ప్రయాణికులకు అలర్ట్.. ఆ రూట్లో ఆర్టీసీ ఛార్జీలు పెంపు

గుంటూరులో శంకర్ విలాస్ ఫ్లైఓవర్ పనులు జరుగుతున్న సంగతి తెలిసిందే. ఎన్నో ఏళ్లుగా ఎదురుచూస్తున్న శంకర్ విలాస్ పైవంతెన నిర్మాణ పనులను ఈ మధ్యనే ప్రారంభించారు. పాత వంతెనను తొలగించి కొత్త నిర్మాణం చేపడుతున్నారు. ఈ నేపథ్యంలో ఆ ప్రాంతంలో ట్రాఫిక్ ఆంక్షలు అమలు చేస్తున్నారు. దీంతో శంకర్ విలాస్ ఫ్లైఓవర్ మీదుగా వెళ్లే ఆర్టీసీ బస్సుల రూట్ల పరిధి పెరిగింది. ఈ నేపథ్యంలో గుంటూరు ఆర్టీసీ అధికారులు కీలక నిర్ణయం తీసుకున్నారు. శంకర్ విలాస్ ఫ్లైఓవర్ పనులతో ట్రాఫిక్ ఆంక్షలు అమలవుతున్నందున బస్సుల రూట్ల పరిధి పెరిగిందని.. దీంతో ఆ మేరకు ఆ రూట్లో ఛార్జీలు పెంచారు. ఈ విషయాన్ని గుంటూరు-1 డిపో మేనేజర్ ఓ ప్రకటనలో తెలిపారు. శనివారం నుంచే ఈ నిర్ణయం అమల్లోకి వచ్చింది.

ఈ రూట్లో శనివారం నుంచే ఓ స్టేజ్ పెంచి బస్సులలో ఛార్జీ వసూలు చేస్తున్నారు. గుంటూరు బస్టాండ్ నుంచి లాం వైపుగా వెళ్లే ఆర్టీసీ బస్సులు రమేష్ ఆస్పత్రి, గుజ్జనగుండ్ల, జేకేసీ కళాశాల, ఆర్టీవో ఆఫీస్, చిల్లీస్ సెంటర్ మీదుగా వెళ్తున్నాయి. అయితే లాం వైపు నుంచి గుంటూరు ఆర్టీసీ బస్టాండుకు వచ్చే సమయంలో చిల్లీస్ సెంటర్, రెడ్డిపాలెం ఎక్స్ రోడ్డు, ఆటోనగర్ మీదుగా వెళ్తున్నాయని అధికారులు వివరించారు. సాధారణంగా గుంటూరు నుంచి అమరావతి గుడికి వెళ్లేందుకు ఆర్టీసీ బస్సులలో గతంలో 45 రూపాయలు ఛార్జీ వసూలు చేసేవారు. అయితే ఇప్పుడు దీనిని రూ.50లకు పెంచారు. అలాగే గుంటూరు నుంచి క్రోసూరు మార్గంలో బస్సులో ఛార్జీ రూ.70లుగా ఉండగా.. రూ.75లకు పెంచారు. ఇక గుంటూరు తుళ్లూరు మార్గంలో గతంలో 40 రూపాయలుగా ఉన్న ఛార్జీని రూ.45లకు పెంచినట్లు గుంటూరు డిపో అధికారులు ఓ ప్రకటనలో తెలిపారు.

మరోవైపు సుమారు 70 ఏళ్లు సేవలందించిన శంకర్ విలాస్ పాత బ్రిడ్జిని ఇటీవల కూల్చివేశారు.1958లో దీనిని నిర్మించగా.. పెరుగుతున్న వాహనాల రాకపోకలు, గుంటూరు విస్తరణ కారణంగా దీనిని కూల్చివేశారు. శంకర్ విలాస్ పాత బ్రిడ్జి స్థానంలో.. రూ. 98 కోట్లతో కొత్తగా 4 వరుసల ఆర్వోబీని నిర్మించనున్నారు. ఈ నేపథ్యంలో శంకర్ విలాస్ ఆర్వోబీ నిర్మాణ పనుల కారణంగా ఆ ప్రాంతంలో ట్రాఫిక్ ఆంక్షలు అమల్లో ఉన్నాయి. దీంతో ఆర్టీసీ బస్సులు చుట్టూ తిరిగి వెళ్లాల్సి వస్తోంది. ఈ కారణంగానే ఓ స్టేజీ ఛార్జీ అదనంగా వసూలు చేస్తున్నట్లు ఆర్టీసీ అధికారులు ప్రకటనలో వెల్లడించారు.