సూర్యలంక బీచ్‌కు మహర్దశ.. ఎలక్ట్రికల్ మినీ బస్సులు, బ్యాటరీ వాహనాలు

రాష్ట్రంలో పర్యాటక రంగం అభివృద్ధి కోసం ఏపీ ప్రభుత్వం అనేక చర్యలు తీసుకుంటోంది. అందులో భాగంగానే ఎయిర్‌డ్రోమ్‌ల అభివృద్ధి, హోమ్‌స్టేల నిర్మాణం, కారవాన్ టూరిజం వంటి సరికొత్త ఆలోచనలు చేస్తోంది. అలాగే రాష్ట్రంలో అడ్వెంచర్ టూరిజం, టెంపుల్ టూరిజం, ఎకో టూరిజం అభివృద్ధి చేసేందుకు ఉన్న అవకాశాలపై ప్రత్యేక దృష్టి సారించింది. ఈ క్రమంలోనే రాష్ట్రంలో ఉన్న పొడవైన సముద్రతీరాన్ని పర్యాటక రంగం అభివృద్ధి కోసం ఉపయోగించుకోవాలని ప్రభుత్వం భావిస్తోంది. సముద్ర తీరం వెంట ఉన్న దర్శనీయ ప్రాంతాలు, సముద్ర తీరాల అభివృద్ధి మీద ఫోకస్ పెట్టింది. ఈ క్రమంలోనే బాపట్ల జిల్లా సూర్యలంక బీచ్‌కు త్వరలోనే మహర్దశ పట్టనుంది.

సూర్యలంక బీచ్ ‌ అభివృద్ధి కోసం ఆంధ్రప్రదేశ్ ప్రభుత్వం ప్రత్యేక కార్యాచరణ ప్రణాళిక సిద్ధమైంది. కేంద్ర ప్రభుత్వం సహకారంతో సూర్యలంక బీచ్‌ను అన్నిరకాలుగా అభివృద్ధి చేయాలని నిర్ణయించింది. ఇందులో భాగంగా కేంద్ర పథకమైన స్వదేశీ దర్శన్‌ 2.0 కింద సూర్యలంక బీచ్‌ను అభివృద్ధి చేయనున్నారు. స్వదేశీ దర్శన్ 2.0 కార్యక్రమం కింద సూర్యలంక బీచ్ అభివృద్ధికి రూ.98 కోట్లు మంజూరు అయ్యాయి. దీంతో బీచ్ అభివృద్ధి కోసం సమగ్ర ప్రాజెక్టు నివేదిక కూడా రూపొందించారు. తొలిదశలో రూ.50 కోట్ల పనులకు టెండర్లు పిలిచిన అధికారులు.. త్వరలోనే కాంట్రాక్టర్లకు పనులు అప్పగించనున్నారు. పనులన్నీ సకాలంలో పూర్తి అయితే సూర్యలంక బీచ్ రూపురేఖలు మారిపోనున్నాయి.

స్వదేశీ దర్శన్ కింద మంజూరైన 98 కోట్ల రూపాయల నిధులతో సూర్యలంక బీచ్‌కు ఇరువైపులా స్వాగత ద్వారాలు ఏర్పాటు చేస్తారు. అలాగే కార్లు, బస్సులు, బైకుల కోసం పార్కింగ్ సౌకర్యాలు అభివృద్ధి చేయనున్నారు. సముద్ర తీరంలో కమర్షియల్ కాంప్లెక్స్ నిర్మించి షాపులు ఏర్పాటు చేయనున్నారు. అలాగే సైక్లింగ్‌ ట్రాక్‌ నిర్మాణం చేపట్టనున్నారు. పాదచారుల కోసం వాకింగ్ ట్రాకులు.. బీచ్ చూడటానికి వచ్చే పర్యాటకుల కోసం రిసార్టులు, వ్యూపాయింట్‌లు నిర్మించనున్నారు.

అలాగే సూర్యలంక బీచ్‌‌లో సీసీ టీవీ కెమెరాలు ఏర్పాటు చేసి పటిష్టమైన భద్రతాఏర్పాట్లు చేయనున్నారు. డస్ట్‌బిన్‌ల ద్వారా చెత్త సేకరణ, రెండు ఎలక్ట్రికల్ మినీ బస్సులు, బ్యాటరీ వాహనాలు అందుబాటులో ఉండనున్నాయి. కార్లు, ఫోర్ వీలర్స్ కోసం 5 ఛార్జింగ్‌ స్టేషన్లు, ద్విచక్ర వాహనాల కోసం 3 ఛార్జింగ్‌ స్టేషన్లు ఏర్పాటు చేయాలని అధికారులు ప్రణాళికలు రచిస్తున్నారు.