దొరికినవి రూ. 80 వేలు, పోగొట్టుకున్నది రూ. 2 లక్షలు: దొంగల ప్లాన్ రివర్స్

సాధారణంగా దొంగలు దొంగతనం చేసిన తర్వాత పారిపోయేందుకు ముందుగానే అన్ని ఏర్పాట్లు చేసుకుంటారు. బైకులో, ఇతర వాహనాలో వెంట తెచ్చుకుని మరీపారిపోయేందుకు సిద్ధంగా ఉంటారు. ఒకరో ఇద్దరో డబ్బు, నగలు, విలువైన వస్తువులు చోరీ చేస్తే మిగతా వారు వాహనం స్టార్ట్ చేసి పెడతారు. వారు వచ్చి ఎక్కిన వెంటనే పారిపోతుంటారు. ఇలాంటివి సినిమాలతో పాటు నిజ జీవితంలోనూ చాలానే చూశాం. కానీ మధ్య ప్రదేశ్‌లో ఇందుకు పూర్తి భిన్నంగా జరిగిందో దొంగతనం. ఓ వ్యాపారి నుంచి రూ.80 వేలు దొంగిలించిన ముగ్గురు చోరులు.. వారు వచ్చిన ఖరీదైన ద్విచక్రహహనాన్ని అక్కడే వదిలేసి కాలినడకన వెళ్లిపోయారు. ముఖ్యంగా 80 వేల రూపాయల కోసం 2 లక్షల బైకును పొగోట్టుకోవడంతో అంతా నవ్వుకుంటున్నారు.

ఈ ఘటన మధ్యప్రదేశ్‌ భోపాల్‌లోని అయోధ్య నగర్లో గురువారం రాత్రి జరిగింది. నీరజ్ అనే కిరాణా వ్యాపారి తన షాపును మూసివేసి రూ. 80 వేల నగదు ఉన్న బ్యాగ్‌తో ఇంటికి తిరిగి వెళ్తున్నారు. రాత్రి సుమారు 11 గంటల సమయంలో ముగ్గురు దొంగలు ఒక ఖరీదైన బైక్‌పై వచ్చి అతడిని అడ్డగించారు. వారిలో ఒకరు నీరజ్ చేతిలోని బ్యాగ్‌ను లాక్కోవడానికి ప్రయత్నించగా.. నీరజ్ ప్రతిఘటించారు. ఈ పెనుగులాటలో నీరజ్ స్కూటర్ కింద పడిపోయింది. ఈ క్రమంలో దొంగలు చాకచక్యంగా నగదు బ్యాగ్‌ను లాక్కోగలిగారు.

అయితే దొంగలు బ్యాగ్‌తో పారిపోయేందుకు సిద్ధమయ్యేలోపే వారికి ఊహించని షాక్ తగిలింది. వారు వచ్చిన బైక్ ఎంత ప్రయత్నించినా స్టార్ట్ కాలేదు. దీంతో వారికి భయం పట్టుకుంది. ఇంతలో నీరజ్ కేకలు వేయడంతో స్థానికులు అప్రమత్తమై ఆ వైపుగా రావడం మొదలు పెట్టారు. పరిస్థితి చేయి దాటిపోతోందని గ్రహించిన దొంగలు.. ఆందోళనతో దొంగలించిన బ్యాగ్‌ను తీసుకుని బైకును వదిలేసి పారిపోయారు. దీంతో నీరజ్ వారి బైకును తీసుకుని పోలీసులకు ఫిర్యాదు చేశాడు. కేసు నమోదు చేసుకున్న పోలీసులు బండి నెంబర్ ఆధారంగా దొంగలను గుర్తించారు.

అయితే త్వరలోనే వారిని పట్టుకుంటారని పోలీసులు చెబుతున్నారు. ఒక సాధారణ దొంగతనం కేసులో ఇలాంటి విచిత్రమైన మలుపు రావడం చాలా అరుదు కాగా.. అంతా ఆశ్చర్యపోతున్నారు. ముఖ్యంగా ఈ వార్త నెట్టింట వైరల్ కాగా.. అంతా బాగైంది దొంగలకు అంటూ కామెంట్లు చేస్తున్నారు. దొంగలంటే ఇలా ఉండాలంటూ మరికొందరు చెప్పుకొస్తున్నారు. మరి మీకేమనిపిస్తుందో కామెంట్ల రూపంలో తెలియజేయండి.