భారత్‌పై టారిఫ్‌లు పుతిన్‌ను ఆపలేవు: ట్రంప్ నిర్ణయంపై యూఎస్ డెమోక్రాట్ల ప్యానెల్

అగ్రరాజ్యం అమెరికా అధ్యక్షుడు డొనాల్డ్ ట్రంప్ భారత్‌పై 50 శాతం సుంకాలు విధించిన విషయం అందరికీ తెలిసిందే. ముఖ్యంగా రష్యాతో చమురు వ్యాపారం చేస్తుందన్న అక్కసుతోనే ట్రంప్ ఈ నిర్ణయం తీసుకోగా.. అమెరికాలో రాజకీయ చర్చలు ఊపందుకున్నాయి. ఈ ప్రతిపాదనను యూఎస్ హౌస్ ఆఫ్ రెప్రజెంటేటివ్స్ ఫారెన్ అఫైర్స్ కమిటీలోని డెమోక్రాట్ల ప్యానెల్ తీవ్రంగా వ్యతిరేకించింది. భారత్‌పై టారిఫ్‌లు విధించడం వల్ల పుతిన్‌ను ఆపలేమని ఆ ప్యానెల్ స్పష్టం చేసింది. ఈ వివాదాస్పద నిర్ణయం ఉక్రెయిన్ యుద్ధానికి ఎలాంటి పరిష్కారాన్ని చూపదని.. పైగా అనవసరమైన పరిణామాలకు దారి తీస్తుందని వారు అభిప్రాయపడ్డారు.

డెమోక్రాట్ల వ్యతిరేకతకు కారణాలు..

డెమోక్రాట్ల ప్యానెల్ భారత్‌కు అనుకూలంగా చేసిన ఈ వ్యాఖ్యలు వ్యూహాత్మకంగా చాలా ముఖ్యమైనవి. వారు ప్రధానంగా రెండు అంశాలను నొక్కి చెప్పారు. అందులో మొదటిది భారత్ ఒక ప్రజాస్వామ్య దేశమని, ఆసియాలో అమెరికాకు ఒక ముఖ్యమైన వ్యూహాత్మక మిత్ర దేశమని వారు గుర్తు చేశారు. ఇలాంటి మిత్ర దేశంపై ఆర్థిక ఆంక్షలు విధించడం అమెరికాకు ఆత్మహత్యాసదృశమని వాదించారు. ఇక రండోది ఉక్రెయిన్‌పై దాడి చేసినందుకు రష్యాను శిక్షించాలనే లక్ష్యం అమెరికాకు ఉండగా.. దానికి సంబంధం లేని ఒక మిత్ర దేశాన్ని టార్గెట్ చేయడం తెలివైన పని కాదని డెమోక్రాట్లు పేర్కొన్నారు.

రష్యా నుంచి భారత్ చమురు కొనుగోలు చేయడం వెనుక ఆర్థిక అవసరాలు ఉన్నాయని.. ఇది పుతిన్‌కు మద్దతు పలకడం కాదని వారు విశ్లేషించారు. ఉక్రెయిన్ యుద్ధం వల్ల అంతర్జాతీయ చమురు ధరలు పెరిగిన నేపథ్యంలో.. భారత్ తన ప్రజల అవసరాల కోసం తక్కువ ధరలకు లభించే రష్యా చమురును కొనక తప్పలేదని వారు వివరించారు. ఈ అంశంలో భారత్‌ను శిక్షించడం వల్ల రష్యా ఆర్థిక వ్యవస్థకు ఎలాంటి నష్టం జరగదని, పైగా భారత్‌కు అమెరికాకు మధ్య ఉన్న సంబంధాలు దెబ్బతింటాయని వారు ఆందోళన వ్యక్తం చేశారు.

అంతర్జాతీయ రాజకీయాలపై ప్రభావం

డెమోక్రాట్ల ప్యానెల్ ప్రకారం.. భారత్‌పై సుంకాలు విధించడం వల్ల అది రష్యాకు మరింత దగ్గరయ్యే అవకాశం ఉంది. చైనాను ఎదుర్కోవడంలో భారత్‌తో బలమైన భాగస్వామ్యం అమెరికాకు చాలా అవసరం. ఇలాంటి సమయంలో భారత్‌ను దూరం చేసుకోవడం అమెరికా సుదీర్ఘకాల వ్యూహాత్మక ప్రయోజనాలకు విఘాతం కలిగిస్తుందని వాదించారు. పుతిన్‌ను శిక్షించాలని అనుకుంటే.. రష్యా ఆర్థిక వ్యవస్థకు నేరుగా నష్టం కలిగించేలా ఆంక్షలు విధించాలని, ఇతర దేశాలను శిక్షించడం వల్ల ప్రయోజనం లేదని స్పష్టం చేశారు.

మొత్తంగా ఈ వ్యాఖ్యలు డొనాల్డ్ ట్రంప్ 'అమెరికా ఫస్ట్' విధానాన్ని, కేవలం ఆర్థిక అంశాలపై మాత్రమే దృష్టి పెట్టే ఆయన నిర్ణయాలను తీవ్రంగా ప్రశ్నిస్తున్నాయి. విదేశాంగ విధానంలో మిత్ర దేశాలతో సత్సంబంధాలు, వ్యూహాత్మక భాగస్వామ్యాల ప్రాముఖ్యతను నొక్కిచెబుతున్నాయి. పుతిన్‌ను శిక్షించాలనే లక్ష్యానికి బదులుగా.. అనవసరంగా మిత్ర దేశాన్ని దూరం చేసుకోవడం ఒక పెద్ద వ్యూహాత్మక పొరపాటు అని డెమోక్రాట్ల ప్యానెల్ స్పష్టమైన సందేశాన్ని ఇచ్చింది.