పాకిస్థాన్‌ను ఇలా చూస్తానని అనుకోలేదు.. పాక్ కెప్టెన్‌పై షోయబ్ అక్తర్ చురకలు

పాకిస్థాన్‌ను ఇలా చూస్తానని అనుకోలేదు.. మాటలు కూడా రావటం లేదు.. పాక్ మాజీ క్రికెటర్ ఆవేదన(ఫోటోలు- Samayam Telugu)

ఆసియాకప్‌ 2025లో భారత్ చేతిలో పాకిస్థాన్ ఓడిపోయిన నేపథ్యంలో పాక్ మాజీ పేసర్‌ షోయబ్ అక్తర్ .. సొంత జట్టుపైనే విమర్శనాస్త్రాలు సంధిస్తున్నాడు. మ్యాచ్ పూర్తయిన వెంటనే భారత్‌ను పొగుడుతూ.. కామెంట్స్ చేశాడు. “నాకు మాటలు రావట్లేదు. పాక్‌ను ఇలాంటి పరిస్థితుల్లో చూడాల్సి వస్తుందని అనుకోలేదు. ఏం మాట్లాడాలో కూడా తెలియట్లే. విజయం సాధించిన టీమిండియాకు హ్యాట్సాఫ” అని కామెంట్స్ చేశాడు.

తాజాగా భారత్‌తో మ్యాచ్‌లో పాకిస్థాన్ కెప్టెన్ సల్మాన్ అలీ అఘా .. టాస్ గెలిచి తొలుత బ్యాటింగ్ ఎంచుకోవడాన్ని తీవ్రంగా తప్పుబట్టాడు. ఈ మ్యాచ్‌లో తొలుత బ్యాటింగ్ చేసిన పాక్.. భారత స్పిన్నర్ల దెబ్బకు 20 ఓవర్లలో 127/9 పరుగులకే పరిమితమైంది. ఆ తర్వాత భారత్ 3 వికెట్లు కోల్పోయి.. ఈజీగా లక్ష్యాన్ని ఛేదించింది. దీంతో పాక్ ప్లాన్ విఫలమైంది. దీంతో టాస్ గెలిచి తొలుత బ్యాటింగ్ చేయాలన్న అలీ అఘా నిర్ణయాన్ని షోయబ్ అక్తర్ తప్పుబట్టాడు.

“టాస్ స‌మ‌యంలోనే టీమిండియా సూర్యకుమార్ యాద‌వ్ పిచ్ రిపోర్ట్ మొత్తం చెప్పేశాడు. సెకండ్ బ్యాటింగ్ చేసేటప్పుడు తేమ ప్రభావం చూపే అవకాశం ఉంది. అప్పుడు బంతి చక్కగా బ్యాట్‌ మీదకు వస్తుంది. మా బ్యాటింగ్‌ లైనప్‌ చాలా డెప్త్‌గా ఉంది. అందుకే మేం మొదట బౌలింగే చేయాలనుకున్నాం అని చాలా క్లియర్‌గా చెప్పాడు. కానీ మా ఐన్‌స్టీన్‌ (పాకిస్థాన్ కెప్టెన్‌) మాత్రం పిచ్‌ గురించి ఏమీ తెలుసుకోకుండానే మేం మొదట బ్యాటింగ్‌ చేస్తామని చెప్పేశాడు” అని షోయబ్ అక్తర్ విమర్శించాడు.

ఇక పాకిస్థాన్‌ బ్యాటర్లపై ఆ జట్టు మాజీ క్రికెటర్ వసీమ్ అక్రమ్ అసహనం వ్యక్తం చేశాడు. కుల్‌దీప్ యాదవ్‌ బౌలింగ్‌లో గుడ్డిగా ఆడేశారని విమర్శించాడు. “‘కుల్‌దీప్‌ యాదవ్‌ బంతి విసిరే విధానాన్ని మా బ్యాటర్లు అస్సలు రీడ్‌ చేయలేదు. పాక్‌ బ్యాటర్లు ప్రతి రెండో బంతిని స్వీప్‌ షాట్ కొట్టేందుకు ప్రయత్నించారు. దానర్థం వారు కుల్‌దీప్‌ యాదవ్ బౌలింగ్‌ను సరిగ్గా అంచనా వేయలేకపోయారే” అని వసీమ్ అక్రమ్ వ్యాఖ్యానించాడు.