వసీం అక్రమ్ లాగే.. బుమ్రా కూడా! ఆసియా కప్ ముందు బీసీసీఐకి హెచ్చరిక

వరల్డ్ నెంబర్ వన్ బౌలర్ జస్ప్రీత్ బుమ్రా ఇప్పుడు వర్క్‌లోడ్ మేనేజ్‌మెంట్‌తో సతమతమవుతున్నాడు. టీమిండియాకు అతి పెద్ద ఆస్తి అయిన బుమ్రాపై ప్రపంచ స్థాయి బౌలర్లు ప్రశంసలు కురిపిస్తుంటే.. అన్ని మ్యాచ్‌లు ఆడటం లేదంటూ కొందరు నెటిజన్లు విమర్శలు చేస్తున్నారు. ఈ క్రమంలో శ్రీలంక మాజీ పేసర్ ఫర్వీజ్ మహరూఫ్ బీసీసీఐని హెచ్చరించాడు.

భారత స్టార్ పేసర్ జస్ప్రీత్ బుమ్రాపై శ్రీలంక మాజీ పేసర్ ఫర్వీజ్ మహరూఫ్ ప్రశంసలు కురిపించాడు. ప్రపంచ క్రికెట్‌లో ప్రస్తుతం అన్ని ఫార్మాట్లలోనూ అతడే అత్యుత్తమ బౌలర్ అని కొనియాడాడు. గత కొన్నేళ్లుగా బుమ్రా తన బౌలింగ్‌లో విప్లవాత్మక మార్పులు తెచ్చి, ఒక పూర్తి స్థాయి పేసర్‌గా మారాడని అభిప్రాయపడ్డాడు.

బుమ్రా ఇప్పటికే 2024 టీ20 ప్రపంచ కప్ విజయంలో కీలక పాత్ర పోషించాడు. ఇప్పుడు 2025 ఆసియా కప్ జట్టులో కూడా ఎంపికయ్యాడు. టీ20లో ప్రపంచ కప్ తర్వాత మొదటి మ్యాచ్ ఇదే. గత ఏడాది నుంచి వర్క్‌లోడ్ మేనేజ్‌మెంట్ కారణంగా సెలెక్టర్లు ఆయనను ఆ ఫార్మాట్‌లో దూరంగా ఉంచారు.

“బుమ్రా యాక్షన్, అతడి డెవలప్‌మెంట్ వల్లే ఇంత ఎఫెక్టివ్ బౌలర్ అయ్యాడు. నేను అతడిని మొదటిసారి 2013 - 14లో ఛాంపియన్స్ లీగ్‌లో ఎదుర్కొన్నాను. అప్పటి బుమ్రా, ఇప్పటి బుమ్రా మధ్య తేడా చాలా ఉంది. అప్పట్లో కేవలం ఇన్‌స్వింగ్ మాత్రమే వేస్తాడు. కానీ ఇప్పుడు అవుట్‌స్వింగ్ కూడా సమర్థవంతంగా చేస్తాడు. ప్రపంచవ్యాప్తంగా 90 శాతం బ్యాటర్లు ఎవరు కఠినమైన బౌలర్ అని చెబుతారో.. జస్ప్రీత్ బుమ్రా పేరునే చెబుతారు. ఇదే సమయంలో 90లో వసీం అక్రం పేరు ఎలా ఉండేదో, అదే స్థాయిలో బుమ్రా ఇప్పుడు ఉన్నాడు” అని అభిప్రాయపడ్డాడు.

కొంతకాలంగా బుమ్రా తరచూ గాయాలబారిన పడుతుండటంపై మహరూఫ్ బీసీసీఐకి సలహాతో హెచ్చరిక కూడా చేశాడు. బుమ్రా లాంటి ఆటగాడు మళ్లీ మళ్లీ రాడని, అతడిని ఎక్కువ కాలం క్రికెట్ ఆడేలా వర్క్‌లోడ్‌ను జాగ్రత్తగా మేనేజ్ చేయాలంటూ చెప్పాడు. ఒక బంతి వేయడానికి ఫాస్ట్ బౌలర్ శరీరంపై తన బరువుకన్నా మూడు రెట్లు ఎక్కువ ప్రెజర్ పడుతుందని.. అందుకే గాయాలు తప్పవంటూ హెచ్చరించాడు.

“ఆస్ట్రేలియాలో బుమ్రా ఐదు టెస్టులు ఆడాడు. అనేక ఓవర్లు వేసి జట్టుకు సేవ చేశాడు. కానీ అదే శ్రమ సిడ్నీలో గాయానికి కారణమైంది. మీరు ఎంత ఫిట్‌గా ఉన్నా, ఎంత జిమ్ చేసినా, ఫాస్ట్ బౌలింగ్‌లో గాయాలు తప్పవు. ఇది క్రికెట్‌లోనే కఠినమైన పని. అభిమానిగా నేను బుమ్రా ఇంకా మెరుగై, జట్టుకి ఎక్కువ సంవత్సరాలు సేవ చేయాలని కోరుకుంటున్నాను. అందుకే అతడి వర్క్‌లోడ్ మేనేజ్‌మెంట్ అత్యవసరం” అని మహరూఫ్ బీసీసీఐకి సలహా ఇచ్చాడు.