అమెరికాలో తమ రాయబారిపై వేటు వేసిన బ్రిటన్ ప్రధాని

బ్రిటన్ ప్రభుత్వం అమెరికాకు నియమించిన రాయబారి పీటర్ మాండెల్సన్‌పై వేటు వేసింది. రాయబారిగా నియమించిన కొద్ది రోజులకే ఈ నిర్ణయం తీసుకోవడం చర్చనీయాంశంగా మారింది. కొత్తగా విడుదలైన ఈ-మెయిల్స్, ఇతర సంబంధిత ఉత్తరప్రత్యుత్తరాలలో రాయబారికి నేరస్తుడు, ఆర్థికవేత్త జెఫ్రీ ఎప్‌స్టీన్‌తో ఉన్న సాన్నిహిత్యం బయటపడింది. దీంతో బ్రిటన్ ప్రభుత్వం ఈ నిర్ణయం తీసుకుంది.

"పీటర్ మాండెల్సన్‌కు జెఫ్రీ ఎప్‌స్టీన్‌తో ఉన్న సంబంధం, ఆయన నియామకం సమయంలో తెలిసినదాని కంటే చాలా భిన్నంగా ఉంది" అని బ్రిటన్ విదేశాంగ కార్యాలయం ఒక ప్రకటనలో పేర్కొంది. మాండెల్సన్ గురించి వెలువడిన ఈ కొత్త నిజాలు, బ్రిటన్ ప్రధాని కీర్ స్టార్మర్‌కు తీవ్ర ఇబ్బందులను తెచ్చిపెట్టాయి. అంతేకాకుండా వచ్చే వారం లండన్‌ను సందర్శించనున్న అధ్యక్షుడు డొనాల్డ్ ట్రంప్ పర్యటనపై కూడా ఇది నీలినీడలు కమ్మేసింది. ట్రంప్.. మాండెల్సన్‌ను గతంలో ప్రశంసించారు. అంతేకాకుండా ఈ వారం వైట్‌హౌస్‌లో మాండెల్సన్‌తో సమావేశం కూడా అయ్యారు. ఇది జరిగిన కొంత కాలానికే ఆయనపై వేటు పడడం గమనార్హం.

హౌస్ ఓవర్‌సైట్ కమిటీలోని డెమోక్రాట్లు విడుదల చేసిన పత్రాల తర్వాత, ట్రంప్‌కు ఎప్‌స్టీన్‌తో ఉన్న సంబంధాలపై కూడా పునఃసమీక్ష జరుగుతోంది. అయితే ట్రంప్ తన 50వ పుట్టినరోజుకు.. ఎప్‌స్టీన్‌కు అసభ్యకరమైన శుభాకాంక్షలు పంపించారన్న ఆరోపణలను ఖండించారు. ఎప్‌స్టీన్‌తో ఉన్న తన సంబంధాలపై డెమోక్రటిక్ కుట్ర అని ఆరోపించారు. కానీ బ్రిటన్ ప్రభుత్వం ఈ విషయాలను చాలా సీరియస్‌గా తీసుకుంది. దీంతో ఎప్‌స్టీన్‌తో ఉన్న సంబంధాల కారణంగా పదవి పోగొట్టుకున్న ప్రముఖ రాజకీయ నాయకులలో మాండెల్సన్ ఒకరుగా నిలిచారు.

బ్రిటన్ ప్రభుత్వం 2008లో మాండెల్సన్ ఎప్‌స్టీన్‌కు పంపిన ఒక ఈ-మెయిల్‌ను ప్రత్యేకంగా ప్రస్తావించింది. అందులో మాండెల్సన్ ఒక మైనర్‌పై లైంగిక వేధింపుల కోసం ఎప్‌స్టీన్‌కు శిక్ష పడటంపై విచారం వ్యక్తం చేశారు. "నేను నిన్ను చాలా గొప్పగా చూస్తాను. నీకు ఇలా జరగడంపై నేను నిస్సహాయంగా, ఆగ్రహంగా ఉన్నాను. నాకైతే ఏమీ అర్థం కావడం లేదు. బ్రిటన్‌లో ఇలాంటివి జరగవు" అని మాండెల్సన్ ఆ ఈ-మెయిల్‌లో పేర్కొన్నారు.

ఎప్‌స్టీన్ జైలు శిక్ష అనుభవిస్తున్న సమయంలో కూడా మాండెల్సన్ అతని పట్ల సంఘీభావాన్ని వ్యక్తం చేయడం ఆయన పదవికి అనర్హుడిని చేసిందని విదేశాంగ కార్యాలయం తెలిపింది. మాండెల్సన్‌కు ఎప్‌స్టీన్‌తో ఉన్న స్నేహం రహస్యం కాదని, గత డిసెంబర్‌లో అతని నియామకం ప్రకటించే ముందు అధికార యంత్రాంగం అతన్ని పరిశీలించిందని ప్రభుత్వ అధికారులు తెలిపారు. కానీ ఎప్‌స్టీన్‌కు శిక్ష పడిన తర్వాత కూడా అతనికి అండగా నిలిచినట్లు కొత్తగా వెల్లడైన ఈ-మెయిళ్లతో వారికి షాక్ తగిలింది.