వాలెస్ లైన్.. పక్షులను సైతం ఆపే అదృశ్య రేఖ..!

పక్షులు ఆకాశంలో స్వేచ్ఛగా ఎగురుతూ, ఖండాలను దాటి ప్రయాణిస్తాయి. అయితే, ఆసియా మరియు ఆస్ట్రేలియా ఖండాల మధ్య ఉన్న వాలెస్ లేన్ అనే ఊహాజనిత రేఖను దాటలేకపోతున్నాయి. ఈ రేఖ, పెలికాన్ వంటి శక్తిమంతమైన పక్షులను కూడా అడ్డుకుంటుంది. సుమారు 10 మిలియన్ సంవత్సరాలుగా, ఈ సరిహద్దును జంతువులు లేదా పక్షులు దాటకపోవడం శాస్త్రవేత్తలను ఆశ్చర్యపరుస్తోంది.
సుమారు 30 మిలియన్ సంవత్సరాల క్రితం ఆస్ట్రేలియన్ మరియు యురేషియన్ టెక్టోనిక్ ప్లేట్ల ఢీకొనడంతో ఈ ప్రాంతంలో ద్వీప సమూహాలు ఏర్పడ్డాయి. ఇది సముద్ర ప్రవాహాలను మార్చి, ప్రాంతీయ వాతావరణంలో మార్పులను తెచ్చింది. ఇండోనేషియా, మలేషియాలో కోతులు, ఏనుగులు, పులులు వంటి జంతువులు పరిణామం చెందగా, ఆస్ట్రేలియా మరియు న్యూ గినియాలో మార్సుపియల్స్, కాకాటూలు వంటి అరుదైన జీవజాతులు వృద్ధి చెందాయి. అయినప్పటికీ, ఈ రెండు ఖండాల జీవులు వాలెస్ లేన్‌ను దాటలేకపోయాయి.
19వ శతాబ్దంలో శాస్త్రవేత్త ఆల్ఫ్రెడ్ రస్సెల్ వాలెస్ ఈ విచిత్రమైన భౌగోళిక రేఖను గుర్తించారు, దీని పేరు ఆయన పేరు మీదుగా వాలెస్ లేన్‌గా నిలిచింది. బాలి మరియు లోంబోక్ మధ్య ఉన్న 24 కిలోమీటర్ల వెడల్పు గల లోంబోక్ జలసంధి ఈ రేఖను సూచిస్తుంది. ఈ జలసంధి ఆసియా ఖండంలోని షెల్ఫ్‌ను ఆస్ట్రేలియన్ షెల్ఫ్ నుండి వేరు చేస్తుంది, ఇది కేవలం భౌగోళిక రేఖ మాత్రమే కాక, జీవావరణ రేఖగా కూడా పనిచేస్తుంది.
ఈ వాలెస్ లేన్‌ను దాటకపోవడానికి ఖచ్చితమైన శాస్త్రీయ కారణాలు ఇప్పటికీ స్పష్టంగా తెలియరాలేదు. వాతావరణం, సముద్ర ప్రవాహాలు లేదా ఇతర అదృశ్య శక్తులు ఈ అడ్డంకికి కారణమై ఉండవచ్చని శాస్త్రవేత్తలు ఊహిస్తున్నారు. ఈ రేఖ పక్షులు, సరీసృపాలు, ఇతర జంతువుల సంచారాన్ని ఎలా నియంత్రిస్తుందనే రహస్యం ఇప్పటికీ శాస్త్రీయ పరిశోధనలకు సవాలుగా నిలుస్తోంది.