ఆఫ్ఘనిస్థాన్‌కు తిరిగి అమెరికా సైనికులు?: బగ్రామ్ ఎయిర్ బేస్‌పై ట్రంప్ కీలక ప్రకటన

నాలుగు సంవత్సరాల క్రితం ఆఫ్ఘనిస్థాన్ నుంచి తమ సైనికులను ఉపసంహరించుకున్న అమెరికా.. ఇప్పుడు తిరిగి ఆ దేశానికి వెళ్లే సూచనలు కనిపిస్తున్నాయి. ఇందుకు సంబంధించే తాజాగా యూఎస్ అధ్యక్షుడు డొనాల్డ్ ట్రంప్ సంచలన ప్రకటన చేశారు. ఆఫ్ఘనిస్థాన్‌లో అత్యంత కీలకమైన బగ్రామ్ వైమానిక స్థావరంపై తిరిగి నియంత్రణ సాధించడానికి అమెరికా ప్రయత్నిస్తోందని తెలిపారు. బ్రిటన్ ప్రధాన మంత్రి కీర్ స్టార్మర్‌తో కలిసి నిర్వహించిన ఒక మీడియా సమావేశంలో ఆయన ఈ విషయాన్ని వెల్లడించారు. "మేము దానిని తిరిగి తీసుకోవడానికి ప్రయత్నిస్తున్నాం. ఇది ఒక బ్రేకింగ్ న్యూస్ కావొచ్చు. వారు మా నుంచి కొన్ని విషయాలు ఆశిస్తున్నారు కాబట్టి. మేము దానిని తిరిగి తీసుకోవడానికి ప్రయత్నిస్తున్నాం" అని ట్రంప్ అన్నారు.

చైనాను ఎదుర్కొవడానికేనా?

బగ్రామ్ ఎయిర్ బేస్‌ను తిరిగి స్వాధీనం చేసుకోవడానికి ప్రధాన కారణం.. ప్రత్యర్థి దేశమైన చైనాకు అది చాలా దగ్గరగా ఉండటమేనని ట్రంప్ స్పష్టం చేశారు. "మేము ఆ స్థావరాన్ని తిరిగి కోరుకుంటున్నాం. దీనికి ఒక ప్రధాన కారణం ఏమిటంటే.. చైనా తన అణు ఆయుధాలను తయారు చేసే ప్రాంతానికి అది ఒక గంట దూరంలోనే ఉంది" అని ట్రంప్ అన్నారు.

బగ్రామ్ వైమానిక స్థావరాన్ని జో బైడెన్ అధ్యక్షతన తాము తాలిబాన్‌కు ఎలాంటి ఉపయోగం పొందకుండానే అప్పగించామని ట్రంప్ అన్నారు. ఇది జరిగి ఉండాల్సింది కాదని, అది ఒక పూర్తి విపత్తు అని ఆయన అభివర్ణించారు. ఆఫ్ఘనిస్థాన్ నుంచి అమెరికా సైనికులను ఉపసంహరించుకునేందుకు సంబంధించిన నిబంధనలు ట్రంప్ మొదటి అధ్యక్ష పదవి కాలంలోనే నిర్ణయించినప్పటికీ.. వాస్తవ ఉపసంహరణ బైడెన్ నాయకత్వంలోనే జరిగింది. అయినప్పటికీ తాము ఆఫ్ఘనిస్థాన్‌ను వదిలి వెళ్లాలనుకున్నప్పటికీ బగ్రామ్ వైమానిక స్థావరాన్ని మాత్రం ఉంచుకోవాలని తాము భావించామని ట్రంప్ తెలిపారు.

బగ్రామ్ ఎయిర్ బేస్ గొప్పతనాన్ని ట్రంప్ వర్ణిస్తూ.. అది ప్రపంచంలోనే అతి పెద్ద వైమానిక స్థావరాలలో ఒకటి అని పేర్కొన్నారు. దానిపై ఒక గ్రహాన్ని కూడా ల్యాండ్ చేయవచ్చని అన్నారు. వారు ఆఫ్ఘనిస్థాన్‌లో మొత్తం విపత్తును సృష్టించారని చెప్పారు. తాము ఆఫ్ఘనిస్థాన్‌ను వదిలి వెళ్లాలనుకున్నామని.. కానీ బలం, గౌరవంతో వెళ్లాలనుకున్నామని పేర్కొన్నారు.