'మానసికంగా అలసిపోయా..' టెస్టు రిటైర్మెంట్ తర్వాత రోహిత్ శర్మ

టీమిండియా డాషింగ్ ఓపెనర్ రోహిత్ శర్మ టెస్టు క్రికెట్‌కు గుడ్ బై చెప్పి మూడు నెలలు అయింది. ఇంకొంత కాలం టెస్టు క్రికెట్‌లో కొనసాగాలని ఉన్నప్పటికీ బీసీసీఐ ఒత్తిళ్లతోనే రిటైర్మెంట్ ప్రకటించాల్సి వచ్చింది. అయితే, తాజాగా టెస్టు కెరీర్‌పై హిట్ మ్యాన్ కీలక వ్యాఖ్యలు చేశాడు. ముంబైలోని సీఈఏటీ కార్యక్రమంలో సోమవారం రోహిత్ మాట్లాడుతూ.. ఐదు రోజుల టెస్టు క్రికెట్‌ చాలా కఠినమైనదంటూ కామెంట్స్ చేశాడు.

38 ఏళ్ల రోహిత్ 67 టెస్టుల్లో 4301 పరుగులు చేసి, 40.58 సగటుతో తన కెరీర్‌ను ముగించాడు. ఈ ఏడాది మేలో టెస్టులకు వీడ్కోలు పలికే ముందు, 2024లో టీ20 ఇంటర్నేషనల్స్‌ నుంచి రిటైర్‌ అయ్యాడు. ఆ ఫార్మాట్‌లో భారత జట్టుకు ప్రపంచకప్‌ విజయం అందించిన తర్వాతే హిట్ మ్యాన్ ఈ నిర్ణయం తీసుకున్నాడు.

“టెస్టు మ్యాచ్‌లు అంటే ఐదు రోజులు నిలబడి ఆడటమే కాదు.. నిరంతర దృష్టి, మానసిక బలం అవసరం. చిన్న వయసులోనే ముంబైలో క్లబ్ క్రికెట్‌లో రెండు మూడు రోజుల మ్యాచ్‌లు ఆడటంతో మాకు ఆ అలవాటు ఏర్పడింది. అదే టెస్టులలో మానసికంగా నిలబడటానికి బలమిచ్చింది” అని రోహిత్ గుర్తు చేశాడు.

ప్రారంభంలో క్రికెట్‌ను కేవలం సరదాగా ఆడినప్పటికీ, వయసు పెరిగే కొద్దీ ప్రిపరేషన్‌ ప్రాముఖ్యత అర్థమైందని రోహిత్ వివరించాడు. “సీనియర్‌ ఆటగాళ్లు, కోచ్‌లు సన్నద్ధత ప్రాముఖ్యతను చెప్పారు. తొలినాళ్లలో అది అర్థం కాలేదు. కానీ క్రమంగా ప్రిపరేషన్‌ వల్లే క్రమశిక్షణ వస్తుందని గ్రహించాను. అదే ఆటగాడిని ఉన్నత స్థాయికి తీసుకెళ్తుంది” అని శర్మ అన్నాడు.

“అత్యుత్తమ స్థాయి ప్రదర్శన అంటే ఏకాగ్రత, దృష్టి, మానసిక సిద్ధత. అది లేకుండా ఐదు రోజుల ఆటలో నిలబడటం కష్టం. ఆట మొదలైన తర్వాత ప్రతి క్షణం రియాక్షన్‌ మాత్రమే.. ఆ రియాక్షన్‌ సరిగ్గా రావాలంటే ముందే చేసిన ప్రిపరేషన్‌ ముఖ్యమైనది” అని రోహిత్ అన్నాడు.

“భారత జట్టులో స్థిరపడే వరకు నా సమయం అంతా వెచ్చించాను. బంతి, బ్యాట్‌, ఒత్తిడి, నిర్ణయం.. ఏదైనా ఎదురైనా సరైన రీతిలో రియాక్ట్ అవ్వాలంటే, మైదానంలోకి అడుగుపెట్టే ముందు దానికి సిద్ధంగా ఉండాలి. కేవలం క్రికెట్‌లోనే కాదు, జీవితంలోని ప్రతి రంగంలోనూ విజయానికి ప్రిపరేషన్‌నే మూలాధారం” అని ఆయన స్పష్టం చేశాడు.