11 శాతం వడ్డీకి రూ. 10 లక్షల లోన్.. మూడేళ్లకు నెలకు ఈఎంఐ ఎంత

మనకు రోజురోజుకూ ఖర్చులు పెరుగుతుంటాయి. ఎన్నో అవసరాలకు డబ్బు కావాల్సి వస్తుంది. ముఖ్యంగా ఉన్నట్లుండి అనారోగ్యం బారిన పడితే.. ఆస్పత్రిలో ఖర్చులకు డబ్బు లేకపోతే ఇబ్బంది పడాలి. ఇంకా ఇంట్లో ఏదైనా కార్యక్రమం నిర్వహించాలన్నా.. వెకేషన్‌కు వెళ్లాలన్నా.. ఇలాంటి సమయంలో మన దగ్గర డబ్బు లేకుంటే బంధువుల్నో, స్నేహితులనో అడుగుతుంటాం. అక్కడ దొరక్కపోతే .. ఇక బ్యాంకులే దిక్కు. ఇటీవలి కాలంలో బ్యాంకుల్లో లోన్లు తీసుకునే వారి సంఖ్య పెరుగుతోంది. ఒకప్పటితో పోలిస్తే ఇప్పుడు బ్యాంకులు.. విరివిగా లోన్లు అందిస్తున్నాయి. ఇంకా పెద్దగా డాక్యుమెంటేషన్ అవసరం లేకుండానే క్షణాల్లో లోన్ డబ్బులు.. బ్యాంక్ అకౌంట్లో పడిపోతున్నాయి.

ఆర్బీఐ కీలక రెపో రేట్లు తగ్గిస్తున్న క్రమంలో.. బ్యాంకులు కూడా లోన్ వడ్డీ రేట్లను తగ్గిస్తున్నాయి. కనీసం 10.50 శాతం ప్రారంభ వడ్డీ రేటుతోనూ లోన్లు అందుబాటులో ఉంటున్నాయి. సిబిల్ స్కోరు ఇక్కడ కీలక పాత్ర పోషిస్తుందని చెప్పొచ్చు. మెరుగైన సిబిల్ స్కోరు ఉంటే.. చాలా తక్కువ లేదా ప్రారంభ వడ్డీ రేటుకే లోన్ పొందే వెసులుబాటు ఉంటుంది. ప్రముఖ బ్యాంకుల్లోనూ తక్కువ వడ్డీకే లోన్లు అందుబాటులో ఉన్నాయి.

>> అయితే లోన్ తీసుకునే ముందు.. అంతా కచ్చితంగా ఈఎంఐ గురించి ముఖ్యంగా ఆలోచించాలి. ఎన్నేళ్లు కడతామనేది కూడా ప్రధాన విషయం. మీరు ఎంత లోన్ తీసుకుంటున్నారు.. దానికి ఎన్నేళ్లకు నెలకు ఈఎంఐ ఎంత పడుతుంది.. దానిని నేను చెల్లించగలనా లేదా అనేది చూడాల్సి ఉంటుంది. లేకపోతే తర్వాత ఇబ్బంది పడాల్సి వస్తుంది. దీనిని సులభంగా అర్థం చేసుకునేందుకు మనం ఒక ఉదాహరణతో చూద్దాం.

మీకు రూ. 10 లక్షలు రుణం కావాలనుకుందాం. చాలా బ్యాంకులు కనీసం 11 వడ్డీ రేటు ఆఫర్ చేస్తున్నాయి. దీనిని మీరు మీ స్థోమతను బట్టి మూడేళ్లలో చెల్లించాలనుకుంటే.. అంటే మొత్తం 36 నెలలకు చూస్తే.. ఈఎంఐ నెలకు రూ. 32,738 పడుతుంది. మీకు ఇది కాస్త ఎక్కువ అనిపించిందనుకోండి. అంటే నెలకు మీ దగ్గర అంత మిగలట్లేవ్ అనుకుంటే.. కాస్త తక్కువ ఈఎంఐ కోసం చూడాలి. రూ. 30 లోపు అయితే బెటర్ అనిపిస్తే ఒక ఆప్షన్ ఉంది.

ఇక్కడ లోన్ టెన్యూర్ పెంచుకోవాల్సి వస్తుంది. మరో 4 నెలలు అంటే 40 నెలలకు టెన్యూర్ పెంచితే ఈఎంఐ రూ. 29,975 కు చేరుతుంది. ఇది కూడా ఎక్కువే అనిపిస్తే.. నాలుగేళ్లు చెల్లించొచ్చు. అప్పుడు ఈఎంఐ ఇంకా తక్కువగా రూ. 25,845 పడుతుంది.

>> ఇదంతా కాదు.. 3-4 ఏళ్లు వద్దు.. నాకు ఎక్కువే మిగులుతుంది.. తొందరగా లోన్ క్లియర్ చేయాలని మీకు అనిపిస్తే ఇందుకు ముందే సిద్ధమై ఎక్కువ ఈఎంఐ పెట్టుకోవచ్చు. ఇక్కడ 36 నెలలకు బదులుగా 30 నెలలు ఎంచుకుంటే.. ఈఎంఐ రూ. 38,278 పడుతుంది. ఇంతకంటే ఎక్కువ కడతా అనుకుంటే.. దీనిని రెండేళ్లకు (24 నెలలు) తగ్గించుకోవచ్చు. ఇక్కడ ఈఎంఐ రూ. 46,607 పడుతుంది.