అశ్విన్ యూట్యూబ్ షోలో పాత సంఘటన గుర్తుచేసుకున్న ద్రవిడ్

టీమిండియా గోల్డెన్ ఎరా అంటే సచిన్, ద్రవిడ్, లక్ష్మణ్, గంగూలీ ఉన్నప్పుడే అని చెబుతుంటారు. వీరి సాధించిన రికార్డులు చరిత్రలో నిలిచిపోయాయి. సచిన్, ద్రవిడ్ కాంబినేషన్ కూడా టీమిండియాకు ఎన్నో విజయాలను అందించింది. అయితే 2011లో జరిగిన ఓ ఇన్సిడెంట్‌ను గుర్తు చేసుకున్న రాహుల్.. అశ్విన్ యూట్యూబ్ షో కుట్టీ స్టోరీస్‌లో చెప్పుకొచ్చాడు.

ఇంగ్లండ్ పర్యటనలో భాగంగా 2011లో ఎడ్జ్‌బాస్టన్ వేదికగా జరిగిన టెస్టులో ద్రవిడ్‌ డీఆర్ఎస్‌ను వినియోగించడంలో విఫలమయ్యాడు. అంపైర్ మీద నమ్మకం, అటు వైపు సచిన్ చెప్పడంతో డీఆర్ఎస్ తీసుకోకుండానే వెళ్లిపోయినట్లు అశ్విన్ ఇంటర్వ్యూలో చెప్పుకొచ్చాడు. కన్ఫ్యూజ్ అయ్యి రివ్యూ తీసుకోనందుకు ఇప్పటికీ బాధపడుతున్నాడట!

"జిమ్మీ అండర్సన్ బంతిని డ్రైవ్ చేశాను. టక్‌మంటూ ఓ పెద్ద శబ్దం వినిపించింది. కానీ బ్యాట్‌కి తగిలినట్లు నాకు అనిపించలేదు. సాధారణంగా బ్యాట్‌కి బంతి తగిలిందా లేదా అని బ్యాటర్‌‌కి వెంటనే తెలుస్తుంది. కానీ ఆ శబ్దం నన్ను కూడా గందరగోళానికి గురి చేసింది. నాకు తగిలినట్లు అనిపించలేదని సచిన్‌కి చెబితే.. ఏదో బిగ్ నాయీస్ వచ్చింది రాహుల్, కచ్చితంగా తగిలింది" అని అన్నాడని ద్రవిడ్ గుర్తు చేసుకున్నాడు.

ఆ రోజుల్లో అంపైర్ సైమన్ టౌఫెల్ మీద అందరికీ కాస్తంత నమ్మకం ఉండేదని, అతను నిర్ణయం తీసుకున్నాడంటంటే చాలా మంది ప్రశ్నించరంటూ ద్రవిడ్ చెప్పాడు. టౌఫెల్‌పై నమ్మకం, సచిన్ మాట వినేసి డీఆర్ఎస్ తీసుకోకుండానే నడుచుకుంటూ పెవిలియన్‌కు వెళ్లిపోయాడట.

"బంతి బ్యాట్‌కి అస్సలు తగలలేదు. నా షూ లేస్ బ్యాట్‌ని తాకి శబ్దం వచ్చింది. అదే అందర్నీ తప్పుదోవ పట్టించింది. ఇద్దరు మహా నటుల్లాంటి మేము కూడా ఇంతగా మభ్యపడితే, డీఆర్ఎస్ ఎప్పటికీ సులభం కానట్లే అనిపిస్తుంది" అని ద్రవిడ్ నవ్వుకుంటూ చెప్పాడు. ఇదే ఇంటర్వ్యూలో శుభమన్ గిల్‌ని ఆకాశానికి ఎత్తాడు. 2018లో ఆయన కోచ్‌గా ఉన్న సమయంలోనే భారత్ అండర్ -19 ప్రపంచకప్ గెలిచింది. ఆ జట్టులోనే ఇప్పటి టెస్టు కెప్టెన్ గిల్ కూడా ఉన్నాడు. పృథ్వీ షాతో పాటు గిల్ పేరు ఎక్కడికి వెళ్లినా వినిపించేదని చెప్పాడు. తాను కలిసే ముందుగానే ఆరుగురు కోచ్‌లు గిల్ గురించి చెప్పారని గుర్తు చేసుకున్నాడు.