ఏపీలో మరో గ్రీన్‌ఫీల్డ్ ఎక్స్‌ప్రెస్ వే.... 12 చోట్ల అండర్‌పాస్‌లు

ఆంధ్రప్రదేశ్‌లో మౌలిక వసతులకు సంబంధించిన ప్రాజెక్టుల నిర్మాణం వేగంగా జరుగుతోంది. ఈ క్రమంలోనే.. చెన్నై బెంగళూరు ఎక్స్‌ప్రెస్ వే నిర్మాణానికి సంబంధించి కీలక అప్‌డేట్ వచ్చింది. రూ.17,930 కోట్ల వ్యయంతో చెన్నై - బెంగళూరు ఎక్స్‌ప్రెస్ వే నిర్మాణానికి ప్రణాళికలు రచించిన సంగతి తెలిసిందే. మొత్తం 258 కిలోమీటర్ల మేరకు ఈ ఎక్స్‌ప్రెస్ వే నిర్మాణం జరగనుంది. అయితే చెన్నై - బెంగళూరు ఎక్స్‌ప్రెస్ వే.. చిత్తూరు జిల్లాలోని పలమనేరు మీదుగా వెళ్తున్న సంగతి తెలిసిందే. పలమనేరు అడవి మీదుగా ఎక్స్‌ప్రెస్ వే నిర్మాణం జరుగుతోంది. చెన్నై - బెంగళూరు ఎక్స్‌ప్రెస్ వే నిర్మాణంలో భాగంగా.. చిత్తూరు నుంచి కర్ణాటక రాష్ట్ర సరిహద్దుల వరకూ 65 కిలోమీటర్ల మేరకు పనులు జరుగుతున్నాయి.

పలమనేరు అడవి గుండా చెన్నై - బెంగళూరు ఎక్స్‌ప్రెస్ వే వెళ్తున్న నేపథ్యంలో అధికారులు కీలక ఆలోచనలు చేశారు. అటవీ ప్రాంతం కావటం.. అందులోనూ ఏనుగుల సంచారం అధికంగా ఉండే నేపథ్యంలో కొత్త ప్రణాళికలు రచించారు. రహదారి కారణంగా ఏనుగుల సంచారానికి ఆటంకం కలగకుండా ఉండేందుకు కొత్త ప్రణాళికలు సిద్ధం చేశారు. అడవి గుండా ఎక్స్‌ప్రెస్ వే నిర్మిస్తే, ఏనుగులు అడవిలో స్వేచ్ఛగా తిరిగేందుకు ఇబ్బందులు వస్తాయనే ఆలోచనతో.. ఏనుగుల సంచారానికి ఇబ్బంది లేకుండా ఎక్స్‌‍ప్రెస్ వేలో 12 చోట్ల అండర్‌పాస్‌లు నిర్మిస్తున్నారు.

మరోవైపు చెన్నై - బెంగళూరు గ్రీన్‌ఫీల్డ్ ఎక్స్‌ప్రెస్ వేను నాలుగు వరుసలుగా నిర్మిస్తున్నారు. మొత్తం మూడు రాష్ట్రాల పరిధిలో ఈ నిర్మాణం జరుగుతోంది. తమిళనాడు, ఆంధ్రప్రదేశ్, కర్ణాటక రాష్ట్రాలలో జాతీయ రహదారుల ప్రాధికారిక సంస్థ ఈ నిర్మాణం చేపట్టింది. తమిళనాడు రాజధాని చెన్నై, కర్ణాటక రాజధాని బెంగళూరు మధ్య కనెక్టివిటీ పెంచేందుకు కేంద్రం ఈ ప్రాజెక్టు ప్రారంభించింది. వాస్తవానికి 2025 ఆగస్ట్ నాటికి ఈ ప్రాజెక్టును పూర్తి చేయాలని అధికారులు లక్ష్యంగా పెట్టుకున్నారు. అయితే పనులు నెమ్మదిగా జరగటంతో 2026 జూన్ నాటికి బెంగళూరు - చెన్నై ఎక్స్‌ప్రెస్ వే నిర్మాణం పూర్తి చేయాలని ప్రస్తుతం లక్ష్యంగా నిర్దేశించుకున్నారు.