మార్కెట్లోకి శాంసంగ్ గెలాక్సీ A17 5G స్మార్ట్‌ఫోన్

ప్రముఖ ఎలక్ట్రానిక్స్ దిగ్గజం శాంసంగ్, భారత స్మార్ట్‌ఫోన్ మార్కెట్లో తన ఏ సిరీస్‌లో మరో కొత్త మోడల్‌ను ప్రవేశపెట్టింది. ‘గెలాక్సీ ఏ17 5జీ’ పేరుతో విడుదలైన ఈ ఫోన్, ఆకర్షణీయమైన ఫీచర్లు, దీర్ఘకాలిక సాఫ్ట్‌వేర్ మద్దతుతో మధ్యతరగతి వినియోగదారులను లక్ష్యంగా చేసుకుంది. రూ. 18,999 ప్రారంభ ధరతో అందుబాటులోకి వచ్చిన ఈ ఫోన్, ముఖ్యంగా ఆరు సంవత్సరాల పాటు సాఫ్ట్‌వేర్ అప్‌డేట్స్ ఇస్తామని కంపెనీ ప్రకటించడం ఈ సెగ్మెంట్‌లో ఒక కీలక పరిణామంగా చెప్పవచ్చు.శాంసంగ్ గెలాక్సీ ఏ17 5జీ స్మార్ట్‌ఫోన్ అనేక అడ్వాన్స్‌డ్ ఫీచర్లతో వస్తోంది. ఇందులో ‘సర్కిల్ టు సెర్చ్’ అనే ఏఐ ఫీచర్ ప్రత్యేక ఆకర్షణగా నిలుస్తోంది. దీని ద్వారా వినియోగదారులు స్క్రీన్‌పై ఉన్న ఏదైనా వస్తువు లేదా టెక్స్ట్‌ను వేలితో గీసి, దాని గురించి తక్షణమే సమాచారం తెలుసుకోవచ్చు. దీనితో పాటు ‘జెమిని లైవ్’ ఫీచర్ ద్వారా వాయిస్, టెక్స్ట్ లేదా విజువల్ ఇన్‌పుట్‌లతో రియల్ టైమ్ సమాధానాలు పొందవచ్చని సంస్థ తెలిపింది. ఈ ఫీచర్లు మల్టీ టాస్కింగ్‌ను మరింత సులభతరం చేస్తాయని టెక్ నిపుణులు భావిస్తున్నారు.కెమెరా విషయానికొస్తే, ఈ ఫోన్‌లో ఆప్టికల్ ఇమేజ్ స్టెబిలైజేషన్ (ఓఐఎస్) టెక్నాలజీతో కూడిన 50 మెగాపిక్సెల్ ప్రధాన కెమెరాను అమర్చారు. దీనివల్ల కదులుతున్నప్పుడు కూడా బ్లర్ లేని స్పష్టమైన ఫోటోలు, వీడియోలు తీయడం సాధ్యమవుతుంది. దీనికి అదనంగా, గ్రూప్ ఫోటోల కోసం 5 ఎంపీ అల్ట్రా-వైడ్ లెన్స్, సమీప చిత్రాల కోసం 2 ఎంపీ మ్యాక్రో లెన్స్, నాణ్యమైన సెల్ఫీల కోసం 13 ఎంపీ ఫ్రంట్ కెమెరా ఉన్నాయి. ఇక డిజైన్ పరంగా, ఇది కేవలం 7.5 మిల్లీమీటర్ల మందంతో ఏ సిరీస్‌లోనే అత్యంత సన్నని ఫోన్‌గా నిలుస్తోంది.ఈ స్మార్ట్‌ఫోన్‌లో 5000mAh సామర్థ్యం గల బ్యాటరీని అమర్చారు. ఇది 25W ఫాస్ట్ ఛార్జింగ్‌కు సపోర్ట్ చేస్తుంది. ఒక్కసారి ఛార్జ్ చేస్తే రోజంతా బ్యాటరీ లైఫ్ వస్తుందని కంపెనీ పేర్కొంది. స్టోరేజ్ కోసం 2 టీబీ వరకు మెమొరీని పెంచుకునే సౌకర్యం కల్పించారు. ఫోన్ మన్నిక కోసం ముందు భాగంలో కార్నింగ్ గొరిల్లా గ్లాస్ విక్టస్ ప్రొటెక్షన్, నీటి తుంపరల నుంచి రక్షణ కోసం ఐపీ54 రేటింగ్ ఇచ్చారు. ఈ ఫోన్ సామ్‌సంగ్ అధికారిక వెబ్‌సైట్, ఇతర ఆన్‌లైన్, ఆఫ్‌లైన్ స్టోర్లలో అందుబాటులో ఉంది. వినియోగదారుల కోసం క్యాష్‌బ్యాక్, జీరో డౌన్ పేమెంట్ వంటి ఫైనాన్సింగ్ ఆప్షన్లను కూడా అందిస్తున్నట్లు కంపెనీ వెల్లడించింది