సుంకాల జాబితా నుంచి బంగారం, యురేనియం ఔట్,,,టారిఫ్ వార్‌పై ట్రంప్ యూ-టర్న్

 అగ్రరాజ్యం అమెరికా అధ్యక్షుడు డొనాల్డ్ ట్రంప్ తన వాణిజ్య విధానంలో కొన్ని కీలక మార్పులు తీసుకొచ్చారు. శుక్రవారం రోజు ఇందుకు సంబంధించిన ఎగ్జిక్యూటివ్ ఆర్డర్‌పై సంతకం కూడా చేశారు. దీని ప్రకారం గ్రాఫైట్, టంగ్‌స్టెన్, యురేనియం, బంగారం సహా ఇతర లోహాలను దేశం ఆధారిత సుంకాల నుంచి మినహాయించారు. అయితే సిలికాన్ ఉత్పత్తులకు మాత్రం సుంకాలు విధించారు. ఈ మార్పులు సోమవారం నుంచి అమల్లోకి రాబోతున్నాయి. ట్రంప్ తీసుకున్న ఈ నిర్ణయం వల్ల అమెరికా, ఇతర దేశాల మధ్య వాణిజ్య ఒప్పందాల అమలు వేగవంతం కానుంది. ముఖ్యంగా విమాన విడి భాగాలు, జెనెరిక్ ఔషధాలు, దేశంలో సహజంగా ఉత్పత్తి కాని సుగంధ ద్రవ్యాలు, కాఫీ, కొన్ని అరుదైన లోహాలపై సుంకాలను తొలగించడం సులభతరం అవుతుంది.

ట్రంప్ గతంలో ప్రకటించిన "అన్ని దిగుమతులపై 10 శాతం యూనివర్సల్ సుంకం" అనే విధానానికి ఈ నిర్ణయం పూర్తి భిన్నంగా ఉంది. ఈ మినహాయింపు జాతీయ భద్రత, ఆర్థిక అవసరాల దృష్ట్యా తీసుకున్నామని ఆయన కార్యాలయం తెలిపింది. ముఖ్యంగా యుఎస్ కస్టమ్స్ అండ్ బోర్డర్ ప్రొటెక్షన్ కొన్ని వారాల క్రితం బంగారం దిగుమతులపై సుంకాలు విధిస్తామని పేర్కొనడంతో వ్యాపారుల్లో తీవ్ర గందరగోళం నెలకొంది. ఇప్పుడు ఆ సమస్యకు పరిష్కారంగా ఈ మినహాయింపు తీసుకు వస్తున్నారు. ఈ మార్పులు "జాతీయ అత్యవసర పరిస్థితిని ఎదుర్కోవడానికి అవసరం" అని ట్రంప్ ఎగ్జిక్యూటివ్ ఆర్డర్‌లో పేర్కొన్నారు.

ట్రంప్ తీసుకున్న ఈ తాజా నిర్ణయం వల్ల యూఎస్ ట్రేడ్ రిప్రజెంటేటివ్ మరియు కామర్స్ డిపార్ట్‌మెంట్‌లకు ఇతర దేశాలతో కుదుర్చుకున్న ఒప్పందాలను అమలు చేయడానికి అధికారం లభిస్తుంది. ఉదాహరణకు యూరోపియన్ యూనియన్, జపాన్, దక్షిణ కొరియాతో ట్రంప్ కుదుర్చుకున్న ఒప్పందాలు ఇకపై అధ్యక్షుడి సొంత ఆదేశాల అవసరం లేకుండానే అమలు అవుతాయి.

ట్రంప్ తన వాణిజ్య విధానంలో అసమానతలను సరిదిద్దడానికి సుంకాలనే ప్రధాన అస్త్రంగా వాడుతున్నారు. గతంలో ఆయన డజన్ల కొద్దీ దేశాలపై సుంకాలు విధించారు. అయితే ఇప్పుడు కొన్ని కీలక పదార్థాలకు మినహాయింపు ఇవ్వడం ఆయన విధానంలో వస్తున్న కొత్త మార్పులను సూచిస్తోంది. ఏరోస్పేస్, కన్స్యూమర్ ఎలక్ట్రానిక్స్, వైద్య పరికరాలు, ఇతర సాంకేతికతలలో ఉపయోగించే కీలక ఖనిజాలపై పరస్పర సుంకాలు కూడా ఎత్తివేయబడ్డాయి. అంతేకాకుండా సిలికాన్ ఉత్పత్తులతో పాటు రెసిన్, అల్యూమినియం హైడ్రాక్సైడ్‌కు కూడా ఈ సుంకాలు విస్తరించబడ్డాయి.