15 ఏళ్ల కుర్రాడికి సెయింట్ హోదా.. అసలెవరీ గాడ్స్ ఇన్‌ఫ్లూయెన్సర్

గాడ్స్ ఇన్‌ఫ్లూయెన్సర్‌గా పేరొందిన కంప్యూటర్ నిష్ణాతుడు, దివంగత కార్లోస్ అక్యూటిస్‌కు ఎవరూ ఊహించని గొప్ప హోదా లభించింది. ముఖ్యంగా కేవలం 15 ఏళ్ల వయసులోనే ప్రాణాలు కోల్పోయిన ఈయనకు సెయింట్‌ హోదా దక్కగా.. చరిత్రలోనే మొట్టమొదటి మిలీనియల్‌గా చరిత్రకెక్కారు. ఇటలీ రోమ్‌లోని వాటికన్ సిటీలో పోప్ లియో నిర్వహించిన ఒక ప్రత్యేక కార్యక్రమంలో.. దాదాపు 80 వేల మంది సమక్షంలో ఆయనను సెయింట్‌గా ప్రకటించారు. కార్లో అక్యూటిస్‌కు ఈ హోదా లభించడం ప్రపంచవ్యాప్తంగా యువతలో, ముఖ్యంగా క్రైస్తవ సమాజంలో ఒక కొత్త ఉత్సాహాన్ని నింపింది. సాంకేతిక పరిజ్ఞానాన్ని దైవ కార్యాల కోసం ఉపయోగించిన ఆయన జీవితం ఎందరికో స్ఫూర్తిగా నిలిచింది.

1991 మే 3వ తేదీన లండన్‌లో ఓ ధనిక క్యాథలిక్ కుటుంబంలో కార్లోస్ జన్మించారు. అయితే ఆయన పుట్టిన కొంత కాలానికే అతడి కుటుంబం తమ స్వదేశమైన ఇటలీకి తిరిగి వెళ్లిపోయింది. మొదటి నుంచి ఆయనకు కంప్యూటర్ సైన్స్ మీద మక్కువ ఎక్కువ ఉండగా.. కార్లో అక్యూటిస్ అతిచిన్న వయసులోనే అసాధారణమైన కంప్యూటర్ జీనియస్‌గా పేరు పొందారు. సాధారణంగా కళాశాల విద్యార్థులు చదివే కంప్యూటర్ ప్రోగ్రామింగ్ పుస్తకాలను ఆయన చిన్న వయసులోనే చదివి, అర్థం చేసుకుని అందరి చేత ఔరా అనిపించారు.

అయితే అపారమైన ఈ సాంకేతిక నైపుణ్యాన్ని ఆయన తన సొంత అవసరాల కోసం కాకుండా.. దైవ సందేశాన్ని వ్యాప్తి చేయడానికి ఉపయోగించారు. ఇంటర్నెట్‌ను దేవుని వాక్కును పంచుకోవడానికి శక్తివంతమైన సాధనంగా మార్చుకుని.. అనేక భాషల్లో వెబ్‌సైట్లను నడిపారు. అందులో కేవలం దేవుడి గురించి మాత్రమే చెప్పేవారు. ఇలా ఆయనకు గాడ్స్ ఇన్‌ఫ్లూయెన్సర్ అనే పేరు వచ్చింది.

సెయింట్ అనేది చర్చి ఇచ్చే అత్యున్నత హోదా. ఒక వ్యక్తి పవిత్రమైన జీవితాన్ని గడిపి, ప్రస్తుతం స్వర్గంలో దేవుని వద్ద ఉన్నారని చర్చి విశ్వసిస్తే.. ఆ వ్యక్తిని సెయింట్‌గా ప్రకటిస్తారు. ఈ ప్రక్రియలో ఆ వ్యక్తి జీవితం, చేసిన పనులు, దైవత్వం పట్ల వారికున్న నమ్మకం వంటి అనేక అంశాలను పరిగణనలోకి తీసుకుంటారు. కార్లో అక్యూటిస్ తన జీవితంలో ప్రదర్శించిన అద్భుతమైన విశ్వాసం, నిస్వార్థ సేవ, తన వ్యాధులను ఎదుర్కొన్న తీరును పరిగణనలోకి తీసుకుని ఈ హోదా కల్పించారు.

2006 అక్టోబరులో లుకేమియా అనే భయంకరమైన వ్యాధితో కార్లో అక్యూటిస్ తన 15వ ఏటనే మరణించారు. అక్యూటిస్ చిన్న వయసులో మరణించినా.. ఆయన జీవితం ఆ తర్వాత ఎంతోమందికి స్ఫూర్తిగా నిలిచింది. యువతలో డిజిటల్ ప్రపంచం పట్ల ఉన్న ఆసక్తిని దైవిక మార్గంలో ఎలా ఉపయోగించవచ్చో ఆయన నిరూపించగా.. అనేక మంది ఆయన్ను ఫాలో అవుతున్నారు. ముక్యుంగా అక్యూటిస్ జీవితం, పనులు యువతకు కొత్త ఆశను, ప్రేరణను ఇస్తున్నాయి.