బెంగళూరు వాహనదారులకు.. పెండింగ్ చలాన్లపై 50 శాతం డిస్కౌంట్

వాహనదారులు రోడ్డు ఎక్కారంటే చాలు.. ట్రాఫిక్ పోలీసులు డేగ కళ్లతో చూస్తుంటారు. ఏ చిన్న తప్పు చేసినా సరే.. చలాన్ విధించి.. వాహనదారుల జేబుకు చిల్లు పెట్టేందుకు రెడీ అవుతుంటారు. వాహనాలకు సంబంధించిన కాగితాలు మొదలు.. ట్రాఫిక్ రూల్స్ వంటి పలు అంశాల్లో కచ్చితంగా ఉంటూ ఏ చిన్న పొరపాటు చేసినా.. భారీ ఎత్తున చలాన్ విధిస్తుంటారు. ఇది కట్టలేక చాలా మంది ఇబ్బంది పడుతుంటారు. ఈ క్రమంలో వాహనదారులకు ట్రాఫిక్ పోలీసులు శుభవార్త చెప్పారు. పెండింగ్ చలాన్ల మీద 50 డిస్కౌంట్ ప్రకటించారు. ఆ వివరాలు..

బెంగళూరు ట్రాఫిక్ పోలీసులు వాహనదారులకు శుభవార్త చెప్పారు. పెండింగ్ చలాన్ల మీద 50 శాతం డిస్కౌంట్ ప్రకటించారు. రేపటి నుంచి అనగా ఆగస్టు 23 నుంచి సెప్టెంబ్ 12 వరకు ఈ డిస్కౌంట్ ఆఫర్ అమల్లో ఉంటుందని తెలిపారు. అయితే ఈ డిస్కౌంట్ ఆఫర్ కేవలం ఈ చలాన్ల మీదనే వర్తిస్తుందని అధికారులు స్పష్టం చేశారు. ఈపెండింగ్ జరిమానాలను బీటీపీ వెబ్‌సైట్ (https://btp.gov.in/) లేదా కర్ణాటక రాష్ట్ర పోలీస్/BTP ASTraM యాప్‌లో లేదా సమీపంలోని ట్రాఫిక్ పోలీస్ స్టేషన్‌‌కి కూడా వెళ్లి చెల్లించవచ్చు అని తెలిపారు. లేదా ఇన్‌ఫాంట్రీ రోడ్‌లోని ట్రాఫిక్ మేనేజ్‌మెంట్ సెంటర్‌‌కు కూడా వెళ్లి చెల్లించవచ్చని అధికారులు తెలిపారు. ఇవే కాక కర్ణాటక వన్, బెంగళూరు వన్ కేంద్రాల ద్వారా పెండింగ్ చలాన్లు చెల్లించవచ్చని ప్రకటించారు..

రెండు సంవత్సరాల క్రితం కూడా బెంగళూరు ట్రాఫిక్ పోలీసులు ఇలానే పెండింగ్ చలాన్ల మీద డిస్కౌంట్ ప్రకటించిన సంగతి తెలిసిందే. 2023లో పెండింగ్‌లో ఉన్న ట్రాఫిక్ జరిమానాలపై బెంగళూరు ట్రాఫిక్ పోలీసులు రెండుసార్లు డిస్కౌంట్ ఆఫర్ ప్రకటించారు. దీంతో వేల మంది వాహనాదారుల.. తమ పెండింగ్ చలాన్లను చెల్లించారు. అయితే ఈ సారి కేవలం ఈ చలాన్ల మీదనే డిస్కౌంట్ ఆఫర్ ప్రకటించారు.

గతంలో ఇలా ఆఫర్ ప్రకటించిన మరుసటి రోజే రూ.5.6 కోట్లు వసూలు అయినట్లు అధికారులు తెలిపారు. గతంలో డిస్కౌంట్ ఆఫర్ ప్రకటించిన సమయంలో కర్ణాటకలో మొత్తం రూ.530 కోట్ల మేర వాహనాదరులు పెండింగ్ చలాన్లను కట్టాల్సి ఉండే. ఈ మొత్తంలో కేవలం బెంగళూరుకు చెందినవారే రూ.500కోట్లు మేర చెల్లించాల్సి ఉంది. దీంతో ప్రభుత్వం 50 శాతం డిస్కౌంట్ ఆఫర్ ప్రకటించింది. దీనికి వాహనదారుల నుంచి మంచి స్పందన వచ్చింది. చలాన్లు కట్టేందుకు ఎగబడ్డారు. మరి ఈసారి ఎలా స్పందిస్తారో.. ఎంత మేర ఈ అవకాశాన్ని వినియోగించుకుంటారో చూడాలి అంటున్నారు.