మూడ్రోజులు వానలే..ఈ జిల్లాల్లో భారీ నుంచి అతి భారీ వర్షాలు

ఆంధ్రప్రదేశ్ వాసులకు ముఖ్య గమనిక. రాష్ట్రంలో మరో మూడు రోజుల పాటు వర్షాలు కొనసాగనున్నాయి. బంగాళాఖాతంలో ప్రస్తుతం అల్పపీడనం కొనసాగుతోంది. దీనికి జతగా సోమవారం మరో అల్పపీడనం ఏర్పడనుంది. ఆగస్టు 18 నాటికి వాయువ్య బంగాళాఖాతం, దానిని ఆనుకుని ఉన్న పశ్చిమ మధ్య బంగాళాఖాతంలో మరొక అల్పపీడనం ఏర్పడే అవకాశం ఉందని ఏపీ విపత్తుల నిర్వహణ సంస్థ తెలిపింది. ఈ అల్పపీడనాల ప్రభావంతో వచ్చే మూడు రోజులు ఏపీలోని కోస్తా జిల్లాలలో చెదురుమదురుగా భారీ నుంచి అతి భారీ వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ హెచ్చరించింరి. అలాగే రాయలసీమలో తేలికపాటి నుంచి మోస్తరు వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ ఎండీ ప్రఖర్ జైన్ తెలిపారు. మంగళవారం వరకు మత్స్యకారులు వేటకు వెళ్లవద్దని సూచించారు.

మరోవైపు అల్పపీడనాల ప్రభావంతో ఆదివారం రోజున అల్లూరి సీతారామరాజు జిల్లా , విశాఖపట్నం,అనకాపల్లి, కాకినాడ జిల్లాల్లో అక్కడక్కడా భారీ వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ తెలిపింది. అలాగే శ్రీకాకుళం,విజయనగరం, పార్వతీపురం మన్యం, కోనసీమ, ఉభయగోదావరి జిల్లాల్లో మోస్తరు నుంచి భారీ వర్షాలు కురిసే అవకాశం ఉందని హెచ్చరించింది. రాష్ట్రంలోని మిగతా జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ ఎండీ ప్రఖర్ జైన్ తెలిపారు.

మరోవైపు జూలై వరకూ ఆంధ్రప్రదేశ్‌లో లోటు వర్షపాతం ఉండేది. నైరుతి రుతుపవనాలు ఈసారి ముందుగానే పలకరించినప్పటికీ.. ఆశించిన మేర వర్షాలు కురవలేదు. దీంతో జూన్, జూలై మాసాలలో లోటు వర్షపాతం నమోదైంది. అయితే ఇటీవల బంగాళాఖాతంలో అల్పపీడనం ఏర్పడటంతో రాష్ట్రంలో గత మూడు రోజులుగా విస్తారంగా వర్షాలు కురుస్తున్నాయి. ఇప్పుడు మరో మూడు రోజులు ఈ వర్షాలు కొనసాగే అవకాశాలు ఉన్నాయి.

దీంతో కొన్ని జిల్లాలు లోటు వర్షపాతం నుంచి అధిక వర్షపాతం జాబితాలోకి వచ్చి చేరాయి. పల్నాడు, బాపట్ల, గుంటూరు. కృష్ణా, ఎన్టీఆర్, ప్రకాశం జిల్లాలు అధిక వర్షపాతం నమోదైన జాబితాలోకి చేరాయి. మరోవైపు ఆగస్ట్ నెలాఖరు వరకూ నైరుతి రుతుపవనాలు చురుగ్గా కదులుతాయని అంచనా. ఈ నేపథ్యంలో ఆగస్ట్ నెల చివరి వరకూ రాష్ట్రంలో వానలు కురిసే అవకాశం ఉందని వాతావరణ శాఖ అధికారులు చెప్తున్నారు.