ఆంధ్రప్రదేశ్ మరో ఘనత.. కర్ణాటక తర్వాత దేశంలో రెండో ప్లేసు మనదే

ఆంధ్రప్రదేశ్ ప్రభుత్వం మరో ఘనత సాధించింది. సత్వర న్యాయం, పటిష్టమైన పోలీసింగ్‌లో ఆంధ్రప్రదేశ్ దేశంలోనే రెండో స్థానంలో నిలిచింది. ఈ మేరకు ఇండియా జస్టిస్ రిపోర్టు 2025 వెల్లడించింది. ప్రజలకు వేగంగా న్యాయ సహాయం అందించటంలో, శాంతిభద్రతల్లో ఆంధ్రప్రదేశ్ మెరుగైన పనితీరును కనబరిచినట్లు నివేదిక వెల్లడించింది. రాష్ట్రంలో పోలీసింగ్, శాంతిభద్రతలు, న్యాయవ్యవస్థ పనితీరు వంటి అంశాలను పరిగణనలోకి తీసుకుని ఇండియా జస్టిస్ రిపోర్టు 2025 రూపొందించారు. ఇక ఈ రిపోర్టులో 6.78 స్కోర్‌తో కర్ణాటక తొలిస్థానంలో నిలవగా.. 6.32 స్కోర్‌తో ఏపీ రెండో స్థానంలో నిలిచింది. తెలంగాణ మూడో స్థానంలో ఉంది.

మరోవైపు ఆంధ్రప్రదేశ్ ప్రభుత్వం మహిళల భద్రత కోసం ప్రత్యేక చర్యలు చేపడుతోంది. అందులో భాగంగా అంతర్జాతీయ మహిళా దినోత్సవం సందర్భంగా శక్తి యాప్ అందుబాటులోకి తీసుకువచ్చింది. మహిళలు ఆపదలో చిక్కుకున్నప్పుడు, అత్యవసర సమయాల్లో ఈ శక్తి యాప్ ద్వారా పోలీసులు సహాయం వెంటనే పొందేందుకు వీలవుతుంది. ఈ శక్తి యాప్‌లో ఫిర్యాదు చేయడం, లైవ్ ట్రాకింగ్, పోలీసులను అలర్ట్ చేయడం వంటి అంశాలు ఉన్నాయి. అంతేకాదు శక్తి యాప్ రాష్ట్రంలోని అన్ని పోలీస్ స్టేషన్లతో అనుసంధానమై ఉంటుంది. దీనితో పాటుగా జిల్లాలలో శక్తి బృందాలు ఏర్పాటు చేశారు. ఈ శక్తి బృందాలు కాలేజీలు, బస్టాండులు, పార్కుల వంటి ప్రదేశాల్లో సంచరిస్తూ అమ్మాయిలను వేధించే ఈవ్ టీజర్లు, పోకిరీల పనిబడుతూ ఉంటాయి. అలాగే సఖి నివాస్ కేంద్రాలను కూడా ఏర్పాటు చేస్తున్నారు.

  అలాగే సాంకేతిక వినియోగం ద్వారా నేరాలను అరికట్టడంతో పాటుగా నేరస్థులను పట్టుకోవటంలో ఏపీ పోలీసులు మెరుగైన పనితీరు కనబరుస్తున్నారు. మారుమూల ప్రాంతాల్లో డ్రోన్లను ఎగరవేస్తూ అసాంఘిక శక్తుల పని పడుతున్నారు. డ్రగ్స్ రవాణా, గంజాయి స్మగ్లింగ్, జూదం, పేకాట వంటి అసాంఘిక కార్యకలాపాలకు శివారు ప్రాంతాలు అడ్డాగా మారుతున్నాయి.

ఈ నేపథ్యంలో అలాంటి అనుమానిత ప్రాంతాలలో డ్రోన్లను ఎగరవేస్తూ వారి ఆట కట్టిస్తున్నారు. అలాగే సీసీ కెమెరాల ఏర్పాటుతో అనుక్షణం నిఘా ఉండేలా చర్యలు తీసుకుంటున్నారు. అలాగే కుటుంబాలలో ఏవైనా సమస్యలు ఉంటే కౌన్సిలింగ్ ద్వారా సర్ది చెప్పే ప్రయత్నం చేస్తున్నారు. వీటితో పాటుగా ఈగల్ టీమ్ ద్వారా గంజాయి స్మగ్లర్ల ఆట కట్టిస్తున్నారు.