టమాటా రేట్లపై కేంద్రం గుడ్ న్యూస్.. అక్కడ భారీగా సబ్సిడీ

వర్షాకాలం వచ్చిందంటే చాలు కూరగాయల రేట్లు.. సామాన్యులకు కన్నీళ్లు తెప్పిస్తుంటాయి. మరీ ముఖ్యంగా వంటల్లో అధికాంగా వాడే టమాటా, ఉల్లిపాయ ధరలు కొండెక్కుతాయి. వానలు, పంటలకు తెగుళ్లు, దిగుబడి తగ్గిపోవడం, రవాణా నిలిచిపోవడం కారణాలు ఏవైనా సరే కూరగాయల ధరలు పైపైకి చేరి జనాలను భయపెడుతుంటాయి. గత రెండేళ్లుగా వర్షాకాలంలో టమాటా, ఉల్లి ధరలు సామాన్యులను బెంబేలెత్తించాయి. టమాటా పండించిన రైతులు లక్షాధికారులు అయితే.. కొనే సామాన్యులు మాత్రం వామ్మో టమాటా అని భయపడ్డారు. ఆ స్థాయిలో రేట్లు పెరిగాయి. ఇక ఈ ఏడాది మరి అంత కాకపోయినా.. కూరగాయాల ధరలు కాస్త ఎక్కువగానే ఉన్నాయి. దీంతో కేంద్ర ప్రభుత్వం సామాన్యులకు ఊరట కలిగించేందుకు రెడీ అవుతోంది. టమాటా ధర మీద భారీగా సబ్సిడీ ప్రకటించింది. ఆ వివరాలు.

దేశ రాజధాని ఢిల్లీలో టమాటా ధరలు మండిపోతున్నాయి. సామాన్యులపై భారం పడకుండా ఉండేందుకు.. తక్కువ ధరకే టమాటాలు అందించేందుకు కేంద్ర ప్రభుత్వం చర్యలు చేపట్టింది. నేషనల్ కోఆపరేటివ్ కన్జూమర్స్ ఫెడరేషన్ (NCCF) ద్వారా టమాటాలపై భారీ సబ్సిడీ ప్రకటించింది. దీంతో దేశ రాజధాని ఢిల్లీలో కిలో టమాటా 47 నుంచి 60 రూపాయల మధ్య అందించనున్నట్లు కేంద్రం తెలిపింది. భారీ వర్షాల కారణంగా పంట నష్టం వాటిల్లడంతో టమాటా ధరలు పెరిగాయి. ప్రజలకు ఊరట కలిగించేందుకు కేంద్రం ఈ నిర్ణయం తీసుకుంది.

NCCF ఇప్పటివరకు 27, 300 కిలోల టమాటాలను సబ్సిడీ ధరలకు అమ్మినట్లు వినియోగదారుల వ్యవహారాల మంత్రిత్వ శాఖ వెల్లడించింది. ఆగస్టు 4 నుంచి కేంద్రం టమాటా ధరలపై సబ్సిడీ అమలు చేస్తోంది. దీని కోసం అజాపూర్ మండి నుంచి టమాటాలను కొనుగోలు చేస్తున్నారు. వాటిని ప్రజలకు 47 నుంచి 60 రూపాయలకు అందిస్తున్నారు. అయితే ఢిల్లీలో బహిరంగ మార్కెట్‌లో సగటున కిలో టమాటా ధర 73 రూపాయలుగా ఉంది.

ఉత్తర, పశ్చిమ ఢిల్లీ ప్రాంతాల్లో భారీ వర్షాల వల్ల పంటలు దెబ్బతిన్నాయి. దీని కారణంగా టమాటా దిగుబడి తగ్గిపోయింది. జులై చివరి వారంలో ఈ ధరలు మరింత పైకి చేరాయి. ఏకంగా కిలో టమాటా ధర 85 రూపాయలకు చేరింది. టమాటా ధరలు విపరీతంగా పెరగడంతో సామాన్యులు తీవ్రంగా ఇబ్బంది పడుతున్నారు. కొనాలంటేనే భయపడుతున్నారు. ఈక్రమంలో కేంద్ర ప్రభుత్వం సామాన్య ప్రజలకు ఉపశమనం కలిగించేందుకు NCCF ద్వారా సబ్సిడీ రేటలకు టమాటాలు అమ్ముతోంది

శుక్రవారం (ఆగస్టు 08) నాటికి ముంబైలో కిలో టమాటా 58 రూపాయలు, చెన్నైలో 50 రూపాయలుగా ఉంది. ఇక అదే మన తెలుగు రాష్ట్రాల విషయానికి వస్తే.. హైదరాబాద్‌లో కిలో టమాటా ధర 34 నుంచి 40 రూపాయల మధ్యధర ఉంది. దేశ వ్యాప్తంగా సగటున కిలో టమాటా ధర 52 రూపాయలు కాగా, గత ఏడాది ఇది 54 రూపాయలుగా ఉంది. 2023లో సగటు ధర 136 రూపాయలకు చేరింది. అయితే ఈసంవత్సరం ఇప్పటి వరకు కూడా టమాటా ధరలు అదుపులోనే ఉన్నాయని మంత్రిత్వ శాఖ పేర్కొంది. అయినా సరే సామాన్యులపై ఆర్థిక భారం పడకుండా చూడటం కోసం టమాటాపై భారీగా సబ్సిడీ ఇచ్చినట్లు ప్రకటించింది.