లంచం డబ్బులను గాల్లోకి విసిరిన పోలీస్ ఆఫీసర్.. ఎగబడి మరీ ఎత్తుకెళ్లిన ప్రజలు

దేశ రాజధాని ఢిల్లీలో లంచం తీసుకుంటున్న ఒక పోలీస్ అధికారిని అరెస్ట్ చేసే క్రమంలో ఒక విచిత్రమైన సంఘటన చోటు చేసుకుంది. లంచం డబ్బును సాక్ష్యంగా చూపకుండా ఉండేందుకు ఆ అధికారి డబ్బును గాల్లోకి విసిరేశారు. ఆసమయంలోనే అటుగా వెళ్తున్న ప్రజలు విషయం గుర్తించి.. డబ్బులు పట్టుకోవడానికి ఎగబడ్డారు. క్షణాల్లోనే ఆ డబ్బు మొత్తాన్ని వెతికి పట్టుకుని పరారయ్యారు. ప్రస్తుతం ఇందుకు సంబంధించిన వీడియోలు, ఫొటోలు వైరల్ అవుతున్నాయి.

ఢిల్లీలోని హౌజ్ ఖాజీ పోలీస్ స్టేషన్‌లో అసిస్టెంట్ సబ్-ఇన్‌స్పెక్టర్ (ఏఎస్ఐ)గా పని చేస్తున్న రాకేశ్ కుమార్ ఓ తప్పుడు కేసులో తనను ఇరిస్తానని బెదిరిస్తున్నాడని ఓ వ్యక్తి విజిలెన్స్ అధికారులకు ఫిర్యాదు చేశాడు. దీనిపై కేసు నమోదు చేయకుండా తనకు లంచం కూడా కావాలని అడిగాడని చెప్పాడు. మొత్తంగా 15 వేలు ఇస్తేనే తనను వదిలేస్తానన్నాడని పేర్కొన్నాడు. దీంతో పోలీసు అధికారిని రెడ్ హ్యాండెడ్‌గా పట్టుకోవాలనే పథకంతో అధికారులు రసాయన పొడిని చల్లిన నోట్లను ఇచ్చారు. అలాగే లంచం ఇవ్వడానికి ముందే అధికారులు అక్కడకు చేరుకున్నారు.

 ముఖ్యంగా బాధితుడు నేరుగా పోలీస్ స్టేషన్‌లోనే ఏఎస్ఐకి రూ.15 వేల లంచం ఇచ్చాడు. అయితే అప్పటికే అవినీతి నిరోధక శాఖ అధికారులు తనను చుట్టుముట్టారని గమనించిన ఏఎస్ఏ వెంటనే సాక్ష్యాన్ని మాయం చేయాలనుకున్నాడు. అందుకోసం తాను లంచంగా తీసుకున్న డబ్బులు మొత్తాన్ని గాల్లోకి విసిరాడు. అయితే అప్పటికే ఎక్కువ మంది ప్రజలు అక్కడ ఉండడంతో.. నోట్లు విసరగానే ఎగబడ్డారు. దొరికిన కాడికి దోచుకుని అక్కడి నుంచి పరారయ్యారు. వారిని వారించి అధికారులు రూ.10 వేలు స్వాధీనం చేసుకున్నప్పటికీ 5 వేల రూపాయలను తీసుకుని జనం ఉడాయించారు. అనంతరం అధికారులు రాకేశ్ కుమార్‌ను అదుపులోకి తీసుకున్నారు. కేసు నమోదు చేసి దర్యాప్తు చేస్తున్నారు.

ప్రస్తుతం ఈ కేసు విచారణ కొనసాగుతోంది. భవిష్యత్తులో ఇలాంటి సంఘటనలు జరగకుండా నివారించడానికి పోలీసులు మరింత కఠినంగా వ్యవహరించాలని, అవినీతికి పాల్పడే అధికారులపై నిఘా పెంచాలని ప్రజలు కోరుతున్నారు. ఈ ఘటన కేవలం ఒక లంచం కేసు మాత్రమే కాదు, ఇది సమాజంలోని నైతిక విలువలకు అద్దం పడుతోంది.