ఇంటి స్థలం వెనక్కి ఇచ్చేయండి.. ఏపీలో వారందరికీ నోటీసులు

పేదలకు కూడు, గూడు కల్పించాలనే ఉద్దేశంతో ప్రభుత్వాలు అనేక సంక్షేమ కార్యక్రమాలు అమలు చేస్తుంటాయి. ఈ క్రమంలోనే అందరికీ పక్కా ఇల్లు ఉండాలనే ఉద్దే్శంతో ఏపీ ప్రభుత్వం ఇళ్ల పట్టాలు అందించి.. ఇంటి నిర్మాణం కోసం ఆర్థిక సాయం కూడా చేస్తోంది. అయితే ఇళ్ల నిర్మాణం కోసం ప్రభుత్వం నుంచి సాయం పొందిన తర్వాత కూడా.. ఇంటి నిర్మాణం జరపని వారికి ఏపీ గృహ నిర్మాణ శాఖ అధికారులు షాక్ ఇస్తున్నారు. గత ప్రభుత్వ హయాంలో రాష్ట్రవ్యాప్తంగా చాలాచోట్ల ఇళ్ల నిర్మాణాలు మొదలుపెట్టారు. జగనన్న కాలనీలో పేరుతో ఇళ్ల నిర్మాణాలు ప్రారంభించారు. అయితే వివిధ కారణాలతో చాలామంది లబ్ధిదారులు వీటిని అసంపూర్తిగా వదిలేశారు.

ఈ నేపథ్యంలో కూటమి ప్రభుత్వం అసంపూర్తిగా ఉన్న ఇళ్ల నిర్మాణాలను పూర్తి చేయించేందుకు చర్యలు ప్రారంభించింది. అందులో భాగంగా లబ్ధిదారులకు అదనపు సాయం అందించింది. ఎస్సీ, బీసీ సామాజిక వర్గాలకు చెందిన లబ్ధిదారులకు రూ.50 వేలు, ఎస్టీ సామాజిక వర్గానికి చెందిన లబ్ధిదారులకు రూ.75 వేలు చొప్పున అదనపు సాయం అందిస్తోంది. అయితే అదనపు సాయం పొందిన తర్వాత కూడా చాలాచోట్ల లబ్ధిదారులు ఇళ్ల నిర్మాణాలకు ఆసక్తి చూపించడం లేదు. ఈ నేపథ్యంలో గృహ నిర్మాణ శాఖ అధికారులు అలాంటి వారికి నోటీసులు ఇవ్వనున్నారు. ఈ మేరకు క్షేత్రస్థాయి అధికారులకు ఆదేశాలు జారీ చేశారు.

 అయితే ఇళ్ల నిర్మాణం కోసం ప్రభుత్వం నుంచి అదనపు సాయం పొందిన లబ్ధిదారులు.. వాటిని వేరే అవసరాలకు ఉపయోగించుకున్నట్లు తెలుస్తోంది. అలాగే కాలనీలలో మౌలిక వసతులు కల్పించకపోవటం కూడా ఇళ్ల నిర్మాణం పూర్తి చేయకపోవటానికి కారణంగా తెలుస్తోంది. వీటితో పాటుగా అదనపు సాయంతో నిర్మాణం పూర్తి చేయలేమని భావిస్తూ ఉండటం కూడా ఓ కారణమని సమాచారం.

అయితే ప్రభుత్వం నుంచి అదనపు సాయం పొందిన లబ్ధిదారులు వెంటనే పనులు ప్రారంభించాలని గృహ నిర్మాణ శాఖ అధికారులు తేల్చి చెప్తున్నారు. ఒకవేళ అలా చేయకపోతే.. ఆ ఇంటి స్థలాన్ని ఇళ్ల స్థలాల కోసం నమోదు చేసుకున్న వేరే వారికి కేటాయిస్తామని హెచ్చరిస్తున్నారు. ఈ వివరాలతో లబ్ధిదారులకు ఇంజనీరింగ్ అసిస్టెంట్ల ద్వారా నోటీసులు జారీ చేయాలని గృహ నిర్మాణ శాఖ అధికారులు నిర్ణయించారు.