ఓటమిని తట్టుకోలేక,,,,సూర్యకుమార్‌పై దిగజారుడు వ్యాఖ్యలు చేసిన పాక్ మాజీ ప్లేయర్‌

ఆసియాకప్‌ 2025లో భారత్ చేతిలో పాకిస్థాన్ జట్టు చిత్తుగా ఓడిపోవడాన్ని ఆ జట్టు మాజీ క్రికెటర్లు జీర్ణించుకోలేకపోతున్నారు. తమ జట్టు ఓడిపోయిందనే బాధలో.. నోటికొచ్చినట్లు మాట్లాడుతున్నారు. చాలా మంది తమ జట్టు సరిగ్గా ఆడలేదని అంగీకరిస్తున్నారు. కానీ పాకిస్థాన్ మాజీ క్రికెటర్ మహమ్మద్ యూసుఫ్ మాత్రం విమర్శల పాలయ్యే వ్యాఖ్యలు చేశాడు. భారత్ చేతిలో ఓటమి, ఆపై షేక్ హ్యాండ్ విషయంలో పరువు పోగొట్టుకోవడాన్ని తట్టుకోలేక టీమిండియా కెప్టెన్ సూర్యకుమార్ యాదవ్‌పై అభ్యంతకర వ్యాఖ్యలు చేశాడు.

పాకిస్థాన్‌లోని ఓ టీవీ ఛానెల్‌లో ఆసియాకప్‌ సందర్భంగా లైవ్ డిబేట్‌లో పాల్గొన్నాడు యూసుఫ్. ఈ సందర్భంగా సూర్యకుమార్ యాదవ్‌పై పదేపదే అభ్యంతకర వ్యాఖ్యలు చేశాడు. ఉద్దేశపూర్వకంగా సూర్యకుమార్ పేరును తప్పుగా పలుకుతూ.. పంది అనే అర్థం వచ్చేలా దిగజారుడు వ్యాఖ్యలు చేశాడు. ఇదంతా గమనించిన టీవీ యాంక‌ర్ అలా అన‌కూడ‌దంటూ అభ్యంత‌రం చెప్ప‌ినా అతడు వినిపించుకోలేదు. ఇదే సమయంలో డిబేట్‌లో పాల్గొన్న ఇతరులు.. నవ్వుతూ కనిపించారు.

ఇక ఇదే సమయంలో భారత జట్టుపై కూడా నోటి కొచ్చినట్లు మాట్లాడాడు. “ఈ****కుమార్‌, భార‌త్‌ను చూడండి. వారు సిగ్గుప‌డాలి. అంపైర్లను వెంట‌బెట్టుకొని, రిఫ‌రీని హింసించ‌డం ద్వారా గెలువ‌డానికి ప్ర‌య‌త్నిస్తున్న తీరు చూడండి. అంపైర్‌ను గమనించండి. అతడు ఔట్ అని ఇవ్వడానికి వేలు కూడా ఎత్తట్లేదు (టీమిండియా బ్యాటింగ్ చేస్తున్నప్పుడు)” అని యూసుఫ్ దిగజారుడు వ్యాఖ్యలు చేశాడు. ఇందుకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.

యూసుఫ్ వ్యాఖ్యలపై సోషల్ మీడియాలో తీవ్రస్థాయిలో విమర్శలు వస్తున్నాయి. మీరు ఇంతకంటే దిగజారరు అనుకున్న ప్రతిసారి.. అది తప్పని రుజువు చేస్తున్నారు అని నెటిజన్లు కామెంట్లు చేస్తున్నారు. మైదానంలో ఆడటం చేతకాక.. నోటీకి పని చెబుతున్నారని పేర్కొంటున్నారు. ఇక పాకిస్థాన్‌పై భారత్.. 7 వికెట్ల తేడాతో గెలిచింది. తొలుత దాయాది జట్టును 127/9కే పరిమితం చేసింది. అనంతరం 15.5 ఓవ‌ర్ల‌లోనే మూడు వికెట్లు కోల్పోయి లక్ష్యాన్ని ఛేదించింది భారత్. సూర్యకుమార్ యాదవ్ .. 37 బంతుల్లో 47 రన్స్ చేసి నాటౌట్‌గా నిలిచాడు.