"ఎంఎస్ ధోనీకి నేను నచ్చను!" — మనోజ్ తివారి సంచలన వ్యాఖ్యలు

టీమిండియా మాజీ క్రికెటర్‌ మరియు ప్రస్తుత బెంగాల్ క్రీడా మంత్రి మనోజ్‌ తివారి మరోసారి సంచలన వ్యాఖ్యలు చేశారు. తన కెరీర్‌లో తగిన అవకాశాలు లభించలేదని, ఇతర ఆటగాళ్లతో పోల్చితే తనకు అన్యాయం జరిగిందని ఆయన ఆవేదన వ్యక్తం చేశారు.తాను సెంచరీ చేసినప్పటికీ, అప్పటి కెప్టెన్ ఎంఎస్ ధోనీ తనను జట్టులో కొనసాగించకపోవడం బాధ కలిగించిందని చెప్పారు. స్థిరమైన ప్రదర్శనలు చేసినప్పటికీ, ధోనీ నుంచి తాను ఆశించిన మద్దతు రాలేదన్నారు. ధోనీకి తాను నచ్చలేదని అనిపిస్తోందని, అతను తన సన్నిహిత ఆటగాళ్లకే ఎక్కువ అవకాశాలు కల్పించేవాడని తివారి తీవ్ర వ్యాఖ్యలు చేశారు.ప్రస్తుతం ఈ వ్యాఖ్యలు క్రికెట్ వర్గాల్లో చర్చనీయాంశంగా మారాయి.
*క్రిక్‌ట్రాకర్‌కి ఇచ్చిన ఇంటర్వ్యూలో తివారి ఇలా పేర్కొన్నారు:"ఎంఎస్ ధోనీకి అభిమానులెన్నో ఉన్నారు. అతను భారత క్రికెట్‌కి ఎన్నో విజయాలు అందించిన నాయకుడు. నేను కూడా ఎప్పుడూ అతని నాయకత్వ లక్షణాలను ప్రశంసిస్తాను. కానీ వ్యక్తిగతంగా మాత్రం నాకు జరిగిన తీరును చూస్తే అన్యాయం జరిగిందనే భావన కలుగుతోంది.ఈ విషయంలో స్పష్టమైన సమాధానం ఇవ్వగలిగే వ్యక్తి ధోనీ ఒక్కడే. అతనికి చాలా ఇష్టమైన ఇద్దరు ఆటగాళ్లు ఉన్నారు, వారికి మాత్రం అతను పూర్తి మద్దతు ఇచ్చాడు. ఆ ఇద్దరూ ఎవరో చాలా మందికి తెలుసు. కానీ అందరూ బహిరంగంగా ఆ విషయం చెప్పలేరు. క్రికెట్‌లో ఇష్టాయిష్టాలు సాధారణమే. బహుశా ధోనీ నన్ను ఇష్టపడకపోవచ్చు."తివారి అభిప్రాయం ప్రకారం, తన ఎంపికపై స్పష్టత ఇవ్వాల్సిన బాధ్యత ధోనీతో పాటు అప్పటి కోచ్ డంకన్ ఫ్లెచర్, అలాగే సెలెక్టర్లదీ కూడా అని అన్నారు. "ఒక వన్డేలో సెంచరీ చేసినప్పటికీ నన్ను ఎందుకు జట్టులో కొనసాగించలేదు? అసలు నాకు అవకాశాలు ఎందుకు ఇవ్వలేదు? — ఇవే ప్రశ్నలు మహీని కలిసినప్పుడు నేను అడగదలుచుకున్నవి.""ధోనీ తన సన్నిహిత ఆటగాళ్లకే అవకాశాలు ఇచ్చేవాడు. నాకూ అలా మద్దతు ఇచ్చుంటే, మరింత మంచి ప్రదర్శన ఇవ్వగలిగేవాడిని" అని తివారి వ్యాఖ్యానించారు.తివారి అంతర్జాతీయ క్రికెట్ కెరీర్ విషయానికొస్తే, అతని అరంగేట్రం ధోనీ కెప్టెన్సీలోనే జరిగింది. 2008 నుంచి 2015 వరకు భారత జట్టుకు ప్రాతినిధ్యం వహించిన తివారి, 12 వన్డేలు మరియు 3 టీ20లు ఆడారు. వన్డేల్లో 287 పరుగులు, టీ20ల్లో 15 పరుగులు చేసిన తివారి, తరువాత జట్టులో స్థానం దక్కించుకోలేకపోయారు.