ఏపీలో భారీగా ఐపీఎస్‌ల బదిలీలు.. జిల్లాలకు కొత్త ఎస్పీలు

ఆంధ్రప్రదేశ్ ప్రభుత్వం మరో కీలక నిర్ణయం తీసుకుంది. ఇటీవల ఐఏఎస్ అధికారుల బదిలీలు చేపట్టిన ప్రభుత్వం.. తాజాగా శనివారం రోజున ఐపీఎస్ అధికారుల బదిలీలు చేపట్టింది. రాష్ట్రంలోని 14 జిల్లాలకు కొత్త ఎస్పీలను నియమించింది. ఐపీఎస్ అధికారుల బదిలీలపై సీఎం చంద్రబాబు నాయుడు సుదీర్ఘ కసరత్తు పూర్తైన అనంతరం.. శనివారం ఐపీఎస్ అధికారుల బదిలీలపై ఉత్తర్వులు జారీ అయ్యాయి. డీజీపీ హరీష్ కుమార్ గుప్తా ఈ మేరకు ఉత్తర్వులు జారీ చేశారు. తాజా ఆదేశాల ప్రకారం 14 జిల్లాలకు కొత్త ఎస్పీలను నియమించగా.. ఏడు చోట్ల కొత్తవారిని నియమించారు. మరో ఏడు జిల్లాలకు ఇతర జిల్లాల ఎస్పీలను బదిలీ చేశారు. మిగతా 12 జిల్లాల్లో పాత వారినే ఎస్పీలుగా కొనసాగిస్తూ ఉత్తర్వులు జారీ చేశారు.

కృష్ణా జిల్లా ఎస్పీగా విద్యాసాగర్ నాయుడు, పల్నాడు జిల్లా ఎస్పీగా డి. కృష్ణారావు, ప్రకాశం జిల్లా ఎస్పీగా హర్షవర్ధన్ రాజు, అంబేద్కర్ కోనసీమ జిల్లా ఎస్పీగా రాహుల్ మీనాను నియమించారు. అన్నమయ్య జిల్లా ఎస్పీగా ధీరజ్‌ కునుగిలి, నంద్యాల జిల్లా ఎస్పీగా సునీల్‌ షెరాన్, బాపట్ల జిల్లా ఎస్పీగా ఉమా మహేశ్వర్‌ను నియమించారు. నెల్లూరు జిల్లా ఎస్పీగా అజితా వేజెండ్ల, విజయనగరం జిల్లా ఎస్పీగా ఏఆర్ దామోదర్, తిరుపతి ఎస్పీగా సుబ్బారాయుడు, గుంటూరు ఎస్పీగా వకుల్ జిందాల్, వైఎస్ఆర్ కడప ఎస్పీగా నచికేత్, శ్రీసత్యసాయి జిల్లా ఎస్పీగా సతీష్ కుమార్, చిత్తూరు ఎస్పీగా తుషార్ డూడి నియమితులయ్యారు.

అల్లూరి సీతారామరాజు, అనకాపల్లి, పార్వతీపురం మన్యం, శ్రీకాకుళం, విశాఖపట్నం, తూర్పు గోదావరి, ఏలూరు, కాకినాడ, ఎన్టీఆర్, పశ్చిమ గోదావరి, అనంతపురం, కర్నూలు జిల్లాల ఎస్పీలు యథాతథంగా ఆయా జిల్లాల్లోనే కొనసాగనున్నారు. మరోవైపు తిరుపతి ఎస్పీగా సుబ్బారాయుడు మరోసారి నియమితులయ్యారు. తిరుపతిలో తొక్కిసలాట ఘటన తర్వాత ఎస్పీగా ఉన్న సుబ్బారాయుడు బదిలీ అయ్యారు. అయితే మరోసారి ఆయనకు తిరుపతి జిల్లా ఎస్పీగా అవకాశం కల్పించారు. తిరుపతి ఎస్పీగాఉన్న హర్షవర్ధన్ రాజును ప్రకాశం జిల్లాకు బదిలీ చేశారు. ఇటీవల టీటీడీ ఈవో దగ్గర నుంచి సీనియర్ ఐఏఎస్ అధికారుల బదిలీలు చేపట్టిన ప్రభుత్వం.. ఆ తర్వాత జిల్లా కలెక్టర్లను బదిలీ చేసింది. తాజాగా జిల్లా ఎస్పీలను బదిలీ చేస్తూ నిర్ణయం తీసుకోవటం విశేషం.