భార్యను చంపడానికి ముందే ప్రియురాలిపై దాడి

ఉత్తర ప్రదేశ్‌లోని నోయిడాలో జరిగిన వరకట్న హత్య కేసు దేశవ్యాప్తంగా సంచలనం సృష్టిస్తోంది. ఈ కేసులో నిందితుడైన నిఖీ భర్త విపిన్ వ్యవహార శైలికి సంబంధించి దిగ్భ్రాంతికరమైన విషయాలు వెలుగులోకి వస్తున్నాయి. తన భార్య నిఖీని వరకట్నం కోసం వేధించి, తీవ్రంగా దాడి చేసి పెట్రోల్ పోసి నిప్పు అంటించడానికి కొన్ని నెలల ముందే అతడే ప్రియురాలితో అక్రమ సంబంధం నెరుపుతూ.. నిఖీకి దొరికిపోయినట్లు తెలుస్తోంది. అంతేకాకుండా ఆ సమయంలో భార్యకు పట్టుబడకుండా ఉండేందుకు విపిన్ ప్రియురాలిపైనే దాడి చేసినట్లు కూడా వెలుగులోకి వచ్చింది.

నిఖీ హత్యకు కొన్ని నెలల ముందు అంటే గతేడాది అక్టోబర్‌లో విపిన్ ప్రియురాలు అతనిపై దాడి, లైంగిక వేధింపుల ఆరోపణలతో పోలీసులకు ఫిర్యాదు చేసింది. ఆమె ఫిర్యాదు ప్రకారం.. నిఖీ ముందుగానే భర్త విపిన్ అక్రమ సంబంధం గురించి తెలుసుకుంది. ఈక్రమంలోనే ఆమె సోదరితో కలిసి అతడు ప్రియురాలితో ఏకాంతంగా గడుపుతుండగా వెళ్లి రెడ్ హ్యాండెడ్‌గా పట్టుకుంది. అయితే తన తప్పేమీ లేదని నిరూపించుకోవడానికి విపిన్.. అక్కడే ఉన్న తన ప్రియురాలిపై దాడికి పాల్పడ్డాడు. ఇష్టం వచ్చినట్లుగా కొట్టి అక్కడి నుంచి వెళ్లిపోయాడు. ఈ విషయాలన్నింటినీ ఆమె ఫిర్యాదులో పేర్కొంది. ఈ సంఘటన తర్వాత విపిన్ భార్య నిఖీతో పాటు ఆమె సోదరి కంచన్ ఆమె తల్లిదండ్రులు, సన్నిహితులు అంతా ఆందోళన చెందారు.

అయితే ఈ సంఘటన తర్వాత కొన్ని నెలలకే నిఖీ ప్రాణాలు కోల్పోవడం పలు అనుమానాలకు తావిస్తోంది. ఆగస్టు 21న తేదీన నిఖీని తీవ్రమైన కాలిన గాయాలతో నొయిడాలోని ఫోర్టిస్ ఆసుపత్రికి తీసుకువచ్చారు. మొదట సిలిండర్ పేలుడు కారణంగా ఈ గాయాలు అయ్యాయని ఆసుపత్రి రికార్డుల్లో నమోదు చేశారు. కానీ పోలీసులు ఘటనా స్థలాన్ని పరిశీలించిన తర్వాత విచారణ చేసిన తర్వాత అసలు విషయాలు వెలుగులోకి వచ్చాయి. ముఖ్యంగా నిఖీ సోదరి సహా ఆమె ఐదేళ్ల కుమారుడు ఇద్దరూ విపిన్, అతడి తల్లిదండ్రులు కలిసే నిఖీని హత్య చేశారని వివరించారు. తాము ఆ విషయాలను కళ్లారా చూసినట్లు చెప్పారు. అంతేకాకుండా కంచన్ అందుకు సంబంధించిన దృశ్యాలను వీడియో తీసినట్లు కూడా వెల్లడించింది.

వాటిని ఆధారంగా చేసుకునే పోలీసులు ఈ కేసును కూలంకషంగా దర్యాప్తు చేస్తున్నారు. ఇప్పటికే ఈ కేసులో విపిన్‌ను అరెస్ట్ చేశారు. అతడు తప్పించుకునేందుకు ప్రయత్నిస్తే కాల్పులు జరిపి మరీ పట్టుకున్నారు. ప్రస్తుతం అతడు పోలీసుల అదుపులోనే ఉండగా.. అతడికి సంబంధించిన అన్ని విషయాలపై ఆరా తీస్తున్నారు. ఈక్రమంలోనే ప్రియురాలి విషయం వెలుగులోకి వచ్చింది. అయితే నిఖీని పెట్రోల్ పోసి కాల్చినప్పుడు మిగతా కుటుంబ సభ్యులు అంతా ఎక్కడ ఉన్నారు, ఎవరెవరు ఇందుకు సహకరించారనేది తెలుసుకునే ప్రయత్నం చేస్తున్నారు.