సేవింగ్స్ ఖాతా ఉంటే చాలు.. రోజుకు రూ.1,50,000.. 6.5 శాతం వడ్డీ

ఎస్‌బీఐ, హెచ్‌డీఎఫ్‌సీ సహా దాదాపు అన్ని బ్యాంకుల్లో పొదుపు ఖాతాలపై వడ్డీ రేటు 3 శాతం లోపే ఉంటుంది. కొన్ని బ్యాంకులు మాత్రమే అధిక డిపాజిట్లపై ఎక్కువ వడ్డీ ఇస్తాయి. అయితే, జియో ఫైనాన్షియల్ సర్వీసెస్ లిమిటెడ్‌ అనుబంధ సంస్థ జియో పేమెంట్స్ బ్యాంక్ లిమిటెడ్  బంపర్ ఆఫర్ ఇచ్చింది. సేవింగ్స్ ప్రో అకౌంట్ లాంచ్ చేసినట్లు ప్రకటించింది. ఈ బ్యాంకు ఖాతాలో ఉండే అదనపు డబ్బులపై ఎక్స్‌ట్రా రిటర్న్స్ ఆఫర్ చేస్తున్నట్లు తెలిపింది. సేవింగ్స్ ప్రో అనేది ఆటో స్వీప్ అకౌంట్. అకౌంట్లో ఉండే అదనపు ఫండ్స్‌ని ఓవర్‌నైట్ మ్యూచువల్ ఫండ్స్‌లో ఇన్వెస్ట్ చేసి గరిష్ఠ వడ్డీ ఆదాయం అందిస్తామని తెలిపింది.

జియో పేమెంట్స్ బ్యాంక్ లిమిటెడ్ సేవింగ్స్ ప్రో అకౌంట్ ద్వారా ఆటోమేటిక్‌గా అదనపు డబ్బులను ఓవర్ నైట్ మ్యూచువల్ ఫండ్స్‌లో ఇన్వెస్ట్ చేసి 6.50 శాతం వరకు రిటర్న్స్ అందించే ప్రయత్నం చేస్తుంది. గ్రోత్ ప్లాన్స్‌లోని 2 ఏళ్ల వార్షిక లాభాల ఆధారంగా ఈ రిటర్న్స్ ఉంటాయని తెలిపింది. సేవింగ్స్ ప్రో అనేది ఒక ఆటో స్వీప్ సేవింగ్స్ అకౌంట్. ఈ ఖాతా తీసుకున్నవారు థ్రిషోల్డ్ అమౌంట్ ఎంపిక చేసుకోవాలి. కనీసం రూ.5000గా ఎంచుకోవాల్సి ఉంటుంది. అంటే ఈ రూ.5 వేలకు మించి అమౌంట్ ఖాతాలో ఉన్నప్పుడు ఆ డబ్బులను తక్కువ రిస్క్ ఉండే ఓవర్‌నైట్ మ్యూచువల్ ఫండ్స్‌లో ఆటమేటిక్‌గా ఇన్వెస్ట్ చేస్తారు.

ఈ సౌకర్యం ద్వారా రోజుకు గరిష్ఠంగా రూ.1,50,000 వరకు పెట్టుబడి పెట్టే అవకాశం కల్పిస్తున్నట్లు జియో పేమెంట్స్ బ్యాంక్ తెలిపింది. సెక్యూరిటీస్ ఎక్స్చేంజ్ బోర్డ్ ఆఫ్ ఇండియా సెబీ నిబంధనల ప్రకారం రిడంప్షన్ ఆప్షన్స్ ఉంటాయి. కస్టమర్లు తక్షణే 90 శాతం వరకు ఫండ్స్ తీసుకునేందుకు అవకాశం ఉంటుంది. గరిష్ఠంగా రూ.50 వేల వరకు తీసుకోవచ్చు. అంతకు మించితే 1 టూ 2 వర్కింగ్ డేస్‌లో ప్రాసెసింగ్ అవుతుంది. ఈ స్కీమ్‌లో ఎలాంటి హిడెన్ ఛార్జీలు, ఎంట్రీ, ఎగ్జిట్ లోడ్స్, లాకిన్ పీరియడ్స్ ఉండవు. అంటే కస్టమర్లు ఎప్పుడైనా ఇన్వెస్ట్ చేయొచ్చు, ఎప్పుడైనా తీసుకోవచ్చు. ఎలాంటి ఫీ ఉండదు.

ఓవర్‌నైట్ మ్యూచువల్ ఫండ్స్ అనేవి ఒక విధంగా డెట్ ఫండ్స్‌గా చెబుతారు. ఒక రోజులోనే మెచ్యూరిటీ అయ్యే సెక్యూరిటీల్లో ఇన్వెస్ట్ చేస్తారు. ఈ ఫండ్స్‌ని లో రిస్క్ కేటగిరీగా పరిగణిస్తారు. హైబ్రిడ్, ఈక్విటీ ఫండ్స్‌తో పోలిస్తే చాలా వరకు స్థిరమైన రాబడులను అందిస్తాయి. హై లిక్విడిటీ కలిగి ఉండి షార్ట్ టర్మ్‌ పెట్టుబడులకు ఇవి పాపులర్ చాయిస్‌గా చెబుతారు.