లక్ష డాలర్ల విలువైన హై పవర్డ్ రేసింగ్ కారు.. నిమిషాల్లో తుక్కుతుక్కు చేశారు

అదో హై పవర్డ్ రేసింగ్ కారు, విలువ దాదాపు లక్ష డాలర్లు. అంటే మన కరెన్సీలో రూ.83 లక్షల పైమాటే. లాంటి కారును అమెరికా కెంటకీలోని లూయిస్‌విల్లే సిటీ అధికారులు నిమిషాల్లో తుక్కు చేశారు. క్రషర్ కింద ఆ కారు నలిగిపోతున్న వీడియో ఇప్పుడు సోషల్ మీడియాలో వైరల్‌గా మారింది. వీధుల్లో చట్టవిరుద్ధంగా జరిగే రేసింగ్‌లకు ఇదో గట్టి సందేశమని నెటిజన్లు చెబుతున్నారు.

గతేడాది స్ట్రీట్ రాడ్ నేషనల్స్ సమయంలో ఈ అత్యంత శక్తివంతమైన కారును అధికారులు స్వాధీనం చేసుకున్నారు. అది డోడ్జ్ హెల్‌క్యాట్‌ కారు. లక్ష డాలర్ల విలువ ఉంటుందని అధికారులు చెబుతున్నా.. ఈ మాడిఫైడ్, హై పవర్డ్ హెల్‌క్యాట్ ధర అంతకు మించే ఉంటుందని నెటిజన్లు కామెంట్లు చేస్తున్నారు. స్ట్రీట్ రాడ్ నేషనల్స్ అనేది అమెరికాలో సంవత్సరానికి ఒకసారి జరిగే కార్యక్రమం. ఇందులో వేలాి క్లాసిక్ అమెరికన్ కార్లు, స్ట్రీట్ కార్లు, మజిల్ కార్లను ఔత్సాహికులు ప్రదర్శిస్తుంటారు. ఈ కార్లను పూర్తిగా మాడిఫై చేస్తారు. కారు బాడీని పూర్తిగా మార్చేస్తారు. హై పవర్డ్ ఇంజిన్‌ను బిగిస్తారు. క్లచ్, గేర్లు, ఇంటీరియర్ ఇలా ప్రతి దానిని తమకు నచ్చిన విధంగా, చాలా శక్తివంతంగా మార్చేస్తారు. బయటికి చూడటానికి ఒక కారులా ఉన్నా.. అందులో అనేక కార్ల విడిభాగాలు అమరుస్తారు.

అలా ఒక శక్తివంతమైన కారును తయారు చేస్తారు. వాటిని స్ట్రీట్ రేసింగ్‌లకు, ప్రదర్శనలకు ఉపయోగిస్తారు. ఇందుకోసం లక్షల్లో ఖర్చు చేస్తుంటారు. అలాంటి కార్లను, ఇతర వాహనాలను ప్రదర్శించేది స్ట్రీట్ రాడ్ నేషనల్స్. అయితే ఇలా ఇష్టారీతిగా విడిభాగాలను మార్చడం పూర్తిగా చట్టవిరుద్ధం. అలాంటి కార్లను రోడ్లపై నడపడాన్ని కూడా నేరంగా పరిగణిస్తారు.

అలాంటి హెల్‌క్యాట్‌ అనే కారులు లూయిస్‌విల్లే అధికారులు స్వాధీనం చేసుకున్నారు. చాలా ఖరీదైన కారు అయినప్పటికీ అది రోడ్లపై తిరగడానికి చట్టప్రకారం వీలు లేకపోవడంతో అధికారులు దానిని పూర్తిగా తుక్కుగా మార్చాలని నిర్ణయించారు. లూయిస్‌విల్లేలో సదరు హెల్‌క్యాట్‌ వాహనాన్ని తుక్కుగా మార్చేశారు. ఇందుకు సంబంధించిన వీడియోను సోషల్ మీడియాలో పోస్టు చేశారు. స్ట్రీట్ రేసింగ్‌లో పాల్గొంటే ఆ వాహనాన్ని స్వాధీనం చేసుకుంటాం. ఆ వాహనం రోడ్లపై తిరగడానికి వీలుగా లేకపోతే దానిని తుక్కుగా మారుస్తాం అంటూ అధికారులు ఆ వీడియోకు క్యాప్షన్ కూడా ఇచ్చారు.

లూయిస్‌విల్లే నగరంలో ఇలాంటి చట్టవిరుద్ధమైన రేసింగ్‌లు తరచూ జరుగుతుంటాయి. అలాంటి రేసింగ్‌లో పాల్గొన్న కార్లను అధికారులు స్వాధీనం చేసుకుంటున్నారు. అలా 2023లో 62 కార్లు, 2024లో 70 కార్లు, ఈ ఏడాదిలో ఇప్పటివరకు 35 కార్లను స్వాధీనం చేసుకుని జప్తు చేశారు. ఆయా కార్లలో కొన్నింటిని వేలం వేస్తారు. చట్టవిరుద్ధంగా మాడిఫై చేసిన వాహనాలను తుక్కుగా మారుస్తారు.