రతన్ టాటా ఉండి ఉంటే ఇంత ఆలస్యమయ్యేది కాదు..: యూఎస్ లాయర్

అహ్మదాబాద్‌లో జరిగిన ఎయిర్ ఇండియా ఏఐ-171 విమాన ప్రమాద బాధితులకు సాయం అందించడంలో జరుగుతున్న ఆలస్యంపై అమెరికాకు చెందిన ప్రముఖ లాయర్ తీవ్ర ఆగ్రహం వ్యక్తం చేశారు. ఈ కేసులో 65 కుటుంబాలకు ప్రాతినిధ్యం వహిస్తున్న ప్రముఖ న్యాయవాది మైక్ ఆండ్రూస్.. భారతీయ ప్రముఖ పారిశ్రామికవేత్త, టటా గ్రూప్ మాజీ ఛైర్మన్ రతన్ టాటా బతికి ఉండి ఉంటే ఇలాంటి జాప్యం జరిగేది కాదని వ్యాఖ్యానించారు. రతన్ టాటా మానవత్వం, ఉద్యోగుల పట్ల ఆయన చూపిన ప్రేమ, శ్రద్ధలను ఆండ్రూస్ ఈ సందర్భంగా ప్రశంసించారు. ఆయన ఉన్నప్పుడు ఇలాంటి అధికారిక అడ్డంకులు ఉండేవి కావని పేర్కొన్నారు.

అధికార వర్గాల నుంచి ఈ ఆలస్యం జరుగుతోందని మైక్ ఆండ్రూస్ ఆరోపించారు. ప్రమాదంలో తన ఏకైక కుమారుడిని కోల్పోయి.. ఇప్పుడు మంచానికే పరిమితమైన ఒక వృద్ధురాలిని ఆయన ఉదాహరణగా ప్రస్తావించారు. ఆమెకు ఇప్పటికీ పరిహారం అందలేదని, దీని వల్ల ఆమె జీవితం మరింత కష్టతరంగా మారిందని ఆవేదన వ్యక్తం చేశారు. బాధితుల కుటుంబాలకు న్యాయం అందించడంలో జరుగుతున్న జాప్యం, వారి పట్ల ప్రభుత్వ, సంస్థల నిర్లక్ష్యాన్ని సూచిస్తుందని ఆయన విమర్శించారు.

ఈ ప్రమాదంలో బాధితులకు న్యాయం కల్పించేందుకు ఉన్న చట్టపరమైన మార్గాలను కూడా ఆండ్రూస్ వివరించారు. విమానంలోని FADEC వ్యవస్థ వంటి సాంకేతిక లోపాల వల్లే ప్రమాదం జరిగిందని విచారణలో తేలితే.. అమెరికాలో తయారీదారుపై ప్రొడక్ట్ లయబిలిటీ క్లెయిమ్ దాఖలు చేయవచ్చని ఆయన తెలిపారు. ఒకవేళ ఈ ప్రమాదానికి ఎయిర్ ఇండియాయే పూర్తి బాధ్యత వహించాల్సి వస్తే.. మాంట్రియల్ కన్వెన్షన్ నిబంధనల ప్రకారం పరిహారం క్లెయిమ్ చేయవచ్చని వివరించారు.

ఎయిర్ ఇండియా ఇప్పటికే 147 మంది బాధితుల కుటుంబాలకు మధ్యంతర పరిహారం కింద రూ.25 లక్షలు విడుదల చేసిందని, అయితే టాటా గ్రూప్ ఏర్పాటు చేసిన 'ది ఏఐ-171 మెమోరియల్ అండ్ వెల్ఫేర్ ట్రస్ట్' ద్వారా ఒక్కో మరణానికి రూ.1 కోటి ఎక్స్‌గ్రేషియా చెల్లించేందుకు హామీ ఇచ్చిందని ఈ సందర్భంగా ఆయన గుర్తు చేశారు. లాయర్ చేసిన ఈ వ్యాఖ్యలు ప్రస్తుతం నెట్టింట తెగ వైరల్ అవుతున్నాయి. ముఖ్యంగా విపత్కర పరిస్థితుల్లో బాధితులకు సరైన సమయంలో న్యాయం, సహాయం అందించడంలో మంచిదని నెటిజెన్లు అభిప్రాయం వ్యక్తం చేస్తున్నారు. చూడాలి మరి లాయర్ చేసిన ఈ వ్యాఖ్యలపై సదరు సంస్థ స్పందిస్తుందా.. మాటలు చెప్పుకండా వెంటనే సాయిం అందిస్తుందా అనేది.