దేశంలోనే అత్యంత పొడవైన గూడ్స్ రైలు.. 354 వ్యాగన్లు.. 7 ఇంజిన్లు

భారతీయ రైల్వే అరుదైన రికార్డ్ క్రియేట్ చేసింది. దేశంలోనే అతి పొడవైన గూడ్స్ రైలును రైల్వే శాఖ ప్రారంభించింది. సుమారు 4.5కిలోమీటర్ల పొడవున్న ఈ రైలు పేరు రుద్రాస్త్ర. ఆగస్టు 7న ఈ రైలు పట్టాలపై పరుగులు తీసింది. సరకు రవాణా సామర్థ్యం పెంచడమే దీని లక్ష్యం. తూర్పు మధ్య రైల్వే పరిధిలోని పండిట్ దీన్ దయాళ్ ఉపాధ్యాయ్ (డీడీయూ) డివిజన్ దీన్ని విజయవంతంగా నడిపింది. రుద్రాస్త్ర రైలును గంజ్ కవాజా స్టేషన్ నుంచి పరుగులు తీయించారు. ఇది గర్హ్వా రోడ్ స్టేషన్ వరకు అనగా 200 కిలోమీటర్ల దూరం ప్రయాణించింది. ఈ దూరాన్ని 5 గంటల్లో చేరుకుంది. ఈ రైలు పొడవు దాదాపు 4.5 కిలోమీటర్లు. భారతీయ రైల్వే చరిత్రలో ఇంత పొడవైన సరకు రవాణా రైలు పట్టాలపై పరుగులు తీయడం ఇదే మొదటిసారి.

కేంద్ర రైల్వే శాఖ మంత్రి అశ్వినీ వైష్ణవ్ ఈ వీడియోను తన ‘ఎక్స్’ ఖాతాలో షేర్ చేశారు. ఈ సందర్భంగా ఆయన మాట్లాడుతూ.. ఇది దేశంలోనే అత్యంత పొడవైన రైలు అన్నారు. ఈ ట్రైన్‌ను ఆరు ఖాళీ బాక్సన్ ర్యాక్‌లను కలిపి తయారు చేశారు. ఇందులో మొత్తం 354 వ్యాగన్‌లు ఉన్నాయి. దీనిని నడపడానికి ఏడు ఇంజిన్లను ఉపయోగించారు. సగటున గంటకు 40 కిలోమీటర్ల వేగంతో ఈ రైలు ప్రయాణించింది.

రుద్రస్త రైలు వల్ల సరకు రవాణాలో వేగం, సామర్థ్యం పెరుగుతుందని రైల్వే అధికారులు తెలిపారు. ఈ ఆరు సరుకు రవాణా రైళ్లను విడివిడిగా నడిపితే.. సమయం, ఖర్చు అధికమవుతాయి. విడివిడిగా నడిపితో ఇందుకోసం దీనికి వేర్వేరు సమయాలు, సిబ్బంది, మార్గాలు అవసరమవుతాయి. అదే వీటన్నింటిని కలిపి రుద్రాస్త్రగా కలిపి నడపడం వల్ల సమయం ఆదా అవుతుంది. దీని ద్వారా మరిన్ని రైళ్లను నడపడానికి అవకాశం ఉంటుందని ఈస్ట్ కోస్ట్ రైల్వే తెలిపింది.

ఇది మొదట డెడికేటెడ్ ఫ్రైట్ కారిడార్ (డీఎఫ్‌సీ)పై నడిచింది. తరువాత భారతీయ రైల్వేల సాధారణ ట్రాక్‌లో గర్హ్వా రోడ్ వైపు దాని వేగంతో కదిలింది. ఇక డీడీయూ డివిజన్ విషయానికి వస్తే.. ఇది భారతీయ రైల్వేలలో ఒక ముఖ్యమైన కేంద్రం. ఇక్కడ నుంచి ధన్‌బాద్ డివిజన్‌కు బొగ్గు, ఇతర వస్తువులను రవాణా చేస్తారు. అలానే ఈ డివిజన్‌లో గూడ్స్ రైళ్ల కోచ్‌లను తనిఖీ చేయడం, మరమ్మతు చేయడం వంటి కార్యక్రమాలు పెద్ద ఎత్తున నిర్వహిస్తారు. ఇక్కడ కోచ్‌లను మొదట మరమ్మతులు చేస్తారు. ఆ తర్వాత రెడీ చేసిన కోచ్‌లను అన్నింటిని కలిపి రైలును లోడింగ్ కోసం పంపుతారు.