దక్షిణాఫ్రికాతో మూడో వన్డేలో ఆస్ట్రేలియా ఊచకోత.. 432 టార్గెట్ ఫిక్స్

సొంతగడ్డపై దక్షిణాఫ్రికాతో జరుగుతున్న మూడో వన్డేలో ఆస్ట్రేలియా అదరగొట్టింది. వన్డే మ్యాచ్‌లో టీ20 తరహాలో విధ్వంసం సృష్టించింది. వింటేజ్ ఆసీస్‌ అంటే ఏంటో గుర్తుకు తెచ్చింది. మూడు వన్డేల సిరీస్‌ను ఇప్పటికే కోల్పోయిన ఆసీస్.. మూడో వన్డేలో మాత్రం ప్రొటీస్‌కు చుక్కలు చూపించింది. ఏకంగా టాప్‌-3 బ్యాటర్లంతా సెంచరీలతో చెలరేగడంతో దక్షిణాఫ్రికా బౌలర్లకు పట్టపగలే చుక్కలు కనిపించాయి. దీంతో నిర్ణీత 50 ఓవర్లలో ఆస్ట్రేలియా 431/2 పరుగులు స్కోరు చేసింది.

ఈ మ్యాచ్‌లో టాస్ గెలిచిన ఆస్ట్రేలియా కెప్టెన్ మిచెల్ మార్ష్.. ఫస్ట్‌ బ్యాటింగ్ ఎంచుకున్నాడు. ఇప్పటికే సిరీస్‌లో 2-0తో తిరుగులేని ఆధిక్యంలో నిలిచిన ప్రొటీస్.. ఈ మ్యాచ్‌లోనూ గెలిచి.. క్లీన్‌ స్వీప్ చేయాలని భావించింది. కానీ అలా వదిలేస్తే అది ఆసీస్ ఎందుకు అవుతుంది. ఈ సిరీస్‌లో పెద్దగా రాణించలేకపోయిన ట్రావిస్ హెడ్.. ఈ మ్యాచ్‌లో పెను విధ్వంసం సృష్టించాడు. వన్డేల్లో టీ20 తరహాలో రెచ్చిపోయాడు. 103 బంతుల్లో 142 రన్స్ స్కోరు చేశాడు. కెప్టెన్ మిచెల్ మార్ష్ సైతం రాణించాడు. అతడు కూడా 106 బంతుల్లో 100 రన్స్ చేశాడు.

ఓపెనర్లు ఇద్దరు రాణించడంతో ఆస్ట్రేలియా తొలి వికెట్‌కు 34.1 ఓవర్లలో 250 పరుగులు జోడించింది. హెడ్ ఔట్ అయ్యాక క్రీజులోకి వచ్చిన కామెరూన్ గ్రీన్.. విధ్వంసాన్ని మరో లెవెల్‌కు తీసుకెళ్లాడు. బౌలర్ ఎవరన్నది చూడకుండా ఎదురుదాడికి దిగాడు. దీంతో 47 బంతుల్లోనే మూడంకెల మార్కును చేరుకున్నాడు. ఫలితంగా వన్డేల్లో ఆస్ట్రేలియా తరఫున రెండో ఫాస్టెస్ట్ సెంచరీ కొట్టాడు. మొత్తంగా 55 బంతుల్లో 118 రన్స్ చేసి అజేయంగా నిలిచాడు. అలెక్స్ కేరీ కూడా 37 బంతుల్లో 50 రన్స్‌తో నాటౌట్‌గా నిలిచాడు. దీంతో నిర్ణీత ఓవర్లలో ఆస్ట్రేలియా 2 వికెట్ల నష్టానికి 431 పరుగులు చేసింది.

వన్డే క్రికెట్‌లో ఆస్ట్రేలియా అత్యధిక స్కోర్లు..

434/4 vs దక్షిణాఫ్రికా, జోహన్నెస్‌బర్గ్‌ 2006

431/2 vs దక్షిణాఫ్రికా, మెకే 2025*

417/6 vs అఫ్ఘానిస్థాన్‌, వాకా 2015

399/8 vs నెదర్లాండ్స్‌, దిల్లీ 2023