీలించడం.. కానీ క్యూరేటర్ ఎందుకు ఇలా చేశాడో" అని టీమిండియా కెప్టెన్ శుభమన్ గిల్ అన్నాడు.