ఒక్క బంతికి 13 పరుగులు.. కేరళ లీగ్‌లో సంజూ శాంసన్

ఆసియా కప్ 2025 ముంగిట సంజూ శాంసన్ జూలు విదిల్చాడు. టీమిండియా ప్లేయింగ్ 11లో చోటు సాధించడానికి విశ్వప్రయత్నాలు చేస్తున్నాడు. గడిచిన కొద్ది నెలల్లోనే మూడు టీ20 శతకాలు చేసినప్పటికీ.. వైస్ కెప్టెన్‌గా గిల్‌ పొట్టి ఫార్మాట్‌లో ఎంట్రీ ఇవ్వడంతో సంజూ స్థానం ప్రస్తుతం ప్రశ్నార్థకమైంది. ఈ నేపథ్యంలో కేరళ క్రికెట్‌ లీగ్‌లో తన సత్తా చాటుతున్నాడు.

తిరువనంతపురంలోని గ్రీన్‌ఫీల్డ్ స్టేడియంలో మంగళవారం త్రిసూర్ టైటాన్స్‌పై ఆడిన మ్యాచ్‌లో సంజూ రెచ్చిపోయాడు. ఓపెనర్‌గా వచ్చిన అతడు 46 బంతుల్లో 89 పరుగులు చేశాడు. నాలుగు ఫోర్లు, తొమ్మిది సిక్సర్లతో మెరిపించిన సంజూ, 193 స్ట్రైక్‌రేట్‌తో ప్రత్యర్థులను గడగడలాడించాడు.

మ్యాచ్ ఐదో ఓవర్‌లో సిజోమోన్ జోసెఫ్ వేసిన నో-బాల్‌ను సిక్స్‌గా మలిచిన సంజూ.. ఫ్రీ హిట్‌ను కూడా సిక్స్‌గా బాదాడు. అదనంగా నో-బాల్ పరుగుతో కలిపి ఒక్క బంతిలో 13 పరుగులు జట్టుకు అందించాడు. ఈ మ్యాచ్‌కి ముందు ఆదివారం కూడా సంజూ 51 బంతుల్లో 121 ఃసాధించి జట్టును విజయం వైపు నడిపాడు. అయితే, మొదటి రెండు మ్యాచ్‌ల్లో మిడిల్ ఆర్డర్‌లో బ్యాటింగ్ చేసిన సంజూ పెద్దగా రాణించలేకపోయాడు. మూడో మ్యాచ్‌లో మళ్లీ ఓపెనర్‌గా వచ్చి శతకాలు సాధించడం విశేషం.

ఆసియా కప్ జట్టును ప్రకటించినప్పుడు చీఫ్ సెలక్టర్లు అజిత్ అగార్కర్ మాట్లాడుతూ “శుభ్‌మన్ గిల్, యశస్వి జైస్వాల్ అందుబాటులో లేకపోవడంతోనే సంజూ అవకాశాలు పొందాడు. అభిషేక్ ప్రదర్శనలు అద్భుతం, అతనిని తప్పించడం కష్టం. అదనంగా బౌలింగ్‌లో కూడా సహకరిస్తాడు” అని వ్యాఖ్యానించారు. కొంతకాలం ‘స్టార్ట్-స్టాప్’ తరహాలో సాగిన శాంసన్ కెరీర్.. గౌతమ్ గంభీర్ హెడ్ కోచ్‌గా వచ్చిన తర్వాత మలుపు తిరిగింది. హైదరాబాద్‌లో బంగ్లాదేశ్‌పై తన తొలి టీ20 శతకాన్ని బాదిన అతను, ఆ తర్వాత దక్షిణాఫ్రికా పర్యటనలో మరో రెండు శతకాలు సాధించాడు. అయితే, ఇంగ్లండ్‌తో జరిగిన సిరీస్‌లో ఆర్చర్, అట్‌కిన్సన్ వేసిన షార్ట్‌బాల్ బౌలింగ్‌ను ఎదుర్కోవడంలో ఇబ్బందిపడ్డాడు. ప్రస్తుతం కేరళ క్రికెట్ లీగ్‌లో ధాటిగా రాణిస్తున్న సంజూ శాంసన్ , తన ప్రదర్శనతో ఆసియా కప్ తుది జట్టులో స్థానం కోసం ప్రయత్నిస్తున్నాడు.