రోహిత్‌ శర్మను తప్పించేందుకు బీసీసీఐ ప్లాన్.. మనోజ్ తివారీ

టీమిండియా ఆటగాళ్ల ఫిట్‌నెస్ నిర్ధారించేందుకు ప్రస్తుతం బీసీసీఐ యోయో టెస్ట్ నిర్వహిస్తున్న విషయం తెలిసిందే. అయితే తాజాగా ఇందులో మరో టెస్ట్‌ను చేర్చినట్లు తెలుస్తోంది. రగ్బీ ఆటగాళ్ల ఫిట్‌నెస్‌ను నిర్ధారించేందుకు చేసే బ్రాంకో టెస్ట్ ‌ను త్వరలో నిర్వహించనున్నట్లు సమాచారం. యోయో టెస్ట్‌తో పోలిస్తే.. ఇది కాస్త కఠినమైనదే. అయితే భారత ఆటగాళ్లలో ఫిట్‌నెస్‌ ప్రమాణాలను పెంచడం కోసం స్ట్రెంగ్త్‌ అండ్‌ కండిషనింగ్‌ కోచ్‌ అడ్రియన్‌ లి రాక్స్‌ ఈ పరీక్షను జట్టుకు పరిచయం చేశాడు! ఇకపై ఆటగాడు పూర్తి ఫిట్‌గా ఉన్నాడని ధ్రువీకరించాలంటే అతడు యోయోతో పాటు బ్రాంకో టెస్ట్ కూడా పాస్ కావాల్సిందే!

బీసీసీఐ బ్రాంకో టెస్ట్‌ను అమల్లోకి తేనుండటంపై టీమిండియా మాజీ ప్లేయర్ మనోజ్ తివారీ సంచలన కామెంట్స్ చేశాడు. టీమిండియా వన్డే టీమ్ కెప్టెన్ రోహిత్ శర్మను జట్టు నుంచి తప్పించడానికే ఈ టెస్ట్‌ను తీసుకొచ్చారని అతడు ఆరోపించాడు. రోహిత్ శర్మ ఈ టెస్ట్‌లో పాస్ కావడం చాలా కష్టమని.. మనోజ్ తివారీ ఓ ఇంటర్వ్యూలో చెప్పుకొచ్చాడు.

“నాకు తెలిసి వన్డే ప్రపంచకప్ 2027 ప్లాన్స్‌ నుంచి విరాట్ కోహ్లీని పక్కన పెట్టడం అంత ఈజీ కాదు. కానీ వారు (బీసీసీఐని ఉద్దేశించి) రోహిత్ శర్మను జట్టు నుంచి తప్పించాలని అనుకుంటున్నారు. ప్రస్తుతం భారత క్రికెట్‌లో ఏం జరుగుతుందోనని నేను పరిశీలిస్తున్నా” అని మనోజ్‌ తివారీ అన్నాడు.

“బ్రాంకో టెస్ట్‌ కఠినమైన ఫిట్‌నెస్‌ పరీక్షల్లో ఒకటి. అయితే ఈ టెస్ట్‌ను ఇప్పుడే ఎందుకు ప్రవేశపెట్టారు? కొత్త హెడ్‌కోచ్‌ ఈ పరీక్షను తాను బాధ్యతలు చేపట్టినప్పటి నుంచే ఎందుకు అమలు చేయలేదు. అసలు ఇది ఎవరి ఆలోచన? దీన్ని ఎవరు ప్రవేశపెట్టారు? కొన్ని రోజుల క్రితం ఈ బ్రాంకో టెస్ట్‌ను ఎవరు అమలు చేశారు? ఇకపై రోహిత్ శర్మ తన ఫిట్‌నెస్‌పై ఫోకస్ చేయకపోతే.. జట్టులో ఉండటం కష్టమే. హిట్‌మ్యాన్ ఈ టెస్ట్‌లో పాస్ కావడం అంత ఈజీ కాదు. దీంతో అతడిని వన్డే టీమ్‌ నుంచి తప్పిస్తారు” అని మనోజ్ తివారీ ఆరోపించాడు.

అసలేంటీ బ్రాంకో టెస్ట్‌?

ఇది పరుగు పరీక్ష. బ్రాంకో టెస్టులో ఆటగాళ్లు వరుసగా 20 మీటర్లు, 40 మీటర్లు, 60 మీటర్ల దూరంలో షటిల్ రన్స్ చేయాలి. ఒక ఆటగాడు ఈ సిరీస్‌ ఏకధాటిగా 5 సార్లు పూర్తి చేయాల్సి ఉంటుంది. ఆటగాడు విరామం లేకుండా 6 నిమిషాల వ్యవధిలో మొత్తంగా 1200 మీటర్ల దూరం పరుగెత్తాల్సి ఉంటుంది. ఎక్కువగా రగ్బీ ఆటగాళ్ల ఫిట్‌నెస్‌ను నిర్ణయించేందుకు ఈ పరీక్షను ఉపయోగిస్తారు.